Nhlavutelo 6 - BIBELE Mahungu Lamanene

Ta swilemo

¹ Kutani ndzi vona Xinyimpfana loko xi ri karhi xi lemula xilemo xo sungula eka leswa 7, kutani ndzi twa xin'wana xa swivumbiwa leswi hanyaka swa mune xi vula hi rito leri dzindzaka ku fana na tilo, xi ku: “Tana!”

² Ndzi languta, kutani ndzi vona hanci leyo basa. Loyi a gadeke yona a a khomile vurha, a nyikiwile ni harhi ya vuhosi, a huma kukota nhenha leyi yaka eku hluleni.

³ Loko Xinyimpfana xi lemurile xilemo xa vumbirhi, ndzi twa xivumbiwa lexi hanyaka xa vumbirhi xi ku: “Tana!”

⁴ Kutani hanci yin'wana yi huma; a yi ri yo tshwuka; mugadi wa yona a a nyikiwile matimba yo pfuxa tinyimpi emisaveni, leswaku vanhu va dlayana; a a nyikiwile ni tlhari lerikulu.

⁵ Loko Xinyimpfana xi lemurile xilemo xa vunharhu, ndzi twa xivumbiwa lexi hanyaka xa vunharhu xi ku: “Tana!” Ndzi languta, kutani ndzi vona hanci ya ntima. Mugadi wa yona a a tamele xikalu xa ku pima evokweni ra yena.

⁶ Kutani ndzi twa swo fana ni rito leri humaka eka swivumbiwa leswi hanyaka swa mune, ri ku: “Hakelo ya siku hinkwaro yi ta xava xirhundzunyana ntsena xa mavele, kumbe swinharhu ntsena swa maxalana. Kambe u nga onhi mafurha ni vhinyo.”

⁷ Loko Xinyimpfana xi lemurile xilemo xa vumune, ndzi twa xivumbiwa lexi hanyaka xa vumune xi ku: “Tana!”

⁸ Ndzi languta, kutani ndzi vona hanci yo kwalala. Mugadi wa yona a a vuriwa “Rifu”, ni loyi va nge i “Tihele” a a n'wi landzelela. A va nyikiwile matimba ehenhla ka swa xiphemu xin'we xa mune xa misava, ku swi dlaya hi tlhari ni dyandza ni ntungu ni swiharhi swa nhova.

⁹ Loko Xinyimpfana xi lemurile xilemo xa vuntlhanu, ndzi vona ehansi ka alitari mimoya ya lava a va dlayiwile hi mhaka ya ku twarisa Rito ra Xikwembu ni hikwalaho ka ku humesa vumbhoni bya vona.

¹⁰ A va huwelela hi rito leri tlakukeke va ku: “We Hosi ya matimba hinkwawo, wena wo kwetsima, wa ntiyiso, swa ha ta teka nkarhi muni ku fikela loko u ta avanyisa vaaki va misava ni ku va ba, leswi va hi dlayeke?”

¹¹ Kutani un'wana ni un'wana wa vona a nyikiwa nguvu yo leha leyo basa; va byeriwa ku ya emahlweni ni ku wisa nkarhinyana kambe, ku ko ku hetiseka ntsengo wa malandza-kulobye ni wa vamakwavo, lava va nga ta dlawa ku fana na vona.

¹² Kutani ndzi languta loko Xinyimpfana xi lemula xilemo xa vu-6. Ku va ni ku tsekatseka lokukulu ka misava; dyambu ri endla ntima, ri fana ni nguvu yo khwaxa ya ntima. N'weti hinkwawo wu hundzuka lowo tshwuka ku fana ni ngati.

¹³ Tinyeleti ti wa hi le mpfhukeni, ti wela emisaveni ti fana ni makuwa lamambisi loko ya dzudziwa hi moya wa matimba lowu ninginisaka nkuwa wa kona.

¹⁴ Tilo ri nyamalala ku fana ni dzovo loko ri songiwile. Ntshava yin'wana ni yin'wana ni xihlale xin'wana ni xin'wana swi rhurhisiwa etindhawini ta swona.

¹⁵ Hiloko tihosi ta misava ni tindhuna ni vafambisi va tinyimpi ni swifumi ni vanhu va matimba, ni lavan'wana hinkwavo, mahlonga kumbe vantshunxeki, va titumbeta emabakweni ni le hansi ka maribye etintshaveni.

¹⁶ Va vitana tintshava ni maribye va ku: “Hi weleni ehenhla, mi hi funengeta leswaku loyi a tshameke exiluvelweni a ta kala a nga hi voni, ni vukari bya Xinyimpfana byi ta kala byi nga hi fikeli.

¹⁷ Hikuva siku lerikulu ra vukari bya vona ri fikile, kutani i mani loyi a nga ri tiyelaka xana?”