Matewu 14 - BIBELE Mahungu Lamanene

Ta ku fa ka Yohane Mukhuvuri

¹ Enkarhini wolowo, loko ku twakala ka Yesu ku fikile etindleveni ta hosi Heroda,

² a ku ka malandza ya yena: “Munhu loyi i Yohane Mukhuvuri; ú lo pfuka eku feni; kutani hi swona leswi endlaka leswaku mintirho leyi ya matimba yi vonaka eka yena.”

³ Mhaka hi leswaku Heroda a a khomile Yohane, a n'wi boha, a n'wi nghenisa ekhotsweni hikwalaho ka Herodiya, nkata Filipi makwavo;

⁴ hikuva Yohane a a tshamela ku byela Heroda, a ku: “A wu pfumeleriwi ku tekela makwenu ensati wa yena.”

⁵ Heroda a a navela ku n'wi dlaya, kambe a a chava vanhu hikuva a va ku: “Yohane i muprofeta!”

⁶ Kambe enkhubyeni wa siku ra ku velekiwa ka Heroda, n'wana wa Herodiya wa xisati a cina emahlweni ka vanhu, a tsakisa Heroda;

⁷ hikokwalaho, Heroda a n'wi tshembisa hi ku hlambanya, a ku: “Xin'wana ni xin'wana lexi u nga ta xi kombela, ndzi ta ku nyika xona.”

⁸ Hiloko nhwanyana a byeleteriwa hi mana wakwe ku hlamula, a ku: “Ndzi nyike nhloko ya Yohane Mukhuvuri ko kwala, yi ri enkambaneni.”

⁹ Hosi yi khomiwa hi tingana; kambe hikwalaho ka ku hlambanya ka yona, ni hikwalaho ka lava tshameke na yona eswakudyeni, yi lerisa leswaku nhloko yi nyikiwa lowa nhwanyana.

¹⁰ Ku rhumiwa vanhu, va ya tsema nhloko ya Yohane ekhotsweni.

¹¹ Kutani nhloko leyi yi tisiwa yi ri enkambaneni, va nyika nhwanyana; yena a yi yisa eka mana wa yena.

¹² Kavaloko vadyondzisiwa va Yohane va ta, va ta teka ntsumbu wa yena, va ya wu lahla; kutani va ya tivisa Yesu.

Ta ku phameriwa ka vanhu va 5 000

¹³ Loko Yesu a twile timhaka teto, a suka kwalaho hi byatso, a pelela laha ku nga mananga, a ri yexe. Loko mintshungu yi swi twile, yi huma emitini, yi n'wi landza hi milenge.

¹⁴ Eku humeni ka yena ebyatsweni, a vona ntshungu lowukulu, kutani a wu twela vusiwana, a hanyisa lava vabyaka exikarhi ka wona.

¹⁵ Kuteloko ri perile, vadyondzisiwa va ta eka yena va ku: “Lomu i mananga, na swona nkarhi wu hundzile, tlherisa mintshungu, yi ya emitini, yi ya tixavela swakudya.”

¹⁶ Kambe Yesu a ku ka vona: “A va fanelanga ku suka; va phameleni n'wina.”

¹⁷ Va ku ka yena: “A hi na nchumu la, loko ku nga ri swinkwa swa ntlhanu ni tinhlampfi timbirhi.”

¹⁸ A ku: “Swi tiseni haleno.”

¹⁹ Kutani loko a lerisile ntshungu ku tshama hansi ebyanyini, a teka swinkwa leswa ntlhanu ni tinhlampfi timbirhi, a languta henhla etilweni, a nkhensa. Kavaloko a phemelela swinkwa sweswo, a nyika vadyondzisiwa, vona va avela ntshungu.

²⁰ Hinkwavo va dya va xurha; kutani va rholela mahlanhla lawa ya nga sala, ma tata swirhundzu swa 12.

²¹ Kasi lava dyeke a va ri vanhu lava lavaka ku va 5 000, loko ku nga hlayiwi vavasati ni vana.

Ta Yesu loko a famba ehenhla ka mati

²² Endzhaku ka sweswo, Yesu a lerisa vadyondzisiwa leswaku va nghena ebyatsweni, va pfa va ya entsungeni, loko yena a ri karhi a tlherisa vanhu.

²³ Kuteloko a tlherisile mintshungu leyi, a tlhandlukela entshaveni ku ya khongela hi tlhelo; kutani a peleriwa hi dyambu a ha ri kwalaho a ri yexe.

²⁴ Byatso byona, a byi fambile mpfhuka lowukulu byi sukile eribuweni, byi tsekatsekisiwa hi magandlati, hikuva mheho a yi byi sivela.

²⁵ Hi nkarhi wa mahlamba-ndlopfu, a ta ka vona, a ri karhi a famba ehenhla ka lwandle.

²⁶ Loko vadyondzisiwa va n'wi vona a ri karhi a famba ehenhla ka lwandle, va tshuka ngopfu va ku: “I xipuku!” Kutani va huwelela hi ku chava.

²⁷ Kambe Yesu a hatla a vulavula na vona, a ku: “Tiyisani timbilu, hi mina; mi nga chaveni!”

²⁸ Petro a n'wi hlamula, a ku: “Hosi, loko u ri wena hakunene, lerisa leswaku ndzi ta kwalaho hi le henhla ka mati.”

²⁹ Yesu a ku ka yena: “Tana!” Kutani Petro a huma ebyatsweni, a famba ehenhla ka mati, a ya ka Yesu.

³⁰ Kambe loko a vona mheho, a khomiwa hi ku chava; kutani loko a sungula ku mbombomela, a huwelela a ku: “Hosi, ndzi ponise!”

³¹ Yesu a hatla a tshambuluta voko, a n'wi khoma, a ku ka yena: “Munhu wa ku pfumela lokutsongo, u kanakanile ha yini xana?”

³² Kuteloko va nghene ebyatsweni, mheho yi miyela.

³³ Kutani lava a va ri ebyatsweni va nkhinsamela Yesu, va ku: “Hakunene, u N'wana wa Xikwembu.”

Ta Yesu loko a hanyisa vavabyi eGenesareta

³⁴ Loko va pelele entsungeni, va fika etikweni ra Genesareta.

³⁵ Loko vanhu va kona va tivile leswaku hi yena Yesu, va rhumela rito ematlhelweni hinkwawo, kutani hinkwavo lava vabyaka va tisiwa eka yena.

³⁶ Vanhu va n'wi khongela leswaku a pfumelela vavabyi ku khumba hambi ma ri makumu ya xiambalo xa yena ntsena; kutani hinkwavo lava nga n'wi khumba, va hanyisiwa.