Matewu 27 - BIBELE Mahungu Lamanene

Ta Yesu emahlweni ka Pilato

¹ Loko ri xile, vaprista hinkwavo ni vakulukumba va kanela makungu ya ku dlaya Yesu.

² Kuteloko va n'wi bohile, va famba na yena, va ya n'wi nyiketa eka hosi Pilato.

Ta ku fa ka Yudasi

³ Loko Yudasi loyi a nga n'wi xenga a vona leswaku Yesu ú avanyisiwile, a tivona nandzu, kutani a ya tlherisa mali ya tisilivhere leta 30 eka vaprista lavakulu ni ka vakulukumba,

⁴ a ku ka vona: “Ndzi dyohile hi ku xenga munhu la nga riki na nandzu.” Va ku: “Ku yini ka swona eka hina ke? Swi vone wena hi wexe sweswo.”

⁵ Kavaloko Yudasi a ya cukumeta mali ya kona eTempeleni, kutani a suka, a ya tisunga.

⁶ Vaprista lavakulu va teka mali leyi, kutani va ku: “Leswi yi nga mali ya ngati, a swi fanelanga leswaku yi nghenisiwa enhlengweni wa Tempele.”

⁷ Kuteloko va kanerile makungu, va tirhisa mali leyi ku xava nsimu leyi vuriwaka “Nsimu ya muvumbi”, ku lahlela kona vamatiko.

⁸ Hikwalaho ka sweswo nsimu leyi yi vuriwa “Nsimu ya ngati” ni namuntlha.

⁹ Hi laha ku hetisekeke leswi vuriweke hi muprofeta Yeremiya, loko a te: “Va tekile mali yo ringana tisilivhere ta 30, yi nga nhlayo leyi vanhu va Israele a va pimile leswaku munhu wa kona ú ta xaviwa ha yona,

¹⁰ kutani va humesile mali leyi ku xava ‘Nsimu ya muvumbi’, hilaha Hosi yi ndzi leriseke hakona.”

Ta Yesu loko a vutisiwa hi Pilato

¹¹ Yesu a yimisiwa emahlweni ka hosi; kutani yona yi n'wi vutisa, yi ku: “Xana u hosi ya Vayuda ke?” Yesu a ku ka yona: “U vula swona!”

¹² Kambe loko vaprista lavakulu ni vakulukumba va n'wi veka nandzu, a nga hlamulanga nchumu.

¹³ Hiloko Pilato a ku ka yena: “Xana a wu ti twi timhaka leto tala leti va ku vekaka nandzu ha tona ke?”

¹⁴ Kambe Yesu a nga ha n'wi hlamulanga nchumu, hosi yi kondza yi hlamala ngopfu.

Ta Yesu loko a avanyiseriwa rifu

¹⁵ Hi nkarhi wa nkhuvo, hosi a yi tolovele ku ntshunxa mubohiwa un'we loyi tiko ri n'wi kombelaka.

¹⁶ Enkarhini wolowo a ku ri ni mubohiwa un'wana loyi a tiviweke swinene, loyi a va ku i Barabasi.

¹⁷ Loko va hlengeletanile, Pilato a ku ka vona: “Xana mi lava leswaku ndzi mi ntshunxela wihi: Barabasi, kumbe Yesu la vuriwaka Mesiya ke?”

¹⁸ A a vutisisa sweswo hi ku tiva leswaku a va nyiketile Yesu hikwalaho ka mavondzo.

¹⁹ Kuteloko Pilato a tshamile exitshan'wini xa ku avanyisa, nsati wa yena a rhumela rito eka yena, a ku: “U nga tshuki u nghena emhakeni ya munhu yoloye wo lulama, hikuva matolo ndzi vavisekile ngopfu enorhweni hikwalaho ka yena.”

²⁰ Kambe vaprista lavakulu ni vakulukumba va hlohlotela ntshungu leswaku va kombela Barabasi, Yesu yena a dlawa.

²¹ Hosi yi engeta yi va vutisa yi ku: “Xana mi lava leswaku ndzi mi ntshunxela wihi eka lavambirhi lava?” Va ku: “Barabasi!”

²² Pilato a ku ka vona: “Loko swi ri tano, Yesu la vuriwaka Mesiya, ndzi ta endla yini ha yena ke?” Hinkwavo va ku: “A a vambiwe!”

