Ntirho 12 - BIBELE Mahungu Lamanene

Yobo ú ri, Xikwembu a xi kaneteki

¹ Kutani Yobo a hlamula a ku:

² “Swa vonaka, mo vulavula onge mi tiko hinkwaro, vutlhari byi ta fa siku mi faka!

³ Kambe na mina ndzi ni ku twisisa kukota n'wina, a mi ndzi tluli hi vutivi; leswi mi swi vuleke, swi tiva hi mani na mani.

⁴ Khale a ndzi khongela Xikwembu, kutani xi ndzi hlamula; kambe sweswi ndzi hundzuke xihlekiso eka vanakulorhi, mina munhu wo lulama wo pfumala nandzu, ndza hlekuriwa.

⁵ Vanhu lava tsakeke va ri, ku xaniseka i xisolo, kutani va ba munhu loyi a nga kusuhi ni ku wa.

⁶ Emitini ya swigevenga, ku tsakiwile; lava rhuketelaka Xikwembu, va tshamisekile, va ri, xona xi le mavokweni ya vona.

⁷ “Kambe wena nakulorhi, vutisa swiharhi, swi ta ku dyondzisa; na tona tinyanyana ti ta ku byela ntiyiso.

⁸ Vulavula na misava, yi ta ku komba ndlela, na tona tinhlampfi ti ta ku tisela mahungu.

⁹ Swivumbiwa leswi hinkwaswo swi tiva mhaka leyi: HOSI Xikwembu hi xona xi nga endla hinkwaswo hi matimba ya xona.

¹⁰ Hi xona xi hlayisaka vutomi bya leswi hanyaka hinkwaswo, munhu un'wana ni un'wana ú hanyisiwa hi xona.

¹¹ Ku ni xivuriso lexi nge: ‘Swakudya swi nantswa hi nomo, marito ma hleriwa hi tindleve;

¹² vutlhari byi na lavo dyuhala, lava khale hi vona va twisisaka.’

¹³ Kasi ntiyiso hi lowu: Vutlhari ni matimba swi na Xikwembu, hi xona xi tsundzuxaka vanhu, xi va nyikaka ku twisisa.

¹⁴ “Leswi Xikwembu xi swi wiseke, swi nge pfuxiwi hi munhu; munhu loyi xi nga n'wi pfalela ekhotsweni, a nge pfuleriwi hi un'wana.

¹⁵ Loko xi yimisa mpfula, milambu ya phya; loko xi nisa ndhambi, misava ya onhaka.

¹⁶ Matimba ni vutlhari swi na xona; muxisi ni muxisiwa va tiva hi xona.

¹⁷ Tindhuna xi ti tekela vutlhari, vaavanyisi xi va hundzula xihlekiso.

¹⁸ Xi herisa matimba ya vafumi, xi va ambexa swiambalo swa mahlonga.

¹⁹ Vaprista xi va tekela vutlhari, lavo chaviseka xa va tsongahata.

²⁰ Xi miyeta vanhu lava tshembiwaka, lava dyuhaleke xi va pfilunganya miehleketo.

²¹ Vafumi va matiko xi va vangela tingana, xi tekela tinhenha matimba ya tona.

²² Xi paluxa leswi nga ndzeni ka swidziva leswikulu, laha a ku ri ni xinyami xo chavisa, xi tisa ku vonakala.

²³ Xi kurisa matiko, xi tlhela xi ma lovisa, xi hlengeleta vamatiko, xi tlhela xi va hangalasa.

²⁴ Varhangeri va matiko, xi va dlaya miehleketo, xi va chochoverisa emananga va nga kumi ndlela;

²⁵ va gugurhuteka exinyamini, va nga voningi hi nchumu, xi va dedelekisa kukota swidakwa.”