Matewu 22 - BIBELE Mahungu Lamanene

Xifaniso xa nkhuvo wa vukati

¹ Yesu a engeta a vulavula na vona hi swifaniso, a ku:

² “Mfumo wa matilo wu fana ni hosi leyi endlelaka n'wana wa yona enkhuvo wa vukati.

³ Yi rhuma malandza ya yona ku ya vitana lava nga rhambiwa enkhubyeni, kambe vona va ala ku ta.

⁴ Yi engeta yi rhuma malandza man'wana, yi ku: ‘Tivisani lava rhambiweke, mi ku: Maswivo, ndzi lunghisile swakudya swa mina; tihavi ta mina ni swifuwo swo nona swa mina swi tlhaviwile; swilo hinkwaswo swi lunghisiwile, tanani enkhubyeni.’

⁵ Kambe varhambiwa a va swi endlanga mhaka; va tifambela, un'wana ensin'wini ya yena, un'wana eku xaviseni ka swilo swa yena;

⁶ van'wana va khoma malandza ya hosi, va ma endla hi tihanyi, va ma dlaya.

⁷ Kwalaho hosi yi kariha, yi rhuma mavuthu ya yona ku ya lovisa vadlayi valavo ni ku hisa muti wa vona.

⁸ Kutani yi lerisa malandza ya yona, yi ku: ‘Nkhuvo wa vukati wu lunghisiwile, kambe lava rhambiweke a wu nga va fanelanga.

⁹ Sweswi yanani emahandzeni ya tindlela, mi ya vitana hinkwavo lava mi nga ta va kuma, va ta enkhubyeni.’

¹⁰ Kutani malandza walawo ma huma, ma ya etindleleni, ma hlengeleta hinkwavo lava va kumekaka, lavo biha ni lavo lulama, kutani yindlu ya nkhuvo yi tala hi vanhu lava tshamiseke eswakudyeni.

¹¹ “Kuteloko hosi yi nghenile ku ta languta lava tshamiseke eswakudyeni, yi vona munhu la nga ambalangiki xiambalo xa nkhuvo;

¹² kutani yi ku ka yena: ‘Nakulorhi, u nghenise ku yini la, u nga ri na xiambalo xa nkhuvo?’ Yoloye a miyela.

¹³ Hiloko hosi yi ku ka malandza: ‘N'wi boheni milenge ni mavoko, mi n'wi cukumeta ehandle munyameni laha ku nga ta va ni minkosi ni ku getsela ka meno.’ ”

¹⁴ Kutani Yesu a ku: “Lava vitaniwaka va tele, kambe lava hlawuriwaka a hi vangani.”

Ta ku humesela Khezari endzuvo

¹⁵ Kutani Vafarisi va suka, va ya tshama Yesu xikungu, ku vona hilaha va nga n'wi phasaka hakona hi marito.

¹⁶ Kutani va rhuma vadyondzisiwa va vona ni va ntlawa wa Vaheroda, va ya n'wi byela, va ku: “Mudyondzisi, ha swi tiva leswaku u vula leswi tiyeke, ni leswaku u dyondzisa ndlela ya Xikwembu hi ntiyiso u nga landzeleli swa vanhu, hikuva a wu yi hi nghohe.

¹⁷ U nga hi byela miehleketo ya wena emhakeni leyi: Xana swa fanela ku humesela Khezari endzuvo, kumbe a swi faneli ke?”

¹⁸ Yesu, hi ku tiva mano ya vona, a ku: “Mi ndzi ringela yini, n'wina vakanganyisi?

¹⁹ Ndzi kombeni mali ya ndzuvo.” Kutani va n'wi tisela denari.

²⁰ A ku ka vona: “Xifaniso lexi i xa mani ke? Ni vito leri i ra mani ke?”

²¹ Va n'wi hlamula va ku: “I swa Khezari.” Kutani a ku ka vona: “Nyikani Khezari leswi nga swa Khezari, ni Xikwembu leswi nga swa Xikwembu.”

²² Loko va twa sweswo, va hlamala, kutani va n'wi siya va suka va famba.