²³ Kavaloko hosi yi ku: “Xana ú endlile yini xo biha ke?” Vona va huwelela hi matimba, va ku: “A a vambiwe!”

²⁴ Loko Pilato a vona leswaku a nga ha pfuni nchumu, ni leswaku dzolonga ri ya ri kula, a teka mati, a hlamba mandla emahlweni ka ntshungu, a ku: “A ndzi na nandzu wa rifu ra munhu loyi, swi voneni mi ri n'wina.”

²⁵ Tiko hinkwaro ri hlamula, ri ku: “Rifu ra yena a ri ve ehenhla ka hina ni le henhla ka vana va hina.”

²⁶ Kutani a va ntshunxela Barabasi; kambe a lerisa leswaku Yesu a biwa, kutani a n'wi nyiketa leswaku a vambiwa.

Ta masocha loko ma tseketsela Yesu

²⁷ Masocha ya hosi ma yisa Yesu endlwini ya vuhosi, kutani ma hlengeleta ntlawa hinkwawo wa masocha, wu n'wi rhendzela.

²⁸ Va n'wi hluvula swiambalo swa yena, va n'wi ambexa xin'wana xo tshwuka,

²⁹ kutani va luka harhi ya mitwa, va n'wi tlhandleka enhlokweni, va n'wi tamerisa nhonga evokweni ra xinene; kutani va nkhinsama hi matsolo emahlweni ka yena, va n'wi tseketsela, va ku: “Xewani, Hosi ya Vayuda!”

³⁰ Va n'wi tshwutela marha; va teka nhonga, va n'wi ba nhloko ha yona.

³¹ Kuteloko va hetile ku n'wi tseketsela, va n'wi hluvula xiambalo xa kona, va tlhela va n'wi ambexa swa yena, kutani va famba na yena va ya n'wi vamba.

Ta ku vambiwa ka Yesu

³² Loko va ri karhi va huma, va hlangana ni wanuna un'wana wa Kirene, loyi a va ku i Simoni, va n'wi sindzisa ku rhwala xihambano xa Yesu.

³³ Loko va fikile endhawini leyi va nge i Gologota, hileswaku “Ndhawu ya Pala”,

³⁴ va n'wi nyika vhinyo leyi pfanganyisiweke ni nyongwa leswaku a nwa; kambe loko a nantswile, a ala ku yi nwa.

³⁵ Loko va n'wi vambile, va avelana swiambalo swa yena hi ku hoxa vuhlolotwana,

³⁶ kutani va tshama hansi kwalaho, va n'wi rindza.

³⁷ Ehenhlanyana ka nhloko ya yena, va nameketa papila ra nandzu wa yena leri nge: “Loyi i Yesu, Hosi ya Vayuda.”

³⁸ Kutani va n'wi vamba swin'we ni swigevenga swimbirhi, xin'wana evokweni ra xinene, xin'wana eka lera ximatsi.

³⁹ Vahundzi va ndlela va n'wi rhuketela, va hlakahla tinhloko, va ku:

⁴⁰ “Wena la nhlanhlaka Tempele, u ku u ta yi pfuxa hi masiku manharhu, tiponise ke, u xika la xihambanweni, loko u ri N'wana wa Xikwembu!”

⁴¹ Hi mukhuva wolowo, na vona vaprista lavakulu, swin'we ni vatsari ni vakulukumba, va n'wi tseketsela, va ku:

⁴² “U ponisile van'wana, kambe wa tsandzeka ku tiponisa! A hi ku, hi yena Hosi ya Israele. A a xike sweswi exihambanweni, hi ta pfumela eka yena.

⁴³ Ú tshembile Xikwembu, a xi n'wi ponise sweswi loko xi n'wi tsakela, hikuva ú te: ‘Ndzi N'wana wa Xikwembu.’ ”

⁴⁴ Ni swigevenga leswi nga vambiwa kun'we na yena, a swi n'wi sandza hi mukhuva wolowo.

Ta ku fa ka Yesu

⁴⁵ Ku sukela nkarhi wa 12 ni nhlekanhi ku fikela nkarhi wa 3 ni ndzhenga, munyama wu funengeta tiko hinkwaro.

