Nehemiya 11 - BIBELE Mahungu Lamanene

Vanhu lava akeke eYerusalema

¹ Emutini wa Yerusalema a ku tshama varhangeri; kutani ntshungu wu hoxa vuhlolotwana leswaku exikarhi ka mindyangu yin'wana na yin'wana ya khume, ku hlawuriwa ndyangu wun'we wu ya tshama emutini lowo hlawuleka wa Yerusalema, kasi mindyangu leyi salaka ya 9 yona yi tshama emitini yin'wana.

² Kutani ntshungu wu dzunisa vanhu hinkwavo lava tinyiketeke ku ya tshama eYerusalema.

³ EYerusalema a ku akile varhangeri va xifundzha, kasi emitini ya Yuda a ku tshama Vaisraele, ni vaprista, ni Valevhi, ni vatirhi va le Tempeleni, ni lava nga ntlaweni wa malandza ya Solomoni; un'wana na un'wana a a tshama endhawini ya yena.

⁴ Van'wana va ka Yuda ni va ka Benjamini a va tshama eYerusalema; eka va ka Yuda a ku ri na Ataya n'wana Uziya, wa Zakariya, wa Amariya, wa Xefatiya, wa Mehalele, wa Perese;

⁵ na Maaseya n'wana Baruku, wa Kolo-Hoze, wa Hazaya, wa Adaya, wa Yoyaribi, wa Zakariya, wa Xela.

⁶ Hinkwavo va ka Perese lava akeke eYerusalema a ti ri tinhenha ta 468.

⁷ Eka va ka Benjamini eYerusalema a ku ri na Salu n'wana Mexulama, wa Yowede, wa Pedaya, wa Kolaya, wa Maaseya, wa Itiele, wa Yexaya.

⁸ Ehandle ka Salu, a ku ri na Gabayi na Salayi, kutani va ka Benjamini hinkwavo va va 928.

⁹ Murhangeri wa va ka Benjamini a a ri Yuwele n'wana Zikri, a pfuniwa hi Yuda n'wana Hasenuwa.

¹⁰ Eka vaprista lava a va tshama eYerusalema a ku ri na Yedaya n'wana Yoyaribi, na Yakini,

¹¹ na Seraya n'wana Hilkiya wa Mexulama, wa Sadoki, wa Merayoto, wa Ahituba, yena mulanguteri wa yindlu ya Xikwembu,

¹² ni van'wana va ka vona lava a va tirha endlwini ya Xikwembu, kutani hinkwavo va va 822. Naswona a ku ri na Adaya n'wana Yerobama wa Pelaliya, wa Amisi, wa Zakariya, wa Paxahuru, wa Malakiya,

¹³ ni van'wana va ka vona lava a va ri tinhloko ta mindyangu, kutani hinkwavo va va 242. Nakambe a ku ri na Amaxayi n'wana Azarele wa Ahazayi, wa Mexilemoto, wa Imere,

¹⁴ ni van'wana va ka vona lava a va ri tinhenha ta matimba, kutani hinkwavo va va 128. Mulanguteri wa vona a a ri Zabadiele n'wana Hagedolimi.

¹⁵ Eka Valevhi lava a va tshama eYerusalema a ku ri na Xemaya n'wana Haxuba wa Azirikama, wa Haxabiya, wa Buni;

¹⁶ na Xabetayi, na Yozabadi, un'wana wa varhangeri va Valevhi; vona a va langutela ntirho wa le handle ka yindlu ya Xikwembu.

¹⁷ Naswona a ku ri na Mataniya n'wana Mika wa Zabidi, wa Asafu yena murhangeri loyi a sunguleke xikhongelo xa minkhenso, na Bakibukiya loyi a a ri museketeri wa murhangeri wa va ka vona, na Abida n'wana Xamuwa wa Galala, wa Yedutuni.

¹⁸ Valevhi hinkwavo lava a va tshama emutini lowo hlawuleka wa Yerusalema a va ri 284.

¹⁹ Varindzi va le tinyangweni a ku ri Akubu na Talimoni ni vamakwavo, hinkwavo a va ri 172.

²⁰ Vaisraele lavan'wana hinkwavo, ni vaprista, ni Valevhi lava saleke a va tshama emitini ya le Yuda, un'wana ni un'wana a tshama endhawini ya yena.

²¹ Vatirhi va le Tempeleni vona a va tshama exivandleni lexi vuriwaka Ofele; valanguteri va vona a a ri Siha na Gixipa.

²² Mulanguteri wa Valevhi lava a va tshama eYerusalema a a ri Usi n'wana Bani wa Haxabiya, wa Mataniya, wa Mika, un'wana wa va ka Asafa lava a va yimbelela ni ku langutela ntirho wa le ndlwini ya Xikwembu.

²³ Hosi ya tiko a yi vekile nawu hi tlhelo ra vayimbeleri, kutani a va boheka ku yimbelela siku rin'wana na rin'wana.

²⁴ Xandla xa hosi etimhakeni hinkwato leti khumbaka vanhu a a ri Petahiya n'wana Mexezabele un'wana wa va ka Zera, n'wana Yuda.

Vanhu lava akeke emitini yin'wana

²⁵ Vanhu van'wana a va tshama emitini ya vona leyi nga ni masimu. Hi tlhelo ra va ka Yuda, van'wana a va tshama emutini wa Kiriyata-Araba ni le swimitaneni swa vona, ni le mutini wa Diboni ni le swimitaneni swa wona, ni le mutini wa Yekabiele ni le swimitaneni swa wona,

²⁶ ni le mutini wa Yexuwa, ni wa Molada, ni wa Beta-Pelete,

²⁷ ni wa Hasari-Xuwala, ni le mutini wa Berexeba ni le swimitaneni swa wona,

²⁸ ni le mutini wa Sikilaga, ni le mutini wa Mekona ni le swimitaneni swa wona,

²⁹ ni le mutini wa Eni-Rimoni, ni wa Sora, ni wa Yaramutu,

³⁰ ni wa Zanowaka, ni wa Adulama, ni le swimitaneni swa yona, ni le mutini wa Lakixi ni le tindhawini leti nga kusuhi na wona, ni le mutini wa Azeka ni le swimitaneni swa wona. Va ka Yuda a va tshama endhawini leyi sukelaka eBerexeba ku ya fika eka Nkova wa Hinomu.

³¹ Va ka Benjamini vona a va tshama emutini wa Geba, ni wa Mikamasa, ni wa Ayi, ni le mutini wa Betele ni le swimitaneni swa wona,

³² ni le mutini wa Anatoto, ni wa Nobo, ni wa Ananiya,

³³ ni wa Hasoro, ni wa Rhama, ni wa Gitayimi,

³⁴ ni wa Hadidi, ni wa Seboyimi, ni wa Nebalata,

³⁵ ni wa Lodo, ni wa Ono, ni le ka Nkova wa Vavatli.

³⁶ Valevhi van'wana va le Yuda va akisiwile swin'we ni va ka Benjamini.