Ntirho 11 - BIBELE Mahungu Lamanene

Sofara ú ri, Yobo ú dyohile ngopfu

¹ Kutani Sofara wa le Naamani a hlamula a ku:

² “Xana marito yo tarisa leswi a ma hlamuriwi xana? Xana munhu a nga tiendla la lulameke hi ku vulavula ngopfu xana?

³ Ku phyaphyarha ka wena ku nga miyeta vanhu ke? Loko u sola Xikwembu, a wu nga tshinyiwi xana?

⁴ Wena Yobo, u ri leswi u swi ehleketaka swi lulamile; u tivula la nga riki na xisandzu emahlweni ka Xikwembu.

⁵ Loko Xikwembu a xo pfula nomo wa xona xi ku hlamula, a ndzi ta tsaka ngopfu;

⁶ a xi ta ku komba swihundla swa vutlhari, hikuva ku twisisa ka xona ka hlamarisa; naswona tiva leswaku Xikwembu a xi ku banga hi ku ya hi vukulu bya swidyoho swa wena.

⁷ “Xana u nga twisisa leswi Xikwembu-xa-matimba-hinkwawo xi nga swona xana? Xana u nga tiva laha matimba ya xona ma helelaka kona xana?

⁸ Vutivi bya xona byi lehile ku hundza matilo, byi entile byi fika ni le xivandleni xa vafi; wena Yobo u nge endli nchumu, hikuva bya wena vutivi a byi fiki helo!

⁹ Vutivi bya Xikwembu byi navile ku tlula misava, byi tlula ni malwandle hi ku anama.

¹⁰ Loko Xikwembu xi hundza xi khoma munhu, xi n'wi yisa ehubyeni, xi nga siveriwa hi mani xana?

¹¹ Xikwembu xi tiva vanhu lava nga pfuniki nchumu, mintirho ya vona leyo biha, xi hatla xi yi vona.

¹² Xiphukuphuku xi ta tlhariha, siku mangwa yi nga ta mila timhondzo.

¹³ “Wena Yobo, veka miehleketo ya wena eka Xikwembu, tlakusa mavoko u khongela xona.

¹⁴ Leswo biha leswi nga ka wena, swi cukumete kule, u nga pfumeleli leswo homboloka swi nghena emutini wa wena.

¹⁵ Loko u endla tano, u ta languta emahlweni u nga soleki, u ta va u hlayisekile u nga chavi nchumu.

¹⁶ Mahlomulo ya wena a wu nga ha ma tsundzuki, u ta ma rivala ku fana ni mati lama khulukeke ma hundzela mahlweni.

¹⁷ Kutani vutomi bya wena byi ta vangama kukota dyambu ninhlekanhi, xinyami xa byona xi ta tlhavela hi vurhonga.

¹⁸ U ta va u hlayisekile, u ri ni ku tshemba; u ta lavisisa matlhelo hinkwawo, u ko u kuma ku tshamiseka u wisa.

¹⁹ U ta etlela u tsakile u nga chavisiwi ha nchumu; vanhu lavo tala va ta navela ku kateka tanihi wena.

²⁰ Kambe mahlo ya lavo homboloka a ma nga ha voni, ni ndlela yo baleka ha yona a va nga ha yi tivi; va to langutela ntsena siku ra vona ra ku fa!”