⁴⁶ Loko ku lavile ku va nkarhi wa 3 ni ndzhenga, Yesu a huwelela hi rito leri tlakukeke, a ku: “Eli, Eli, lama sabaktani?” hileswaku: “Xikwembu xanga, Xikwembu xanga, u ndzi tshikele yini?”

⁴⁷ Van'wana lava a va ri kona kwalaho, loko va n'wi twa, va ku: “U vitana Eliya.”

⁴⁸ Kan'we-kan'we un'wana wa vona a tsutsuma, a ya teka xiponji, a xi peta endzeni ka ntsuvi, kutani a xi tlhoma erihlangeni, a n'wi nyika leswaku a nwa.

⁴⁹ Kambe van'wana va ku: “Tshika, hi ta vona loko kunene Eliya a ta ta, a ta n'wi ponisa.”

⁵⁰ Kavaloko Yesu a engeta a huwelela hi rito leri tlakukeke, kutani a hlala a fa.

⁵¹ Hi nomu lo, xisirhelelo xa Tempele xi handzuka hi le xikarhi, ku sukela ehenhla, ku ya fika ehansi; misava yi tsekatseka, ni maribye ma pandzeka.

⁵² Masirha ya pfuleka; vahlawuriwa va Xikwembu lavo tala lava a va file, va pfuka eku feni hi miri wa vona;

⁵³ va suka emasirheni, kutani loko Yesu a pfukile eku feni, va nghena eMutini lowo hlawuleka, va ri karhi va voniwa hi lavo tala.

⁵⁴ Loko ndhuna ya dzana ra masocha ni lava a va ri na yona ku rindza Yesu, va vona ku tsekatseka ka misava ni leswi humeleleke, va chava ngopfu, va ku: “Hakunene munhu loyi a a ri N'wana wa Xikwembu.”

⁵⁵ A ku ri ni vavasati lavo tala kwalaho, a va languta va ri kule. A va ri lava a va landzelele Yesu ni ku n'wi tirhela loko a huma eGaleliya.

⁵⁶ Exikarhi ka vona, a ku ri na Mariya wa Magadala, na Mariya mana wa Yakobo na Yosefa, ni mana wa vana va Zebediya.

Ta ku lahliwa ka Yesu

⁵⁷ Kuteloko ri ya eku peleni, ku ta mufuwi un'wana wa le Arimatiya; vito ra yena a a ri Yosefa, kutani na yena a a ri mudyondzisiwa wa Yesu.

⁵⁸ A ta eka Pilato, a ta kombela ntsumbu wa Yesu; kutani Pilato a lerisa leswaku va n'wi nyika wona.

⁵⁹ Kuteloko Yosefa a wu tekile, a wu phutsela hi nceka lowu a wu nga si tirhisiwa,

⁶⁰ kutani a veka ntsumbu esirheni ra yena lerintshwa, leri a a ri kovotlile eribyeni; kutani a vumbuluxa ribye lerikulu ro pfala nomo wa sirha, a tifambela.

⁶¹ Mariya wa Magadala na Mariya loyi un'wana, a va ri kwalaho, va tshamile va langutene ni sirha.

Ta valanguteri esirheni ra Yesu

⁶² Loko ri xa hi siku leri tlhandlamaka, ri nga ra Savata, vaprista lavakulu ni Vafarisi va hlengeletana eka Pilato, va ku:

⁶³ “Hosi, ha ha tsundzuka leswaku muxisi loyi, loko a ha hanya, ú te: ‘Endzhaku ka masiku manharhu, ndzi ta pfuka eku feni.’

⁶⁴ Hikwalaho, lerisa leswaku sirha ri rindziwa ku ko ku fika siku ra vunharhu, leswaku vadyondzisiwa va yena va nga tshuki va ta n'wi yiva, kutani va ta byela vanhu va ku: ‘Ú pfukile ku feni!’ Vunwa lebyi a byi ta tlula lebyo rhanga hi ku biha.”

⁶⁵ Pilato a ku ka vona: “Mi ni ntlawa wa valanguteri, yanani mi ya rindza sirha, hilaha mi swi vonaka hakona.”

⁶⁶ Kutani va ya, va ya tiyisa ribye hi mfungho wa vona, va veka ni valanguteri leswaku va sala va rindza.