Nehemiya 9 - BIBELE Mahungu Lamanene

Vaisraele va khongela, va titsona ni swakudya

¹ Hi siku ra 24 ra n'hweti ya vu-7, Vaisraele va hlengeletana, va khongela va titsona ni swakudya; a va ambarile swiambalo leswo khwaxa, va ticheleterile ni misava etinhlokweni.

² Vaisraele va tihambanisa ni vanhu va matiko mambe kutani va yima va tisola hikwalaho ka swidyoho swa vona ni swa vatata wa vona.

³ Loko va ha yimile etindhawini ta vona, va hlayeriwa buku ya Nawu wa Xikwembu xa vona ku ringana tiawara tinharhu, kutani tiawara tin'wana tinharhu leti landzelaka va tisola swidyoho swa vona, va khongela HOSI Xikwembu xa vona.

⁴ A ku ri ni mapulangi lawa a ma beleriwile leswaku Valevhi va ta yima eka wona. Ehenhla ka wona a ku ri na Yexuwa, na Bani, na Kadimiele, na Xebaniya, na Buni, na Xerebiya, na Bani, na Kenani. Valevhi lava a va khongela HOSI Xikwembu xa vona hi rito leri tlakukeke.

⁵ Kutani Yexuwa, na Kadimiele, na Bani, na Haxabiniya, na Xerebiya, na Hodiya, na Xebaniya, na Petahiya, va ku: “Yimani mi dzunisa HOSI Xikwembu xa n'wina; xi dzuniseni hilaha ku nga heriki! Dzunisani vito ra xona leri dzunekaka, rona leri tlulaka swilo hinkwaswo leswi dzunisiwaka ni ku twarisiwa!”

Xikhongelo xa ku tisola

⁶ Kutani Vaisraele va khongela va ku: “Wena HOSI, u Xikwembu u ri wexe! Hi wena u endleke matilo hinkwawo ni hinkwaswo leswi swi nga ka wona; u endlile ni misava ni leswi nga ka yona hinkwaswo, u endla ni malwandle ni hinkwaswo leswi nga ka wona. Swilo leswi hinkwaswo swi hlayisiwa hi wena; ni swivumbiwa swa le tilweni swi gandzela wena!

⁷ Hi wena u nga HOSI; u Xikwembu lexi hlawuleke Abrahama, u n'wi susa le Uru wa Vakalediya, kutani u n'wi thya vito ra Abrahama.

⁸ U vonile Abrahama a ri munhu la tshembekeke emahlweni ka wena, kutani u endla ntwanano na yena leswaku u ta nyika vatukulu va yena tiko ra Vakanana, ni Vahiti, ni Vaamori, ni Vaperesi, ni Vayebusi, ni Vagirigaxi. Xitshembiso xa wena, u xi hetisisile hikuva u lulamile.

⁹ “U vonile ku xaniseka ka vatata wa hina etikweni ra Egipta, u tlhela u twa xirilo xa vona le Lwandle-ro-Tshwuka.

¹⁰ U endlile swikombiso ni swihlamariso, u ba Faro ni malandza ya yena hinkwawo ni vanhu va tiko ra yena hinkwavo, hikuva a wu swi tiva leswaku va vile ni tihanyi eka vatata wa hina. Hikokwalaho, ku sukela enkarhini wolowo ku ta fika sweswi, vito ra wena ra tiveka swinene.

¹¹ U endlile leswaku mati ya lwandle ma avana hi le xikarhi, kutani va tsemakanya hi laha ku omeke. Lava a va va hlongorisa u va hoxile exidziveni lexo enta va wela ku fana ni ribye leri hoxiweke emagandlatini.

¹² Ninhlekanhi, u va rhangerile hi ku nembeleta papa emahlweni ka vona; nivusiku u va rhangerile hi ku nembeleta ndzilo lowu pfurhaka wu va voningela ndlela leyi va faneleke ku famba ha yona.

