Matewu 28 - BIBELE Mahungu Lamanene

Ta ku pfuka ka Yesu eku feni

¹ Loko siku ra Savata ri hundzile, Mariya wa Magadala, na Mariya loyi un'wana, va hubuta wa ha ri mpundzu wa siku ra Sonto, va ya languta sirha.

² Hi nomu lo, ku tsekatseka lokukulu ka misava ku va kona; ntsumi ya Hosi yi xika hi le tilweni, yi vumbuluxa ribye, yi tshamisa ehenhla ka rona.

³ A yi vangama ku fana ni rihati, ni swiambalo swa yona a swi basile kukota gamboko.

⁴ Valanguteri va rhurhumela hi ku chava, va vonaka wonge hi loko va file.

⁵ Hiloko ntsumi yi byela vavasati yi ku: “Mi nga chavi, hikuva ndza swi tiva leswaku mi lava Yesu la vambiweke;

⁶ a nga kona la, hikuva ú pfukile eku feni, hilaha a tshamaka a mi byela hakona. Tanani, mi ta vona laha a a latiwile kona.

⁷ Sweswi ke, hatlisani, mi ya tivisa vadyondzisiwa va yena mi ku: ‘Ú pfukile exikarhi ka vafi; wa mi rhangela ku ya eGaleliya, mi ta ya n'wi vona kona.’ Hi swo sweswo ke, ndzi mi byerile.”

⁸ Vavasati va suka esirheni hi ku chava ni ku tsaka lokukulu, va tsutsuma va ya tivisa vadyondzisiwa va yena.

⁹ Hi nomu lo Yesu a va hlanganisa, u ku: “Avuxeni!” Vona va tshinelela va khoma milenge ya yena va n'wi nkhinsamela.

¹⁰ Hiloko Yesu a ku ka vona: “Mi nga chaveni, fambani mi ya lerisa vamakwerhu leswaku va ya eGaleliya; va ta ndzi vona kona.”

Ta marungulo ya valanguteri

¹¹ Kuteloko va sukile, van'wana va valanguteri va ya emutini, va ya tivisa vaprista lavakulu hinkwaswo leswi humeleleke.

¹² Loko vaprista va hlengeletanile ni vakulukumba, va kanela makungu, kutani va nyika masocha mali leyo tala, va ku:

¹³ “Mi nge: ‘Vadyondzisiwa va yena va tile ni vusiku, va ta n'wi yiva, hina hi etlele.’

¹⁴ Ni loko mhaka leyi yi fika etindleveni ta hosi, hina hi ta yi khorwisa, hi mi sirhelela.”

¹⁵ Valanguteri va teka mali, va endla hilaha va lerisiweke hakona; kutani mhaka yoleyo yi twakarile exikarhi ka Vayuda ku fikela ni namuntlha.

Ta Yesu loko a rhuma lava va 11

¹⁶ Vadyondzisiwa lava khume na un'we va ya eGaleliya, entshaveni leyi Yesu a va leriseke yona.

¹⁷ Loko va n'wi vona, va nkhinsama, kambe van'wana va kanakana.

¹⁸ Kutani Yesu a va tshinelela, a vulavula na vona, a ku: “Ndzi nyikiwile vuhosi hinkwabyo etilweni ni la misaveni;

¹⁹ hikokwalaho, yanani eka vamatiko hinkwavo, mi va endla vadyondzisiwa va mina, mi va khuvula hi vito ra Tatana, ni ra N'wana, ni ra Moya lowo Kwetsima,

²⁰ mi va dyondzisa ku hlayisa hinkwaswo leswi ndzi mi leriseke swona; kutani vonani, ndzi na n'wina masiku hinkwawo, ku ko ku hela misava.”