Ntirho 10 - BIBELE Mahungu Lamanene

Yobo ú ri, Xikwembu xi n'wi tshika a wisa

¹ “Ndzi karhele ku hanya; hikokwalaho ndzi lava ku boxa leswi swi ndzi vilerisaka, ndzi phofula leswi nga mbilwini ya mina.

² Wena Xikwembu, ndzi ri, u nga ndzi veki nandzu, kambe ndzi kombe leswi ndzi ku dyoheleke swona.

³ Xana eka wena i mhaka yo saseka loko u ndzi tshikelela, u sola ntirho wa mavoko ya wena, u ri karhi u katekisa makungu ya lavo homboloka xana?

⁴ “Xana u languta swilo hi mahlo ya nyama, u swi vona hilaha vanhu va swi vonaka hakona xana?

⁵ Xana nkarhi wa wena wa ku hanya wu lo koma, wu fana ni masiku kumbe malembe ya munhu xana?

⁶ Hikwalaho ka yini u handza-handza, u hlota swidyoho ni swihoxo swa mina, xana?

⁷ Wa swi tiva leswaku mina a ndzi dyohanga nchumu, kambe ku hava loyi a nga ndzi lamulelaka emavokweni ya wena!

⁸ Hi wena u vumbeke swirho swa mina hinkwaswo loko u ndzi tumbuluxa, kambe sweswi wa ndzi dlaya!

⁹ Tsundzuka leswaku u ndzi endlile hi vumba ntsena; xana u lava leswaku ndzi tlhelela entshurini xana?

¹⁰ U ndzi vumbile ekhwirini ra manana, kukotisa ntswamba loko wu kamiwa wu endla rivomba.

¹¹ U ndzi funengetile hi nyama ni nhlonge, u hlanganisa marhambu ya mina, u ma luka hi misiha.

¹² U ndzi hanyisile hi rirhandzu ro tshembeka, u sirhelela vutomi bya mina.

¹³ Kambe ndza swi tiva: Exihundleni xa mbilu ya wena, u ni makungu ya ku ndzi xanisa:

¹⁴ Loko ndzi dyoha, u hatla u swi vona, u ala ni ku ndzi rivalela.

¹⁵ Siku ndzi dyohaka, ndzi le khombyeni, kambe loko ndzi endla leswinene, ndzi tsandzeka ku tlakusa nhloko, hikuva ndzi tshikeleriwa hi mahlomulo, ndzi vona maxangu ntsena.

¹⁶ Loko ndzi tipfuxa hi ndzexe, wena u ndzi hlota onge wo va nghala, u ndzi hlasela hi ndlela yo hlamarisa.

¹⁷ U vitana timbhoni letintshwa ti ta ndzi lumbeta, u engetelela ku ndzi hlundzukela, kutani makhombo ma ndzi wela hi ku khatakanya.

¹⁸ “U ndzi humesele yini ekhwirini ra manana? Ingi ndzi lo fa ndzi nga si voniwa hi munhu!

¹⁹ A ndzi ta fana ni loyi a nga kombiwangiki misava, a ndzi ta va ndzi yisiwile esirheni siku ndzi velekiweke.

²⁰ Masiku ya mina ya ku hanya ma komile ngopfu; ndzi tshike u hambana na mina, ndzi ta wisanyana,

²¹ ndzi nga si rhelela ndzi ya exivandleni xa vafi, laha ndzi nga ta ka ndzi nga ha vuyi, ndzi nga si nghena etikweni ra xinyami xo chavisa,

²² laha ku nga lo khwíxíí vusiku ni nhlekanhi, exinyamini xa mpfilumpfilu lowukulu!”