Matewu 4 - BIBELE Mahungu Lamanene

Ta ku ringiwa ka Yesu

¹ Endzhaku ka sweswo Yesu a yisiwa emananga hi Moya wa Xikwembu, a ya ringiwa hi Diyavulosi.

² A tshama masiku ya 40 ni vusiku bya kona a nga dyi nchumu, a kondza a twa ndlala.

³ Kutani muringi a ta ka yena, a ta ku: “Loko u ri N'wana wa Xikwembu, lerisa maribye lawa leswaku ma hundzuka vuswa.”

⁴ Kambe yena a hlamula, a ku: “Ku tsariwile leswi: “ ‘Munhu a nga ka a nga hanyi hi vuswa ntsena, kambe ú ta hanya hi marito hinkwawo lama humaka enon'weni wa Xikwembu.’ ”

⁵ Kutani Diyavulosi a n'wi yisa eMutini lowo hlawuleka, a n'wi veka exihlungwaneni xa Tempele,

⁶ a ku ka yena: “Loko u ri N'wana wa Xikwembu, jitama, hikuva ku tsariwile leswi: “ ‘Xikwembu xi ta lerisa tintsumi ta xona hikwalaho ka wena, kutani ti ta ku qhavulela emavokweni ya tona, leswaku nenge wa wena wa nga tshuki wu vavisiwa hi ribye.’ ”

⁷ Yesu a ku ka yena: “Nakambe ku tsariwile leswi: ‘U nga tshuki u ringa Hosi, Xikwembu xa wena.’ ”

⁸ Diyavulosi a engeta a n'wi yisa entshaveni leyo leha ngopfu, a n'wi komba mimfumo hinkwayo ya misava ni ku dzuneka ka yona,

⁹ kutani a ku ka yena: “Swilo leswi hinkwaswo ndzi ta ku nyika swona loko u ndzi nkhinsamela, u ndzi gandzela.”

¹⁰ Hiloko Yesu a ku ka yena: “Suka Sathana, hikuva ku tsariwile leswi: “ ‘U ta gandzela Hosi, Xikwembu xa wena, u tirhela xona ntsena.’ ”

¹¹ Kavaloko Diyavulosi a n'wi tshika; kutani tintsumi ti ta ka Yesu, ti ta n'wi tirhela.

Ta Yesu loko a sungula ntirho wa yena eGaleliya

¹² Loko Yesu a twa leswaku Yohane ú khomiwile, a tlhelela eGaleliya.

¹³ Kutani a suka eNazareta, a ya tshama eKapernawume, muti lowu nga kusuhi ni lwandle, emakumu ka matiko ya Zebuloni na Neftali,

¹⁴ leswaku ku ta hetiseka leswi nga vula hi muprofeta Esaya, loko a te:

¹⁵ “Wena tiko ra Zebuloni ni ra Neftali, endleleni yo ya elwandle entsungeni wa Yordani, wena Galeliya wa vamatiko!

¹⁶ Vanhu lava a va ri emunyameni, va vonile ku vonakala lokukulu; lava a va tshama etikweni ra rifu ni xinyami, va fikeriwe hi ku vonakala.”

¹⁷ Ku sukela enkarhini wolowo Yesu a sungula ku twarisa Evhangeli, a ku: “Hundzukani, hikuva Mfumo wa matilo wu le kusuhi.”

Ta Yesu loko a vitana vadyondzisiwa va mune

¹⁸ Loko a ri karhi a famba a lulama ni lwandle ra Galeliya, a vona vavanuna vambirhi, Simoni, la thyiweke Petro, na Andriya makwavo, va ri karhi va hoxa rikoka elwandle, hikuva a va ri vaphasi va tinhlampfi.

¹⁹ Kutani a ku ka vona: “Ndzi landzeni, ndzi ta mi endla vaphasi va vanhu.”

²⁰ Hi nomu lo va siya tinkoka ta vona, va n'wi landza.

²¹ A hundzela emahlweni, kutani a vona vavanuna van'wana vambirhi, va nga Yakobo na Yohane vana va Zebediya; a va ri ebyatsweni na tata wa vona, va ri karhi va lukelela tinkoka ta vona. A va vitana;

²² hiloko va hatla va siya byatso ni tata wa vona, va n'wi landza.

Ta Yesu loko a pfuna ntshungu lowukulu

²³ Yesu a rhendzeleka ni tiko hinkwaro ra Galeliya, a ri karhi a dyondzisa emasinagogeni ya vona, a twarisa Evhangeli ya Mfumo, a herisa mavabyi hinkwawo, ni ku vaviseka hinkwako loku nge vanhwini.

²⁴ Kutani ku twakala ka yena ku hangalaka etikweni hinkwaro ra Siriya. Va tisa hinkwavo lava vabyaka hi mavabyi ya tinxaka-xaka ni lava xanisekaka ngopfu, kukota lava nga ni mademona, ni lava nga ni rihuhe ra n'weti, ni lava nga lamala, kutani Yesu a va hanyisa.

²⁵ Kutani mintshungu leyikulu leyi humaka eGaleliya, ni le Dekapolisi, ni le Yerusalema, ni le Yudiya, ni le ntsungeni wa Yordani, yi n'wi landza.