Nhlavutelo 11 - BIBELE Mahungu Lamanene

Ta timbhoni letimbirhi

¹ Kutani ndzi nyikiwa rihlanga ro pima ha rona, ro kota xongotelo, ndzi byeriwa marito lawa ya nge: “Pfuka u pima Tempele ya Xikwembu ni alitari ni ntsengo wa lava gandzelaka kona.

² Kambe u nga pimi xivava xa Tempele xa le handle, xi tshike, hikuva xi nyiketiwile eka vamatiko, kutani va ta kandziyela muti lowo hlawuleka ku ringana tin'hweti ta 42.

³ Ndzi ta nyika timbhoni ta mina timbirhi ematimba yo vula Rito hi masiku lawa ya 1 260, ti ambele tinguvu leto khwaxa.”

⁴ Timbhoni leti timbirhi i mirhi mimbirhi ya mitlhwari ni switlhoma-timboni swimbirhi, leswi yimaka emahlweni ka Hosi ya misava.

⁵ Loko munhu a ringeta ku va vavisa, ku huma ndzilo hi le milon'weni ya vona, wu herisa valala va vona; hi mukhuva wolowo munhu wihi na wihi loyi a nga ta ringeta ku va vavisa, u ta fanela ku dlawa.

⁶ Va ni matimba yo pfala tilo leswaku mpfula yi nga ni, loko va ri karhi va vula Rito. Naswona va ni matimba yo hundzula mati hinkwawo ma endla ngati; va nyikiwile ni matimba ya ku ba misava hi mintungu ya tinxaka-xaka, nkarhi wihi na wihi loko va swi lava.

⁷ Loko va heta ku vula vumbhoni bya vona, xivandzana lexi humaka hi le kheleni lero enta ku ya ni ku ya, xi lwa na vona. Xi va hlula, xi va dlaya.

⁸ Kutani mintsumbu ya vona yi etlela entsendzeleni wa muti lowukulu, lowu Hosi ya vona yi tshamaka yi vambiwa exihambanweni eka wona, lowu va nge hi le Sodoma na Egipta loko va fanisa.

⁹ Swi teka masiku manharhu ni hafu mintsumbu leyi yi ri karhi yi hlaleriwa hi vanhu va swivongo leswo tala, va tinxaka ni tindzimi leto tala, lava humaka ematikweni layo tala, kutani va nga pfumeri leswaku mintsumbu leyi yi lahliwa esirheni.

¹⁰ Lava akeke emisaveni va tsaka hi ku dlawa ka vona, va cina, va nyikana ni tinyiko, hikuva vaprofeta lava vambirhi a va vangela vaaki va misava emaxangu.

¹¹ Kambe endzhaku ka masiku lawa manharhu ni hafu, ku hefemula ka vutomi loku humaka eka Xikwembu, ku nghena eka vona, kutani va suka va yima hi milenge ya vona. Hinkwavo lava va va vonaka va khomiwa hi ku chava lokukulu.

¹² Kutani va twa rito leri tlakukeke ri huma etilweni ri va byela ri ku: “Tlhandlukani mi ta haleno!” Hiloko va tlhandlukela etilweni hi papa, valala va vona va ri karhi va va vona.

¹³ Hi nkarhi wolowo ku va ni ku tsekatseka lokukulu ka misava, kutani xiphemu xin'we xa khume xa muti xi hindzimuka, ku fa vanhu va 7 000 va dlawa hi ku tsekatseka loku. Lava saleke va khomiwa hi ku chava lokukulu, kutani va dzunisa Xikwembu xa le tilweni.

¹⁴ Ku hundzile khombo ra vumbirhi. Kambe vonani, ra vunharhu ri ta ta ku nga ri khale.

Ta nanga ya vu-7

¹⁵ Hiloko ntsumi ya vu-7 yi chaya nanga ya yona, kutani ku twakala ni marito lama huwelelaka hi le tilweni ma ku: “Matimba ya ku fuma misava, sweswi ma nyikiwile Hosi ya hina ni Mesiya wa yona, kutani ú ta fuma hilaha ku nga heriki.”

¹⁶ Kutani vakulukumba va 24 lava va tshamaka eswiluvelweni swa vona emahlweni ka Xikwembu, va nkhinsama va korhama, va gandzela Xikwembu,

¹⁷ va ku: “We Hosi, Xikwembu xa matimba hinkwawo, wena loyi a nga kona, loyi a a ri kona, ha ku nkhensa, hikuva u tirhisile matimba lamakulu ya wena, kutani sweswi u sungurile ku fuma.

¹⁸ Vanhu va matiko a va tele ku hlundzuka, kambe siku ra vukari bya wena ri fikile; i nkarhi wa ku avanyisa lava feke. I nkarhi wa ku nyika hakelo eka vaprofeta malandza ya wena, ni ka vahlawuriwa va wena hinkwawo, ni ka hinkwavo lava va ku chavaka, lavakulu ni lavatsongo. I nkarhi wa ku herisa lava herisaka misava.”

¹⁹ Hiloko ku pfuriwa Tempele ya Xikwembu leyi nge tilweni, kutani Areka ya Ntwanano yi vonaka eTempeleni leyi ya xona. Kutani ku va ni ku hatima-hatima, ni ku pfuma, ni ku baleka ka tilo; misava yi tsekatseka, ku wa ni xihangu lexikulu.