Matewu 2 - BIBELE Mahungu Lamanene

Ta riendzo ra tintlhari ta le vuxeni

¹ Kuteloko Yesu a velekiwile eBetlehema wa Yudiya, enkarhini wa Hosi Heroda, tintlhari ta le vuxeni ti fika eYerusalema,

² ti ku: “Yi kwihi Hosi ya Vayuda leyi velekiweke xana? Hikuva hi vonile nyeleti ya yona le vuxeni, kutani hi tile ku ta yi gandzela.”

³ Loko hosi Heroda a swi twa, a tshuka ngopfu, na vona vaaki va Yerusalema va tshuka hinkwavo.

⁴ A hlengeleta vaprista lavakulu hinkwavo ni vatsari va tiko, a va vutisa a ku: “Xana Mesiya ú fanele ku velekiwa kwihi xana?”

⁵ Va n'wi byela, va ku: “Emutini wa Betlehema wa Yudiya, hikuva hi leswi nga tsariwa hi muprofeta la nga te:

⁶ “ ‘Na wena Betlehema, tiko ra Yudiya, a wu ntsongo exikarhi ka tihosi ta Yuda, hikuva eka wena ku ta huma hosi leyi nga ta fambisa tiko ra mina ra Israele.’ ”

⁷ Hiloko Heroda a vitana tintlhari exihundleni, a va vutisisa nkarhi lowu nyeleti yi nga humelela ha wona.

⁸ Kutani a va rhuma eBetlehema, a ku: “Fambani, mi ya lavisisa xihlangi swinene; kutaku loko mi xi kumile, mi ta ndzi tivisa, leswaku na mina ndzi ta ya xi gandzela.”

⁹ Loko va twile marito ya hosi, va suka va famba; kutani nyeleti yoleyo va nga yi vona evuxeni, yi va rhangela emahlweni, yi ya yima ehenhla ka laha xihlangi a xi ri kona.

¹⁰ Loko va vona nyeleti, va tsaka hi ku tsaka lokukulu ngopfu.

¹¹ Kutani va nghena ndlwini, va kuma xihlangi ni mana wa xona Mariya; kwalaho va nkhinsama, va xi gandzela; kutani va ntshunxa mindzhwalo ya vona, va xi humesela tinyiko ta nsuku, ni mirhi ya risuna, ni mafurha ya mirha.

¹² Kuteloko va tivisiwile enorhweni leswaku va nga ha hundzi hi le ka Heroda, va tlhelela karikwavo hi ndlela yin'wana.

Ta ku balekela le Egipta

¹³ Kuteloko va tlhelele karikwavo, ntsumi ya Hosi yi humelela eka Yosefa enorhweni, yi ku: “Pfuka, u teka xihlangi ni mana wa xona, u baleka u ya Egipta, u ya tshama kona ndzi ko ndzi ku byela; hikuva Heroda ú ta lava xihlangi leswaku a xi dlaya.”

¹⁴ Yosefa a pfuka, a teka xihlangi ni mana wa xona nivusiku, a ya le Egipta,

¹⁵ a ya tshama kona Heroda a kondza a fa, leswaku ku hetiseka leswi nga vuriwa hi Hosi, hi nomo wa muprofeta la nga te: “Ndzi vitanile n'wananga, a huma etikweni ra Egipta.”

Ta ku dlawa ka vana va vafana

¹⁶ Loko Heroda a vona leswaku ú kanganyisiwile hi tintlhari, a kariha ngopfu, kutani a rhuma vanhu va ya dlaya vana hinkwavo va vafana va le Betlehema ni le tikweni ra kona hinkwaro, va malembe mambirhi ni lava tlhandlamaka, a ringanisa nkarhi lowu a nga vutisisa tintlhari ha wona.

¹⁷ Kwalaho ke ku hetiseka leswi vuriweke hi muprofeta Yeremiya, loko a te:

¹⁸ “Rito ri twakele eRhama, ra nkosi ni ra xirilo lexikulu; i Rahele la rilelaka vana vakwe a nga pfumeri ku chaveleriwa, hikuva a va ha ri kona.”

Ta ku vuya hi le Egipta

¹⁹ Kuteloko Heroda a file, ntsumi ya Hosi yi humelela eka Yosefa enorhweni, le Egipta, yi ku:

²⁰ “Pfuka, u teka xihlangi ni mana wa xona, u tlhelela etikweni ra Israele, hikuva lava a va lava ku xi dlaya, va file.”

²¹ Kutani Yosefa a pfuka, a teka xihlangi ni mana wa xona, a tlhelela etikweni ra Israele.

²² Kambe loko a twa leswaku Arkelawusi ú fuma Yudiya ematshan'wini ya Heroda tata wa yena, a chava ku ya kona; kutani loko a tsundzuxiwile enorhweni, a tlhelela etikweni ra Galeliya,

²³ a ya aka emutini lowu vuriwaka Nazareta, leswaku ku hetiseka leswi vaprofeta va nga vula swona hi tlhelo ra Mesiya, loko va te: “U ta vuriwa Munazarene.”