Mikiya 5 - BIBELE Mahungu Lamanene

¹ “Kambe mi ta rhanga mi tixekelela mi rila nkosi, n'wina vaaki va Yerusalema lava tshembaka matlhari, hikuva valala va ta mi rhendzela, va khoma mufumi wa Israele, va n'wi ba tinhlaya hi nhonga.”

EBetlehema, ku ta huma murhangeri

² HOSI Xikwembu xi ri: “Wena Betlehema wa Efrata, hi wena lontsongo exikarhi ka miti ya va ka Yuda, kambe eka wena ndzi ta tilavela loyi a nga ta fuma Vaisraele; vatata wa yena va hanyile ka wena ku sukela khale swinene.”

³ Hikokwalaho, ku tshikiwa ka vona ku ta hela siku leri wansati la tikeke a velekaka n'wana wa mufana, kutani Vaisraele lava nga sala evukhumbini, va ta vuya karikwavo.

⁴ Murhangeri loyi a taka, ú ta fuma tiko a tiyile, a komba matimba ni ku twala ka HOSI Xikwembu xa yena. Vaisraele va ta va va tshamisekile, hikuva ú ta va la chavisekaka emisaveni hinkwayo;

⁵ hi yena la nga ta tisa ku rhula. Loko Vaasiriya va tshuka va nghenile etikweni ra hina, va kandziya entsindza, hi ta rhuma vavanuna va 7 kumbe 8 lava nga ta lwa na vona, va va varisi ni varhangeri va hina;

⁶ va ta hlula Asiriya, tiko ra va ka Nimrodo, va ri fuma hi matlhari. Loko Vaasiriya va ringeta ku nghena etikweni ra hina, murhangeri wa hina ú ta hi lwela.

⁷ Hinkwavo lava nga masalela ya va ka Yakobo, vona lava rhendzeriweke hi vanhu va matiko layo tala, va ta fana ni mberha leyi humaka eka HOSI Xikwembu, kumbe swimpfulana leswi hlukisaka byanyi, swi nga lerisiwanga hi munhu, leswi swi ngo tinela swi nga komberiwanga hi munhu.

⁸ Va ka Yakobo lava saleke exikarhi ka vamatiko, va rhendzeriwa hi vanhu lavo tala, va ta fana ni nghala exikarhi ka swiharhi swa nhova, kumbe n'wana wa nghala entlhambini wa tinyimpfu; laha va taka ha kona, va ta bvanyangeta ni ku phatlulela, ku ri hava munhu loyi a va sivelaka.

⁹ N'wina Vaisraele, mi ta ba valala va n'wina mi va herisa hinkwavo.

¹⁰ HOSI Xikwembu xi ri: “Enkarhini wolowo, ndzi ta herisa tihanci ta n'wina ni makalichi ya n'wina ya nyimpi.

¹¹ Ndzi ta herisa miti leyi nga tikweni ra n'wina, ndzi mbundzumuxa ni makhokholo ya n'wina hinkwawo.

¹² Vungoma ndzi ta byi herisa exikarhi ka n'wina, kutani a mi nga ha vi na vanyamusoro.

¹³ Ndzi ta herisa swikwembu swa n'wina swa swifaniso, ndzi herisa ni maribye ya vukhongeri bya hava, kutani a mi nga ha nkhinsameli swilo leswi endliweke hi mavoko ya n'wina.

¹⁴ Timhandze ta Axera xikwembukazi, ndzi ta ti simula ti suka exikarhi ka n'wina, ndzi mbundzumuxela ni miti ya n'wina.

¹⁵ Vanhu va matiko lama aleke ku ndzi yingisa, ndzi ta va hlundzukela ndzi va karihela, ndzi tirihisela eka vona.”