Marka 6 - BIBELE Mahungu Lamanene

Ta Yesu loko a nga amukeriwi eNazareta

¹ Yesu a suka kwalaho, a tlhelela etikweni ra rikwavo, kutani vadyondzisiwa va yena va famba na yena.

² Hi siku ra Savata a sungula ku dyondzisa esinagogeni, kutani lavo tala lava va n'wi yingisaka, va hlamala va ku: “Timhaka leti, ú ti kume kwihi ke? I vutlhari byihi lebyi a nyikiweke byona, leswi ni mahlori a kotaka ku ma endla hi mavoko ya yena xana?

³ Xana yoloyi a hi yena muvatli, n'wana Mariya, ni makwa Yakobo, na Yosi, na Yuda, na Simoni ke? Xana vamakwavo va yena va xisati a hi na vona kwala ke?” Kutani va vilela swinene hikwalaho ka yena.

⁴ Yesu a ku ka vona: “Muprofeta a nga soriwi, loko ku nga ri etikweni ra yena, ni karikwavo, ni le maxakeni ya yena.”

⁵ Kutani a tsandzeka ku endla mahlori kona, loko ku nga ri ku hanyisa vavabyi va nga ri vangani, hi ku va tlhandleka mavoko.

⁶ Naswona a hlamala hi ku vona leswaku a va nga ri na ku pfumela. Kutani a rhendzeleka ni miti leyi nga kusuhani, a ri karhi a dyondzisa.

Ta ku rhumiwa ka lava khume na vambirhi

⁷ A vitana lava khume na vambirhi, a va rhuma ha vambirhi-mbirhi, a va nyika matimba yo hlula mimoya ya thyaka.

⁸ A va lerisa leswaku va nga tshuki va longa nchumu xa ndlela loko ku nga ri nhonga ntsena; va nga teki timbuva ni nkwama, hambi yi ri mali eswikhwameni swa vona;

⁹ tintanghu tona va nga ambala, kambe va nga teki swiambalo swo ncinca.

¹⁰ A ku ka vona: “Loko mi nghena emutini, tshamani endyangwini lowu wu mi amukelaka, mi ko mi suka emutini wolowo.

¹¹ Hinkwako laha va alaka ku mi amukela ni ku mi yingisa, phumunhani ntshuri ehansi ka minkondzo ya n'wina loko mi huma, swi ta va vumbhoni eka vona.”

¹² Kuteloko va sukile, va dyondzisa vanhu erivaleni leswaku va hundzuka;

¹³ va hlongola mademona layo tala, va tota vavabyi lavo tala hi mafurha, va va hanyisa.

Ta ku fa ka Yohane Mukhuvuri

¹⁴ Hosi Heroda a a twile ta Yesu, hikuva vito ra yena a ri dumile ngopfu, naswona vanhu a va ku: “Yohane Mukhuvuri ú pfukile eku feni; hi swona leswi endlaka leswaku mintirho leyi ya matimba yi vonaka eka yena.”

¹⁵ Van'wana a va ku: “I Eliya.” Van'wana a va ku: “I muprofeta la fanaka na un'wana wa vaprofeta va khale.”

¹⁶ Kambe Heroda, loko a swi twa, a ku: “Hi ye Yohane loyi ndzi nga n'wi tsema nhloko. U lo pfuka eku feni.”

¹⁷ Heroda hi yena kunene loyi a a rhumile vanhu ku ya khoma Yohane, a va a n'wi boha ekhotsweni. A a endlile sweswo hikwalaho ka Herodiya, nkata Filipi makwavo, hikuva a a tekile wansati loyi;

¹⁸ kutani Yohane a a tshamela ku byela Heroda a ku: “A wu pfumeleriwi ku tekela makwenu ensati wa yena.”

¹⁹ Herodiya a a hlundzukele Yohane, a navela ku n'wi dlaya, kambe a a tsandzekile,

²⁰ hikuva Heroda a a chava Yohane, hi ku tiva leswaku i munhu wo lulama, la hlawulekeke; kutani a a n'wi lwela. Masiku hinkwawo loko a twa Yohane, a a kanakana swinene; hambiswiritano a a tsakela ku n'wi yingisa.

²¹ Kambe siku rinene ri fika, ra loko Heroda a endlela tihosana ta yena, ni tindhuna ta nyimpi, ni vakulukumba va Galeliya enkhuvo wa siku ra ku velekiwa ka yena.

²² Loko n'wana wa Herodiya wa xisati a nghena a cina, ú tsakisile Heroda ni lava tshameke eswakudyeni na yena. Hosi yi ku ka nhwanyana: “Kombela leswi u swi rhandzaka eka mina, ndzi ta ku nyika swona.”

