Mikiya 2 - BIBELE Mahungu Lamanene

Va ni khombo lava xanisaka swisiwana

¹ Va ni khombo vanhu lava kanelaka ku endla leswo homboloka, lava etlelaka va ri karhi va boha makungu layo biha, kutani loko ri xa, va endla leswi va boheke swona nivusiku, hikuva hi vona va fumaka!

² Vanhu lava, loko va navela masimu kumbe tindlu, vo tekela van'wana hi nkanu. Va xanisa munhu ni ndyangu wa yena, va n'wi tekela leswi nga ndzhaka ya yena.

³ Kutani HOSI Xikwembu xi ri: “Vonani n'wina vanhu ndzin'wina, ndzi ni makungu ya ku mi xanisa; exikarhi ka n'wina, ku hava loyi a nga ta pona; enkarhini wa kona, swilo swi ta tika ngopfu, kutani manyunyu ya n'wina ma ta hela.

⁴ Loko nkarhi wu ta fika, va ta yimbelela risimu va mi hlekula ha rona, va rila swinene va ku: ‘Hakunene, hi cheriwe vusiwana, HOSI Xikwembu xi tekile ndzhaka ya vanhu va ka hina, xi yi phakela lava va hi yisaka evukhumbini! Xana hi tekeriwe yini ndzhaka ya hina xana?’

⁵ Enkarhini lowu vanhu va mina va nga ta hlengeletiwa va tlheriseriwa swa vona, n'wina a mi nga nyikiwi nchumu!”

⁶ Vanhu lava va ri, ndza jamuka, kasi hi vona va jamukaka. Va ri: “U nga jamuki! Hina hi nga ka hi nga humeleriwi hi khombo.

⁷ Xana va ka Yakobo va rhuketeriwile hi Xikwembu xana? HOSI Xikwembu xa hela mbilu ke? Xi tirhisa sweswo ke? Xana marito ya xona a hi lawa ya pfunaka, loko munhu a hanya hi ndlela yo lulama xana?”

⁸ HOSI Xikwembu xi ri: “N'wina mi lwa ni vanhu va mina, wonge vo va valala va n'wina. Loko mi vona munhu a funengele nkumba, ma n'wi tekela, kasi o va muhundzi wa ndlela ntsena, a nga lwi na munhu.

⁹ Vavasati va tiko ra mina, ma va hlongola, va huma tindlwini ta vona to saseka, mi tekela vana va vona ndzhaka leyi ndzi va nyikeke yona, mi nga ha va tlheriseli.

¹⁰ Sukani mi famba, leyi a ya ha ri ndhawu yo wisela ka yona, hikuva yi nyamisiwile, kutani mi tivangele ku herisiwa hi ndlela leyi vavisaka ngopfu.

¹¹ Loko ko tshuka ku humelela munhu wo jamuka ni ku hemba, a ku: ‘Ndzi ta mi dyondzisa hi ta vhinyo ni byalwa!’ munhu wo tano, mi ta n'wi tsakela ngopfu.

¹² “N'wina va ka Yakobo, ndzi ta tlhela ndzi mi hlengeleta hinkwenu, ndzi vula n'wina masalela ya Vaisraele; ndzi ta mi vuyisa endhawini yin'we ku fana ni tinyimpfu etshangeni, mi ta fana ni ntlhambi emadyelweni ya wona, etikweni ra n'wina ku ta twala huwa ya vanhu lavo tala.”

¹³ Murhangeri wa vona ú ta mbundzumuxa makhumbi emahlweni ka vona, nyangwa ya muti, va ta yi wisela ehansi, va hundza va famba. Mufumi wa vona, xona HOSI Xikwembu, xi ta famba na vona xi va rhangerile emahlweni.