Xivutiso ehenhla ka ku pfuka eku feni

²³ Hi siku rero, van'wana va Vasaduki, va nga vanhu lava vulaka leswaku vafi a va pfuki, va ta eka Yesu, va fika va n'wi vutisa, va ku:

²⁴ “Mudyondzisi, Muxe ú te: ‘Loko munhu a fa a nga ri na vana, makwavo wa yena ú ta teka nsati wa mufi, a pfuxa ndyangu wa makwavo.’

²⁵ Sweswi ku ni mhaka leyi: A ku ri ni vamakwavo va 7 exikarhi ka hina; lowa mativula a a tekile nsati, kutani a fa, a nga ri na vana; hikwalaho ka swona, ndzisana ya yena yi sala yi hlayisa nsati wa kona.

²⁶ Swi endlisa sweswo ni ka makwavo wa mufi wa vumbirhi, ni ka lowa vunharhu, ku ya fika eka lowa vu-7.

²⁷ Endzhaku ka vona hinkwavo, wansati na yena a fa.

²⁸ Leswi lava 7 hinkwavo va veke vanuna va wansati loyi, xana hi siku ra ku pfuka eku feni, ú ta va nsati wa mani exikarhi ka vona xana?”

²⁹ Yesu a va hlamula, a ku: “Mi lahlekile ngopfu, hikuva a mi tivi Matsalwa ni matimba ya Xikwembu.

³⁰ Hikuva enkarhini wa ku pfuka eku feni, vanhu a va ha teki hambi ku ri ku tekiwa, kambe va fana ni tintsumi ta le tilweni.

³¹ Loko ku ri ku pfuka ka vafi, xana a mi hlayanga leswi Xikwembu xi nga mi tivisa swona xana? Xona xi te:

³² ‘Hi mina Xikwembu xa Abrahama, ni Xikwembu xa Isaka, ni Xikwembu xa Yakobo.’ Xona a hi Xikwembu xa lava feke, kambe i Xikwembu xa lava hanyaka.”

³³ Loko mintshungu yi twa sweswo, yi hlamala ngopfu hi ku dyondzisa ka yena.

Ta nsinya wa Milawu

³⁴ Loko Vafarisi va twile leswaku Yesu ú miyetile Vasaduki, va hlengeletana endhawini yin'we.

³⁵ Kutani un'wana wa vona loyi a a ri mudyondzisi wa nawu, a ringa Yesu hi ku n'wi vutisa, a ku:

³⁶ “Mudyondzisi, xana nawu lowukulu eMilawini hi wihi xana?”

³⁷ Yesu a ku ka yena: “Hi lowu nge: ‘Rhandza Hosi Xikwembu xa wena hi mbilu ya wena hinkwayo, ni moya wa wena hinkwawo, ni ku anakanya ka wena hinkwako.’

³⁸ Lowu hi wona nawu lowukulu, lowo rhanga;

³⁹ kutani lowa vumbirhi, lowu fanaka na wona, hi lowu nge: ‘Rhandza munhu-kuloni, kukota loko u tirhandza.’

⁴⁰ Milawu lemimbirhi leyi yi katsa Milawu hinkwayo ni marito ya Vaprofeta.”

Xivutiso ehenhla ka n'wana Davhida

⁴¹ Yesu a vutisa Vafarisi lava hlengeletaneke,

⁴² a ku: “Xana mi ehleketa yini hi Mesiya xana? I n'wana mani ke?” Va n'wi hlamula va ku: “I n'wana Davhida.”

⁴³ A ku ka vona: “Loko swi ri tano, hikwalaho ka yini Davhida a kombisiwile hi Moya ku vula leswaku Mesiya i N'wini wa hinkwaswo ke? Hakunene Davhida ú te:

⁴⁴ “ ‘Hosi Xikwembu xi te ka N'wini wanga: Tshama evokweni ra mina ra xinene, kutani ndzi ta veka valala va wena ehansi ka minkondzo ya wena.’

⁴⁵ “Hikokwalaho, loko Davhida a vula Mesiya, a ku i N'wini wa hinkwaswo, xana a nga va n'wana wa yena hi ndlela yihi ke?”

⁴⁶ A ka ha vanga na un'we la tiveke ku n'wi hlamula nchumu; naswona, ku sukela enkarhini wolowo, a ka ha vanga na munhu la nga tiya nhlana ku n'wi vutisa xivutiso.