Mikiya 7 - BIBELE Mahungu Lamanene

Vaisraele va dyohile ku tlula mpimo

¹ Ndzi le khombyeni minoo! Ndzi fana ni munhu wa ndlala loyi a lavaka mihandzu entangeni kumbe emasin'wini ya vhinya, loko va tshoverile, va tlhela va khwaja, kutani a kuma leswaku mihandzu hinkwayo ya vhinya ni matatana lawa a a ma navela ngopfu, swi khiwile swi hela.

² Emisaveni, a ka ha ri na munhu wa vukhongeri, ku pfumaleka na un'we wo lulama exikarhi ka vanhu; hinkwavo va tshama va tilulamisele ku halata ngati, un'wana na un'wana ú hlota munhu-kulobye, a n'wi khayimela entlhan'wini.

³ Loko va endla leswo biha, va tikarhata swinene, vafumi va lerisa, vaavanyisi va lava ku xaviwa, lavo chaviseka va vula leswi va tsakelaka swona, kutani hinkwavo va pfunana ku luka mano.

⁴ Lava tlulaka van'wana hi vunene, va kota xigatlu, lavo lulama ngopfu va fana ni rihlampfu ra mitwa. Nkarhi wa vona wa ku biwa, lowu vaprofeta va va byeleke wona, wu fikile, kutani sweswi va hlangane tinhloko.

⁵ U nga tshembi muakelani, na yena munghana, u nga n'wi tshembi, hambi a ri nsati wa wena, tivonele loko u vulavula na yena.

⁶ N'wana wa xinuna ú rhuketela tata wa yena, n'wana wa xisati ú lwa na mana wa yena, hlomisa ri lwa na n'wingi wa rona, valala va munhu i va ka vona.

⁷ Kambe loko ndzi ri mina, ndzi ta languta eka HOSI Xikwembu, ndzi ta titshembela xona muponisi wanga, Xikwembu xa mina xi ta ndzi hlamula.

Xikwembu xi ponisa vanhu va xona

⁸ N'wina valala va hina, mi nga tshuki mi tsaka leswi hi weke, hikuva hi ta tlhela hi pfuka; hi le xinyamini, kambe HOSI Xikwembu xi ta va xona ku vonakala ka hina.

⁹ Hi ta tiyisela hi byarha vukari bya HOSI Xikwembu, hikuva hi xi dyoherile; xi ta rhanga xi boxa nandzu wa hina, xi hi avanyisa, kutani xi hi humesela eku vonakaleni, leswaku hi vona matimba ya xona ya ku ponisa.

¹⁰ Valala va hina va ta swi vona, kutani va ta nyuma, vona lava a va ku: “HOSI Xikwembu xa n'wina xi kwihi xana?” Vanhu lava va ta kandziyeriwa ku fana ni ndzhope emagondzweni, hina hi ta languta kunene.

¹¹ N'wina va le Yerusalema, siku ra ta leri rirhangu ra muti wa n'wina ri nga ta pfuxiwa; enkarhini wolowo, tiko ra n'wina ri ta anamisiwa.

¹² Kutani vanhu va ta ta va huma ematlhelweni hinkwawo, ku sukela Asiriya ku ya fika le Egipta, ku sukela enambyeni wa Nilo ku ya fika enambyeni wa Yufrata, va huma eribuweni ra lwandle ni le matikweni ya tintshava.

¹³ Kambe matiko man'wana ya misava ma ta hundzuka mananga, hikwalaho ka leswo biha leswi vaaki va wona va swi endleke.

Xikwembu xi ta twela Vaisraele vusiwana

¹⁴ We HOSI, hi vanhu va wena, hi rise, u hi sirhelela hi nhonga ya wena. Hi tshama hi ri hexe exihlahleni, hi rhendzeriwile hi mitanga ya van'wana; hi yise emadyelweni ya Baxani na Giliyadi, ku fana ni le minkarhini ya khale.

¹⁵ Endla mahlori emahlweni ka hina, kukota eminkarhini leyi u humeke na hina etikweni ra Egipta.

¹⁶ Vamatiko lava a va ehleketa leswaku va ni matimba, va ta nyuma loko va vona swilo leswi; va ta tisiva swikandza hi mavoko, va tipfala ni tindleve.

¹⁷ Va ta famba eritshurini ku fana ni tinyoka, va ta kasa wonge vo va swikokovi. Va ta huma emakhokholweni ya vona va ri karhi va rhurhumela, va kongoma eka wena HOSI Xikwembu xa hina, va tshukile swinene, kutani va ta hamba va ku chava.

¹⁸ We HOSI, xana xi kona xikwembu xin'wana lexi fanaka na wena xana? Vanhu lava nga masalela ya ndzhaka ya wena, wa va rivalela milandzu ya vona, a wu hlayeli leswaku va tiarise kangani. Loko u hlundzukile, vukari bya wena byi hatla byi rhelela, hikuva u tsakela ngopfu ku hi komba tintswalo ta wena leto tshembeka.

¹⁹ U ta tlhela u hi twela vusiwana, u herisa milandzu ya hina hinkwayo; swidyoho swa hina u ta swi cukumeta hinkwaswo, swi ya wela eswidziveni swa lwandle.

²⁰ U ta komba ku tshembeka ka wena ni tintswalo ta wena eka va ka Yakobo, vona vatukulu va Abrahama, hilaha u hlambanyeke hakona khale, loko u tshembisa vatata wa hina.