Nhlavutelo 16 - BIBELE Mahungu Lamanene

Ta minkambana ya vukari bya Xikwembu

¹ Kutani ndzi twa rito leri tlakukeke ri huma eTempeleni, ri ku ka tintsumi leti ta 7: “Yanani, mi ya chululela emisaveni swa minkambana ya 7 ya vukari bya Xikwembu.”

² Ntsumi leyo rhanga yi ya chululela swa nkambana wa yona emisaveni. Kutani vanhu lava nga ni mfungho wa xivandzana, va nga lava gandzelaka xifaniso xa xona, va huma swilondza leswo nyenyetsa, swo vava.

³ Ntsumi ya vumbirhi yi chululela swa nkambana wa yona elwandle, kutani ri hundzuka ri fana ni ngati ya munhu loyi a feke; kutani hinkwaswo leswi hanyaka elwandle swi fa.

⁴ Ntsumi ya vunharhu yi chululela swa nkambana wa yona emilambyeni ni le swihlobyeni swa mati, kutani swi hundzuka ngati.

⁵ Hiloko ndzi twa ntsumi leyi nga ni matimba ehenhla ka swa mati yi ku: “U lulamile eku avanyiseni ka wena, wena la kwetsimeke, wena loyi a nga kona, loyi a a ri kona.

⁶ Hikuva vanhu va halatile ngati ya vahlawuriwa va wena ni ya vaprofeta, kutani u va nyikile ngati va nwa. I hakelo ya vona.”

⁷ Kutani ndzi twa rito ri huma hi le alitarini ri ku: “Ina, we Hosi Xikwembu xa matimba hinkwawo, ku avanyisa ka wena ka tshembeka, ku lulamile.”

⁸ Ntsumi ya vumune yi chululela swa nkambana wa yona edyambyini, kutani ri pfumeleriwa ku vavula vanhu hi ndzilo.

⁹ Vanhu va tshwa hi ku hisa loku chavisaka loku, kutani va rhuketela vito ra Xikwembu lexi nga ni matimba ehenhla ka mintungu leyi, kambe a va hundzukanga, ni ku xi dzunisa a va xi dzunisanga.

¹⁰ Ntsumi ya vuntlhanu yi chululela swa nkambana wa yona exiluvelweni xa xivandzana; hiloko mfumo wa xona wu funengetiwa hi munyama, vanhu va tiluma tindzimi hi ku twa ku vaviseka;

¹¹ va rhuketela Xikwembu xa le matilweni, hi mhaka ya ku twa ku vava ni ku xanisiwa hi swilondza, kambe a va hundzukanga emintirhweni ya vona.

¹² Ntsumi ya vu-6 yi chululela swa nkambana wa yona enambyeni lowukulu wa Yufrata, kutani mati ya wona ma phya leswaku ndlela ya tihosi leti taka hi le vuxeni yi pfuleka.

¹³ Hiloko ndzi vona mimoya minharhu leyo nyenyetsa ku fana ni machela, yi huma hi le non'weni wa dragona, ni le non'weni wa xivandzana, ni le non'weni wa muprofeta wa mavunwa;

¹⁴ leyi i mimoya ya mademona leyi endlaka masingita, leyi rhendzelekaka hi tihosi ta misava hinkwayo, yi ti rhamba nyimpi, ku ya lwa ni Xikwembu xa matimba hinkwawo hi siku lerikulu ra kona.

¹⁵ (“Languta, ndza ta ku fana ni khamba. Ku katekile loyi a hitekaka, la hlayisaka tinguvu ta yena, leswaku a ta ka a nga fambisi miri ntsena erivaleni, vanhu va n'wi vona!”)

¹⁶ Kutani mimoya yi hlengeleta tihosi endhawini leyi va nge i Armagedoni hi ririmi ra Xiheveru.

¹⁷ Ntsumi ya vu-7 yi chululela swa nkambana wa yona empfhukeni, kutani ku twala rito lero tlakuka, ri huma hi le xiluvelweni, eTempeleni, ri ku: “Swi endlekile!”

¹⁸ Kutani ku va ni ku hatima-hatima, ni ku pfuma, ni ku baleka ka tilo, ni ku tsekatseka lokukulu ka misava, loku tlulaka ku tsekatseka ka misava ka minkarhi yin'wana hinkwayo: Hi mpfhuka xa loko vanhu va va laha misaveni, a ku vanga na ku tsekatseka loko tano.

¹⁹ Muti lowukulu wu handzuka wu huma swivandla swinharhu, kutani miti ya vamatiko yi hindzimuka. Xikwembu xi tsundzuka Babilona, muti lowukulu, ku wu nwisa xinwelo xa vhinyo ya vukari lebyikulu bya xona, wu minya.

²⁰ Xihlale xin'wana ni xin'wana xi nyamalala, ni tintshava ti nga ha ri kona.

²¹ Xihangu lexikulu xa maribye yo tika ngopfu, xi wela vanhu hi le tilweni, va ko va rhuketela Xikwembu hi mhaka ya ntungu wa xihangu. Ntungu wa kona a wu chavisa ngopfu.