Nhlavutelo 7 - BIBELE Mahungu Lamanene

Ta Vaisraele va 144 000 lava funghiweke

¹ Endzhaku ka sweswo ndzi vona mune wa tintsumi ti yimile etinhleni ta mune ta misava, ti sivela timheho ta mune ta misava, leswaku ni yin'we ya tona yi nga hungeli emisaveni, kumbe elwandle, kumbe emurhini wun'wana ni wun'wana.

² Kutani ndzi vona ntsumi yin'wana yi tlhandluka hi tlhelo ra vuxa yi tamele xifungho xa Xikwembu lexi hanyaka. Yi vitana, hi rito leri tlakukeke, tintsumi leti ta mune leti Xikwembu xi ti nyikeke matimba yo onha misava ni lwandle.

³ Ntsumi yi ku: “Mi nga onhi misava, kumbe lwandle, kumbe mirhi, ku kondza loko hi ta fungha malandza ya Xikwembu xa hina hi mfungho emimombyeni ya vona.”

⁴ Kutani ndzi twa ntsengo wa lava funghiweke: A va ringana 144 000, va huma etinyimbeni hinkwato ta Vaisraele va ri lava funghiweke.

⁵ Va nyimba ya ka Yuda lava funghiweke a va ringana 12 000; va ka Rhuveni a va ringana 12 000; va ka Gadi, 12 000;

⁶ va ka Asere, 12 000; va ka Neftali, 12 000; va ka Manase, 12 000;

⁷ va ka Simiyoni, 12 000; va ka Levhi, 12 000; va ka Isakara, 12 000;

⁸ va ka Zabuloni, 12 000; va ka Yosefa, 12 000; na vona va nyimba ya ka Benjamini lava funghiweke, a va ringana 12 000.

Ta ntshungu lowukulu wo huma ematikweni

⁹ Endzhaku ka sweswo, ndzi languta, kutani ndzi vona ntshungu lowukulu wa vanhu; a ku nga ri na un'we la kotaka ku va hlaya. A va huma ematikweni hinkwawo, ni le tinxakeni hinkwato, va ri va swivongo hinkwaswo ni va tindzimi hinkwato. A va yimile emahlweni ka xiluvelo ni le mahlweni ka Xinyimpfana va ambele tinguvu to leha leto basa, va tamele mincindzu emandleni ya vona.

¹⁰ A va huwelela hi rito leri tlakukeke va ku: “Ku ponisiwa ku huma eka Xikwembu xa hina lexi tshameke exiluvelweni, ni le ka Xinyimpfana!”

¹¹ Kutani tintsumi hinkwato ti yima ti rhendzele xiluvelo ni vakulukumba ni swivumbiwa leswi hanyaka swa mune, ti nkhinsama ti korhama emahlweni ka xiluvelo, ti gandzela Xikwembu,

¹² ti ku: “Amen! Ku vongiwa, ni ku twala, ni vutlhari, ni ku nkhensiwa, ni ku dzuneka, ni matimba, ni ntamu, a swi ve eka Xikwembu xa hina, hilaha ku nga heriki! Amen.”

¹³ Kutani un'wana wa vakulukumba a ndzi vutisa a ku: “Lava ambaleke tinguvu to leha leto basa i vamani xana? Va huma kwihi xana?”

¹⁴ Ndzi ku ka yena: “Swo tiva hi wena, Hosi yanga.” Hiloko a ku ka mina: “Lava, hi lava humaka eku xanisekeni lokukulu; va hlantswile tinguvu ta vona, va ti basisile hi ngati ya Xinyimpfana.

¹⁵ “Hikokwalaho, va le mahlweni ka xiluvelo xa Xikwembu, va xi tirhela vusiku ni nhlekanhi eTempeleni ya xona. Kutani loyi a tshameke exiluvelweni, ú ta va kusuhi na vona a va sirhelela.

¹⁶ A va nga ha twi ndlala kumbe torha, a va nga ha hisiwi hi dyambu kumbe ku tshwa kunene,

¹⁷ hikuva Xinyimpfana lexi nge xiluvelweni xi ta va murisi wa vona; xi ta va yisa eswihlobyeni swa mati ya vutomi, kutani Xikwembu xi ta sula mihloti hinkwayo emahlweni ya vona.”