Matewu 15 - BIBELE Mahungu Lamanene

Ta mikhuva ya Vayuda va khale

¹ Enkarhini wolowo, Vafarisi ni vatsari lava humaka eYerusalema va ta ka Yesu, va ku:

² “Hikwalaho ka yini vadyondzisiwa va wena va tshika mikhuva leyi hi yi kumeke eka lava khale xana? Hikuva va dya va nga hlambanga mavoko.”

³ A va hlamula, a ku: “Na n'wina, mi tlulela yini nawu xa Xikwembu hi mikhuva ya n'wina ke?

⁴ Xikwembu xi te: ‘U va ni xichavo eka tata wa wena ni ka mana wa wena.’ Naswona xi te: ‘Loyi a rhukanaka tata wa yena kumbe mana wa yena, a a dlawe!’

⁵ Kasi n'wina mi ri, munhu a nga byela tata wa yena kumbe mana wa yena, a ku: ‘Leswi a ndzi ta fanela ku ku pfuna ha swona, i mhamba leyi hlayiseriweke Xikwembu.’

⁶ Eka n'wina, munhu loyi a nga ha ri na fanelo ya ku pfuna tata wa yena. Kutani ke mi onha rito ra Xikwembu hi mikhuva ya n'wina.

⁷ Vakanganyisi, Esaya a a vula n'wina hakunene loko a te:

⁸ “ ‘Vanhu lava va ndzi xixima hi nomo, kambe timbilu ta vona ti le kule na mina.

⁹ Va tikarhata ntsena hi ku ndzi nkhinsamela, tidyondzo leti va ti dyondzisaka i milawu ya vanhu ntsena.’ ”

Ta swilo leswi nyamisaka

¹⁰ Kutani Yesu a vitana ntshungu, a ku ka wona: “Yingisani, mi twisisa.

¹¹ Leswi nghenaka enon'weni, a hi swona leswi nyamisaka munhu, kambe leswi humaka enon'weni, hi swona leswi nyamisaka munhu.”

¹² Kavaloko vadyondzisiwa va ta eka yena, va ku: “Xana wa swi tiva leswaku Vafarisi va khunguvanyekile, loko va twile marito ya wena ke?”

¹³ A hlamula, a ku: “Ximila xin'wana ni xin'wana lexi nga simekiwangiki hi Tata wa mina wa le tilweni, xi ta tsuvuriwa.

¹⁴ Va tshikeni, hi lavo-fe-mahlo lava fambisaka lavo-fe-mahlo. Loko lowo-fe-mahlo a fambisa lowo-fe-mahlo, va ta wela ekheleni hi vumbirhi bya vona.”

¹⁵ Petro a n'wi hlamula a ku: “Hi hlamusele xifaniso lexiyani.”

¹⁶ A ku: “Xana ni sweswi ma ha pfumala ku twisisa na n'wina ke?

¹⁷ Xana a mi swi tivi leswaku hinkwaswo leswi nghenaka enon'weni, swi ya ekhwirini, kutani swi cukumetiwa enhoveni ke?

¹⁸ Kasi leswi humaka enon'weni, swi pfa hi le mbilwini, kutani hi swona leswi nyamisaka munhu.

¹⁹ Hikuva miehleketo leyo biha, ni ku dlayana, ni vuoswi, ni vuphukuphuku, ni ku yiva, ni vumbhoni byo hemba, ni ku sandzana, swi huma embilwini;

²⁰ hi swona leswi nyamisaka munhu; kambe ku dya hi mavoko lama nga hlambiwangiki, a hi xilo lexi nyamisaka munhu.”

Ta ku pfumela ka wansati wa Kanana

²¹ Yesu a suka kwalaho, a ya etikweni ra Tiri na Sidoni.

²² Kutani ku humelela wansati wa le Kanana la humeke ematlhelweni walawo, a huwelela a ku: “Ndzi twele vusiwana, Hosi N'wana Davhida! N'wana wa mina wa wanhwanyana ú xaniseka ngopfu hi demona.”

²³ Kambe Yesu a nga n'wi hlamulanga nchumu. Kutani vadyondzisiwa va yena va n'wi kombela va ku: “N'wi hlongole, hikuva ú hi bela huwa a ri karhi a hi landzelela.”

²⁴ Yesu a hlamula a ku: “A ndzi rhumiwanga eka van'wana, loko ku nga ri eka Vaisraele, lava lahlekeke kukota tinyimpfu.”

²⁵ Hiloko wansati a ta, a ta n'wi nkhinsamela, a ku: “Hosi, ndzi pfune!”

²⁶ A n'wi hlamula, a ku: “A swi sasekanga ku tekela vana evuswa, u nyika timbyana.”

²⁷ Yena a ku: “Ina Hosi, kambe hambi ti ri timbyana, ti dya mahlanhla lama waka hi le tafuleni ra vini va tona.”

²⁸ Kwalaho Yesu a hlamula, a ku ka yena: “Manana, ku pfumela ka wena i kukulu; a ku endliwe hilaha u kombelaka hakona!” Kutani n'wana wa yena a hanyisiwa hi nkarhi wolowo.

Ta Yesu loko a hanyisa lavo tala

²⁹ Loko Yesu a sukile kwalaho, a tlhelela kusuhi ni lwandle ra Galeliya, kutani a tlhandlukela entshaveni, a fika a tshama hansi.

³⁰ Mintshungu leyikulu yi ta ka yena, yi ri ni lavo khwita, ni swilema, ni lavo-fe-mahlo, ni timbheveve, ni van'wana lavo tala; yi va veka emilengeni ya Yesu, kutani a va hanyisa.

³¹ Mintshungu yi hlamala loko yi vona timbheveve ti vulavula, ni swilema swi hanyisiwa, ni lavo khwita va famba, ni lavo-fe-mahlo va vona; kutani yi dzunisa Xikwembu xa Israele.

Ta Yesu loko a phamela vanhu va 4 000

³² Yesu a vitana vadyondzisiwa va yena, a ku ka vona: “Ndzi twela ntshungu lowu evusiwana, hikuva va xwile masiku manharhu na mina, kutani a va ha ri na swakudya; a ndzi lavi ku va tlherisela emakaya va ri ni ndlala, hikuva va nga wa endleleni.”

³³ Vadyondzisiwa va ku ka yena: “Xana hi nga swi kuma kwihi kwala mananga swakudya swo phamela ntshungu lowo tano, va dya va xurha ke?”

³⁴ Yesu a ku ka vona: “Mi ni swinkwa swingani ke?” Va ku: “Hi ni swinkwa swa 7, ni tinhlampfinyana ti nga ri tingani.”

³⁵ Kwalaho a lerisa ntshungu leswaku wu tshama hansi.

³⁶ Kutani a teka swinkwa swa 7 ni tinhlampfi, a nkhensa, a phema, a nyika vadyondzisiwa, vona va avela ntshungu.

³⁷ Hinkwavo va dya va xurha, va rholela ni mahlanhla lama nga sala, ma tata swirhundzu swa 7 leswikulu.

³⁸ Lava nga dya, a va ri vanhu va 4 000, loko ku nga hlayiwi vavasati ni vana.

³⁹ Kuteloko a tlherisile mintshungu, a nghena ebyatsweni, a ya etikweni ra Magadani.