Matewu 1 - BIBELE Mahungu Lamanene

Xivongo xa Yesu Kriste

¹ Lexi i xivongo xa Yesu Kriste, n'wana Davhida, n'wana Abrahama:

² Abrahama a veleka Isaka, Isaka a veleka Yakobo, Yakobo a veleka Yuda na vamakwavo,

³ Yuda na Tamari va veleka Faresi na Zera, Faresi a veleka Esromo, Esromo a veleka Arama,

⁴ Arama a veleka Aminadaba, Aminadaba a veleka Nasoni, Nasoni a veleka Salmoni,

⁵ Salmoni na Rahava va veleka Bowazi, Bowazi na Rhuti va veleka Obede, Obede a veleka Yese, Yese a veleka hosi Davhida.

⁶ Davhida na loyi a a ri nsati wa Uriya va veleka Solomoni,

⁷ Solomoni a veleka Rhobuwamu, Rhobuwamu a veleka Abiya, Abiya a veleka Asafa,

⁸ Asafa a veleka Yoxafati, Yoxafati a veleka Yorama, Yorama a veleka Uziya,

⁹ Uziya a veleka Yohatama, Yohatama a veleka Akazi, Akazi a veleka Hezekiya,

¹⁰ Hezekiya a veleka Manase, Manase a veleka Amosi, Amosi a veleka Yosiya,

¹¹ Yosiya a veleka Yekoniya na vamakwavo, enkarhini lowu va yisiweke ha wona evukhumbini, eBabilona.

¹² Loko va yisiwile eBabilona, Yekoniya a veleka Salatiele, Salatiele a veleka Zerubabele,

¹³ Zerubabele a veleka Abiyudi, Abiyudi a veleka Eliyakimi, Eliyakimi a veleka Azori,

¹⁴ Azori a veleka Sadoki, Sadoki a veleka Akimi, Akimi a veleka Eliyudi,

¹⁵ Eliyudi a veleka Eliyazara, Eliyazara a veleka Matani, Matani a veleka Yakobo,

¹⁶ Yakobo a veleka Yosefa nuna wa Mariya, loyi Yesu la vuriwaka Kriste a velekiweke hi yena.

¹⁷ Hikwalaho ke, ku sukela eka Abrahama ku ya fika eka Davhida, tinxaka hinkwato i khume na mune; ku sukela eka Davhida ku ya fika enkarhini wa ku yisiwa eBabilona i tinxaka ta khume na mune; kutani ku sukela enkarhini wa ku yisiwa eBabilona ku ya fika eka Kriste, i tinxaka ta khume na mune.

Ta ku velekiwa ka Yesu

¹⁸ Ku velekiwa ka Yesu Kriste ku humelele hi mukhuva lowu: Loko Mariya mana wa yena a vutiwile hi Yosefa, o tshuka a tika hi Moya lowo Kwetsima va nga si hlangana.

¹⁹ Leswi Yosefa nuna wa yena a a ri munhu wo lulama, naswona a nga lavi ku n'wi khomisa tingana, a endla makungu ya ku n'wi tshika exihundleni.

²⁰ Loko a ha anakanya sweswo, ntsumi ya Hosi yi humelela eka yena hi norho, yi ku: “Yosefa n'wana Davhida, u nga chavi ku titekela Mariya nsati wa wena, hikuva leswi a nga na swona swi huma eka Moya lowo Kwetsima;

²¹ ú ta veleka n'wana wa mufana, kutani wena u ta n'wi thya vito ra Yesu, hikuva hi yena loyi a nga ta ponisa tiko rakwe eswidyohweni swa rona.”

²² Sweswo hinkwaswo swi humelele leswaku ku hetiseka leswi Hosi a yi swi vurile hi muprofeta loyi a nga te:

²³ “Maswivo, wanhwana ú ta tika, a veleka n'wana wa mufana; va ta n'wi thya vito ra ‘Emanuwele’ (hileswaku: ‘Xikwembu xi na hina’).”

²⁴ Loko Yosefa a pfukile evurhongweni, a endla hilaha ntsumi ya Hosi yi nga n'wi lerisa hakona, a titekela nsati wa yena.

²⁵ Kambe a nga n'wi tivanga ku ko ku velekiwa n'wana wa mufana, kutani a n'wi thya vito ra Yesu.