Nahume 3 - BIBELE Mahungu Lamanene

Ku dyoha ka Ninivha ku n'wi lovisile

¹ U ni khombo, wena muti wa ngati lowu taleke hi mavunwa, wena la taleke hi leswi phanghiweke, wena la nga tshikiki ku phangha.

² Twana ku buluka ka ximoko ni vuntswikiri-ntswikiri bya mavhilwa! Tihanci a hi rivilo ra tona, ni makalichi, mo gèdlè-gèdlè!

³ Vagadi va tihanci va tsutsumela eku hlaseleni, va vangamisa mafumu, va hatimisa ni matlhari. Lava tlhaviweke i ntsandza-vahlayi; mintsumbu yo khatakanyana kunene, yi lo n'wálálálá, erivaleni, va khuguriwa hi yona!

⁴ Leswi swi vanga hi vunghwavava lebyikulu bya Ninivha, wansati loyi wo koka mahlo, mungoma wa xiviri loyi a a phasa vamatiko hi vunghwavava bya yena, ni tinxaka ta vanhu hi vungoma bya yena.

⁵ HOSI ya matimba hinkwawo yi ri: “Yingisa we Ninivha, ndza ku pfukela. Ndzi ta ku hluvula swiambalo swa wena hinkwaswo, ndzi komba vuhava bya wena eka vamatiko, ni tingana ta wena eka mimfumo.

⁶ Ndzi ta ku haxa hi thyaka, ndzi ku tsongahata ngopfu, ndzi endla xikombiso ha wena.

⁷ Hinkwavo lava nga ta ku hlalela, va ta khomiwa hi ku chava, va ku fularhela, va ku: ‘Muti wa Ninivha wu herisiwile!’ Xana wu ta rila hi mani xana? Xana vachaveleri va wona ndzi ta va lava kwihi xana?”

⁸ We Ninivha, xana u tlula muti wa Teba lowu a wu akiwile kusuhi ni nambu wa Nilo xana? A wu rhendzeriwile hi mati, lwandle a ri endla xisirhelelo emahlweni ka wona, ni mati a ma ri rirhangu ra wona.

⁹ Matiko ya Etiyopiya na Egipta, a ma seketela wona hi matimba lama nga heriki, va le Putu na Valibiya a va ri vapfuni va wona.

¹⁰ Hambiswiritano, muti wa Teba wu rhurhisiwile, wu ya evukhumbini; swihlangi swa wona swi phyandlasiwile emahandzeni ya tindlela hinkwato; va pambulelana vachaviseki va wona hi ku hoxa vuhlolotwana, kutani tinganakana ta wona hinkwato ti bohiwile hi tinketani.

¹¹ Na wena Ninivha, u ta pyopyiwa, u ta tifihla, u ta lava vuchavelo byo tumbela valala eka byona.

¹² Makhokholo ya wena hinkwawo ma fana ni minkuwa leyi tswaleke matatana: Loko ma dzudziwa, ma wela emilon'weni ya vadyi.

¹³ Vona, emutini wa wena, mavuthu i vavasati ntsena. Tinyangwa ta tiko ra wena ti pfulekile swinene emahlweni ka valala va wena, timbanti ta muti wa wena ti tshwe hi ndzilo.

¹⁴ Kelela mati, u ma hlayisela siku ra ku rhendzeriwa, u pfuxeta makhokholo ya wena; nghena endzhopeni, u pfuva, u khoma foromo ya switina hi mandla mambirhi!

¹⁵ Kambe endhawini yoleyo, u ta tshwa hi ndzilo, banga ri ta ku pulukanya (ri ta ku heta kukota loko swijajani swi dya). Andza tanihi swijajani, tswala kukota tinjiya!

¹⁶ U andzisile vanhu va wena va mabindzu ku tlula tinyeleti exibakabakeni (kambe swijajani swa kona swi mirile timpapa, swi tihahela).

¹⁷ Vatirhela-mfumo va wena va fana ni swinjiyana, vamatsalani va wena va kotisa papa ra tinjiya: Hi siku ra xirhami, ti phatsama erihlampfini, kambe loko masana ma tlhava, ta haha, ni lomu ti nga kona sweswi a ku tiviwi hi munhu! Ti ya kwihi xana?

¹⁸ Varisi va wena va etlele, wee hosi ya Asiriya; tinganakana ta wena ta khudzehela! Vanhu va wena va hangalakile ni tintshava, ku nga ha ri na loyi a va hlengeletaka.

¹⁹ Makhombo ya wena a ma chaveleleki, timbanga ta wena i ntsandza-vatshunguri. Hinkwavo lava twaka ta khombo ra wena, va ba minkulungwana! Hikuva i mani xana loyi vubihi bya wena byi nga n'wi khumbangiki kambe na kambe, xana?