¹³ U xikerile ehenhla ka ntshava ya Sinayi, kutani u vulavula ni Vaisraele u ri etilweni, u va nyika switsundzuxo leswinene, ni milawu ya ntiyiso, ni swileriso ni swiletelo leswo lulama.

¹⁴ U va tivisile ni siku ra wena lero hlawuleka ra Savata, u va nyika swiletelo ni swileriso ni milawu hi nomu wa nandza wa wena Muxe.

¹⁵ U va nyikile swakudya leswi humaka etilweni leswaku va susa ndlala; u va nyikile ni mati lama humaka eribyeni leswaku va tima torha. U va lerisile leswaku va nghena va teka tiko leri u hlambanyeke leswaku u ta va nyika rona ri va ra vona.

¹⁶ “Hambiswiritano, vatata wa hina va tikurisile, va tinonon'hwisa, va nga yingisi milawu ya wena.

¹⁷ Va arile ku ku yingisa, va nga tsundzuki swihlamariso leswi u swi endleke exikarhi ka vona; va tinonon'hwisile, va tihlawulela munhu loyi a nga ta va rhangela leswaku va tlhelela evuhlongeni etikweni ra Egipta. Hambiswiritano, wena Xikwembu lexi tshamaka xi tiyimisele ku rivalela, a wu va tshikanga, hikuva u tele ku tsetselela ni ku twela vusiwana; u hlwela ku kariha, naswona u tele tintswalo.

¹⁸ Vanhu lava, va ku rhuketerile swinene hi ku tivumbela xifaniso xa rhole, kutani va ku: ‘Hi lexi Xikwembu xa n'wina lexi xi mi humeseke etikweni ra Egipta!’

¹⁹ Hambiswiritano wena a wu va tshikanga emananga, hikuva u tele ku twela vusiwana; papa leri a ri nembelela ninhlekanhi ri va komba ndlela a ri sukanga emahlweni ka vona, hambi wu ri ndzilo lowu a wu pfurha nivusiku wu va voningela ndlela leyi a va fanele ku famba ha yona, a wu sukanga.

²⁰ U va nyikile Moya wa wena lowunene wu va letela; u va phamerile manna, va dya, u va nyikile ni mati va tima torha.

²¹ U va hlayisile malembe ya 40 emananga, va nga pfumali nchumu, swiambalo swa vona a swi hlakalanga, hambi yi ri milenge ya vona a yi pfimbanga.

²² “U va nyikile matiko ni vanhu va wona, kutani va ma teka ha rin'we-rin'we ma va ya vona; va teka ni tiko ra Sihoni hosi ya Hexiboni ni tiko ra Ogo hosi ya Baxani.

²³ Vatukulu va vona u va andzisile va tala ku kota tinyeleti, kutani u va tisa etikweni leri u tshembiseke vatata wa vona leswaku va ta nghena va ri teka ri va ra vona.

²⁴ Kutani vatukulu va vona va nghenile va teka tiko leri ri va ra vona; wena u va hlulerile Vakanana, vona vaaki va tiko, u va nyiketa emavokweni ya Vaisraele, u nyiketa ni tihosi ta Vakanana ni vanhu lava tshamaka etikweni rero leswaku Vaisraele va ta endla leswi va swi tsakelaka ha vona.

²⁵ Va tekile miti leyi biyeleriweke hi rirhangu yi va ya vona, va teka ni tiko lero saseka, ni tindlu leti teleke hi swilo hinkwaswo leswinene; va teka ni swihlovo leswi kovotliweke emaribyeni, ni masimu ya vhinya, ni mintanga ya mirhi ya mitlhwari, ni ya mirhi ya mihandzu ya tinxaka-xaka. Kutani va dya va xurha, va nyuhela; va tiphinile hikwalaho ka tintswalo ta wena letikulu.

²⁶ “Hambiswiritano, va arile ku ku yingisa, va ku hundzukela, va fularhela ni Nawu wa wena, va dlaya ni vaprofeta va wena lava a va va tsundzuxa ku tlhelela eka wena; va tlhela va ku rhuketela swinene.

