Nahume 2 - BIBELE Mahungu Lamanene

Rito eka va le Ninivha

¹ Va fikile, lava nga ta ku hlasela va ku fayetela. Rhalarhala, u ri ekhokholweni, u xiyaxiya tindlela. Tibohe xisuti, u tinyika matimba u tiya!

Rito ehenhla ka va le Yuda

² HOSI Xikwembu xi pfuxeta ku dzuneka ka Yakobo, xi pfuxeta ni ku dzuneka ka Israele, hikuva vaonhi va onhile swa vona, va phatlulerile marhavi ya vona.

Ta ku wa ka Ninivha

³ Switlhangu swa tinhenha ta Xikwembu swi tshwukile, masocha ya kona ma ambarile swa xivunguvungu. Loko makalichi ma ri karhi ma xaxametiwa, tinsimbhi ta wona ta vangama-vangama, matlhari ma rhurhumerisiwa.

⁴ Makalichi ma rhendzeleka-rhendzeleka emagondzweni, ma tsutsuma-tsutsuma erivaleni, ma vangama ku fana ni swisa swa ndzilo, ma hatima-hatima tanihi rihati.

⁵ Tindhuna ta nyimpi ta rhambiwa, ta khuguka loko ti famba; ti tsutsumela erirhangwini ra muti, ti endla swisirhelelo hi switlhangu.

⁶ Swipfala-nambu swi tshoviwa, tindlu ta le ntsindza ti mbundzumuxiwa.

⁷ Nkosikazi yi kokeriwa handle, yi yisiwa evukhumbini malandza ya yona ya xisati ma ri karhi ma rila, ma tiputa vusiwana ku fana ni swivambalana, ma tiba swifuva.

⁸ Muti wa Ninivha a wu fana ni xidziva xa mati; kambe sweswi mati ya kona ma phohlile. Hambiloko ku huweleriwa va ku: “Yimani! Yimani!” a ku yimi munhu.

⁹ Phanghani silivhere, mi phangha ni nsuku! Mi nga ka mi nga heti swa le vuhlayiselweni bya kona, ni xuma xa kona xa swilo swa risima swa tinxaka-xaka.

Ri kwihi bako ra nghala ya Ninivha xana?

¹⁰ Muti wa Ninivha wu herile, wu herisiwile, wu hundzuke rhumbi! Va hela mbilu, matsolo ya vona ma gudlagudla, va twa switlhavi emirini hinkwawo, hinkwavo va hundzuka tinghohe hi ku chava.

¹¹ Xana ri kwihi bako ra tinghala xana, ni ndhawu ya swinghalana yi kwihi xana, laha nghala a yi tisa nhloto wa yona kona, ni laha swinghalana swa yona a swi tshama kona, swi nga karhatiwi hi nchumu, xana?

¹² Khale nghala ya matsune a yi phatlulela tinyama, yi nyika vana va yona; a yi khoma swiharhi, yi nyika tinghala ta yona ta xisati, yi tata mabako ya yona hi nhloto wa kona, ni tindhawu ta yona hi nyama leyi phatluleriweke.

¹³ HOSI ya matimba hinkwawo yi ri: “Yingisa we Ninivha, ndza ku pfukela. Ndzi ta hisa makalichi ya wena, ndzi tlhavetela tinhenha ta wena hi fumu. Ndzi ta susa nhloto wa wena emisaveni ya Ninivha, kutani rito ra varhumiwa va wena a ri nga ha twali.”