Nehemiya 4 - BIBELE Mahungu Lamanene

Ku hluleka ka lava a va ringeta ku kavanyeta ntirho wo aka rirhangu

¹ Sanibalati ú hlundzukile ngopfu loko a twa leswaku hi le ku akeni ka rirhangu; mhaka leyi yi n'wi vavise ngopfu, kutani a sungula ku hlekula Vayuda,

² a vulavula ni vamakwavo ni mavuthu ya le Samariya a ku: “Xana vambuyangwana lava va Vayuda va endla yini xana? Xana va lava ku tlhela va pfuxa muti lowu xana? Xana leswi va humesaka magandzelo, va ri va nga heta ntirho hi siku rin'we xana? Xana va ri ku nga huma maribye yo aka ha wona etinhulwini leti ta thyaka ra leswi tshweke xana?”

³ Tobiya lowa Muamoni a a yimile kwala kusuhi na Sanibalati, kutani na yena a ku: “Xilo lexi va xi akaka, xexi va nge i rirhangu, loko mhungubye yo khandziya ehenhla ka xona, xi ta hirimuka xi wela hansi!”

⁴ Kutani ndzi khongela ndzi ku: “We Xikwembu xa hina, twana leswi hi hlekurisiwaka xiswona! Endla leswaku leswi va hi endlaka swona swi tlhelela eka vona; a va khomiwe va yisiwa etikweni rin'wana, va tekeriwa ni swilo swa vona hinkwaswo.

⁵ U nga va rivaleli milandzu, ni swidyoho swa vona u nga swi rivali, hikuva va ku pfukile emahlweni ka lava va nga ntirhweni wo aka.”

⁶ Kutani hi aka rirhangu hi ri hlanganisa; enkarhini lowu a hi akile hafu ya rona ku ya henhla, hikuva vanhu lava tirhaka a va tinyiketile swinene.

⁷ Sanibalati na Tobiya, swin'we ni Maarabu ni Vaamoni ni va le Axidodo, swi va karhatile ngopfu ku twa leswaku ntirho wo pfuxa rirhangu ra muti wa Yerusalema wu ya emahlweni, ni leswaku ra karhi ra hlanganisiwa.

⁸ Vanhu lava hinkwavo, va hlangana, va endla makungu yo hlasela muti wa Yerusalema, ni ku pfuxa mpfilumpfilu.

⁹ Kutani hi khongela Xikwembu xa hina, hi veka vanhu va rindza vusiku ni nhlekanhi leswaku valala va hina va nga hi hlaseli.

¹⁰ Vavanuna va ka Yuda a va ku: “Vatirhi a va ha ri na matimba, kasi marhumbi ma ha tele ngopfu. Hi nga ka hi nga koti ku yisa emahlweni ntirho wo aka rirhangu.”

¹¹ Valala va hina vona a va ku: “Vanhu lava, va nge tivi nchumu, ni ku hi vona va nge hi voni ku kondza hi ya nghena exikarhi ka vona hi va dlayetela, kutani hi ndlela leyi hi ta yimisa ntirho wo aka.”

¹² Vayuda lava a va tshama exikarhi ka valala va hina, a va hamba va ta hi byela va ku: “Valala va hina va ta suka etindhawini hinkwato leti va tshamaka ka tona va ta va ta hi hlasela.”

¹³ Kutani ndzi veka vanhu endzeni ka rirhangu, va tshama hi tinyimba ta vona lomu rirhangu ri nga si akiwaka ri ya henhla, va khoma mafumu, ni matlhari ni vurha.

¹⁴ Loko ndzi vona leswaku va chava, ndzi suka ndzi yima ndzi byela varhangeri, ni tindhuna ni vanhu hinkwavo ndzi ku: “Valala va hina, mi nga va chavi; tsundzukani leswaku HOSI Xikwembu xa hina i xikulu, naswona xa chaviseka! Kutani, lwelani vamakwenu, ni vana va n'wina va xinuna ni va xisati, ni vasati va n'wina ni miti ya n'wina.”

¹⁵ Valala va hina, va swi twile leswaku makungu ya vona ha ma tiva, ni leswaku Xikwembu xi ma onhile. Kutani hina hi tlhelela erirhangwini, un'wana ni un'wana a ya tirha ntirho wa yena.

¹⁶ Ku sukela siku rero, hafu yin'wana ya malandza ya mina a ma tirha ku aka, lava hafu leyin'wana va yima va khoma matlhari, ni switlhangu, ni vurha, va ambale swiambalo swo tisirhelela ha swona; varhangeri vona a va fambisa Vayuda hinkwavo

¹⁷ lava a va ri ntirhweni wo aka rirhangu. Vatirhi lava pfunaka vaaki a va tirha hi voko rin'we, lerin'wana ri khoma tlhari.

¹⁸ Muaki un'wana ni un'wana a a aka a khweketile fumu enyongeni. Munhu loyi a baka mhalamhala, a a ri kwala kusuhi na mina.

¹⁹ Kutani ndzi vulavula ni varhangeri ni tindhuna ni vanhu hinkwavo, ndzi ku: “Ntirho wo aka i wukulu, naswona wu lava leswaku hi aka hi hangalakile, hi va kule ni le kule.

²⁰ Loko mi twa mhalamhala yi ba, yanani mi ya hlengeletana laha yi twalaka kona, kutani Xikwembu xa hina xi ta hi lwela.”

²¹ Hi tirhile hi ndlela leyi; hafu yin'wana ya vanhu a yi khoma matlhari ku sukela hi vurhonga ku kondza byi ya va vusiku.

²² Enkarhini wolowo, ndzi tlhele ndzi byela vanhu ndzi ku: “Vanhu hinkwavo ni malandza ya vona va nga suki eYerusalema, leswaku va ta hi pfuna ku rindza ni vusiku, ni leswaku ni nhlekanhi hi ta kota ku aka.”

²³ Mina, ni vamakwerhu, ni malandza ya mina, ni varindzi lava ndzi landzeke, a hi nga hluvuli swiambalo; un'wana na un'wana a a tshama a khomile tlhari ra yena.