²⁷ Kutani wena u va nyiketile emavokweni ya valala va vona va va xanisa. Loko va ri eku xanisekeni, va huwelerile eka wena, kutani wena u twile xirilo xa vona u ri etilweni. Hikwalaho ka tintswalo ta wena letikulu u va rhumerile valamuleri, va va ponisa emavokweni ya valala va vona.

²⁸ Kambe endzhaku ka loko u va wisisile ku xaniseka, va tlhele va ku dyohela, kutani u va nyiketa kambe emavokweni ya valala va vona leswaku va va fuma. Hambiswiritano loko va hundzukele eka wena va tisola, u yingisile swirilo swa vona u ri etilweni; eka minkarhi leyo tala u va ponisile hikwalaho ka tintswalo ta wena.

²⁹ U va tsundzuxile leswaku va tlhelela eNawini wa wena, kambe vona va tikurisile, va ala ku yingisa milawu ya wena, va ku dyohela hi ku tlula swiletelo swa wena leswi loko munhu a swi hlayisa a kumaka vutomi; va ku fularherile, va tinonon'hwisa, va ala ku ku yingisa.

³⁰ Emalembeni lawa yo tala, u va lehiserile mbilu, u va tsundzuxa hi Moya wa wena, hi milomo ya vaprofeta, kambe a va yingisanga, kutani u va nyiketa emavokweni ya vamatiko.

³¹ Hambiswiritano, hikwalaho ka tintswalo ta wena letikulu a wu va herisanga kumbe ku va tshika, hikuva u Xikwembu lexi xi nga ni tintswalo ni ku twela vusiwana.

³² “We Xikwembu xa hina, u Xikwembu lexikulu xa matimba lexi chavisekaka; u hlayisa ntwanano ni rirhandzu lero tshembeka; hikokwalaho, u nga yi endli leyitsongo, mhaka ya ku tikeriwa hinkwako loku hi veke na kona ku sukela enkarhini wa tihosi ta Asiriya ku ta fika sweswi, hina, ni tihosi ta hina, ni varhangeri va hina, ni vaprista va hina, ni vaprofeta va hina, ni vatata wa hina, ni vanhu va wena hinkwavo.

³³ Eka hinkwaswo leswi swi hi humeleleke, wena u tirhile hi ku lulama ni ku tshembeka, kambe hina hi endlile leswo homboloka.

³⁴ Tihosi ta hina, ni varhangeri va hina, ni vaprista va hina, ni vatata wa hina, a va hlayisanga nawu wa wena, hambi swi ri swileriso ni switsundzuxo swa wena leswi u va nyikeke swona, a va swi yingisanga.

³⁵ A va ku tirhelanga hambi ku ri enkarhini lowu a va fumiwa hi tihosi ta vona, ni loko u va kombisile tintswalo letikulu etikweni lerikulu ro saseka leri u va nyikeke rona; naswona, a va hundzukanga emintirhweni ya vona leyo homboloka.

³⁶ Languta, namuntlha hi mahlonga; hi mahlonga etikweni leri u ri nyikeke vatata wa hina leswaku va tiphina hi mihandzu ya rona ni hinkwaswo leswinene leswi humaka eka rona.

³⁷ Mihandzu ya tiko leri yi tekiwa hi tihosi leti u ti vekeke leswaku ti hi fuma hikwalaho ka swidyoho swa hina. Tihosi leti, ti ni matimba ni le henhla ka hina ni swifuwo swa hina, ti endla hi ku rhandza, kutani hina hi le khombyeni lerikulu.

Vaisraele va tiboha ku tirhela Xikwembu

³⁸ “Hikokwalaho ka swilo leswi hinkwaswo, hina Vaisraele hi endla ntwanano lowu hi wu tsalaka kunene; varhangeri va hina, ni Valevhi, ni vaprista va hina va wu tiyisa hi ku fungha.