²³ A engeta a n'wi hlambanyela hi matimba, a ku: “Leswi u nga ta swi kombela eka mina, ndzi ta ku nyika swona, hambi ku ri ku ku avanyisela hi le xikarhi tiko leri ndzi ri fumaka.”

²⁴ Nhwanyana a huma, a ya vutisa mana wa yena a ku: “Ndzi ta kombela yini xana?” Yena a ku: “Kombela nhloko ya Yohane Mukhuvuri!”

²⁵ Hi ku hatlisa ni mahika a nghena ka hosi, a kombela, a ku: “Ndzi lava leswaku u ndzi nyika nhloko ya Yohane Mukhuvuri enkambaneni, sweswi-sweswi.”

²⁶ Hosi yi khomiwa hi tingana ngopfu, kambe hikwalaho ka ku hlambanya ka yona, ni hikwalaho ka lava tshameke swakudyeni, a yi kotanga ku n'wi alela.

²⁷ Hosi yi hatla yi rhuma mulanguteri, yi lerisa leswaku ku tisiwa nhloko ya Yohane.

²⁸ Mulanguteri a famba, a ya n'wi tsema nhloko ekhotsweni, a tisa nhloko enkambaneni, a nyika nhwanyana; yena a nyika mana wa yena.

²⁹ Loko vadyondzisiwa va Yohane va swi twa, va ya teka ntsumbu wa yena, va ya wu lata esirheni.

Ta ku phameriwa ka vanhu va 5 000

³⁰ Vaapostola va ya hlangana na Yesu, va n'wi rungulela hinkwaswo leswi va swi endleke, ni leswi va swi dyondziseke.

³¹ Kambe a va nga ri na nkarhi wa ku dya, hikuva vanhu lavo tala a va ta, va tlhela va famba. Kutani Yesu a ku ka vona: “Tanani hi ya tshama hi ri hexe emananga, mi ta kota ku wisanyana.”

³² Kavaloko vadyondzisiwa va nghena ebyatsweni, va ya laha ku nga mananga va ri voxe.

³³ Kambe lavo tala va va vona loko va famba, va va tiva, kutani va huma emitini hinkwayo, va tsutsumela kwale hi milenge, va va rhangela emahlweni.

³⁴ Loko Yesu a huma ebyatsweni, a vona ntshungu lowukulu wa vanhu, a va twela vusiwana, hikuva a va fana ni tinyimpfu leti nga riki na murisi; kutani a va dyondzisa leswo tala.

³⁵ Leswi dyambu a ri rhengile, vadyondzisiwa va yena va n'wi tshinelela, va ku: “Lomu i mananga, naswona ri perile;

³⁶ va tlherise, va ya eswimitaneni ni le mitini leyi nge kusuhi, va ya tixavela swakudya.”

³⁷ A va hlamula, a ku: “Va phameleni n'wina!” Va ku ka yena: “Xana u ri hi ya va xavela swinkwa swa tidenari ta 200, hi ta va phamela ha swona xana?”

³⁸ Yena a ku ka vona: “Mi ni swinkwa swingani ke? Yanani mi ya languta.” Kuteloko va swi kambile, va ku: “I swinkwa swa ntlhanu, ni tinhlampfi timbirhi.”

³⁹ Hiloko a va lerisa ku tshamisisa vanhu hinkwavo hi mintlawa-ntlawa ebyanyini bya rihlaza.

⁴⁰ Kutani va tshama hi ku longoloka, va avene hi mintlawa ya vanhu va dzana ni ya vanhu va 50.

⁴¹ Kavaloko a teka swinkwa swa ntlhanu ni tinhlampfi timbirhi, a languta henhla etilweni, a nkhensa, a phema swinkwa, a nyika vadyondzisiwa va yena leswaku va swi veka emahlweni ka vanhu, ni tinhlampfi timbirhi a ti avela hinkwavo.

⁴² Va dya hinkwavo, va xurha.

⁴³ Kutani va rholela mahlanhla ni swihluvi swa tinhlampfi va tata swirhundzu swa 12.

⁴⁴ Vanhu lava dyeke swinkwa a va ringana 5 000.

Ta Yesu loko a famba ehenhla ka mati

⁴⁵ Endzhaku ka sweswo, Yesu a lerisa vadyondzisiwa va yena leswaku va nghena ebyatsweni, va pfa va ya entsungeni, le Betsayida, loko yena a ri karhi a tlherisa ntshungu.

⁴⁶ Kuteloko a lelanile ni vanhu, a ya entshaveni ku ya khongela kona.

⁴⁷ Nimadyambu, byatso a byi ri exikarhi ka lwandle, yena a ha ri entsungeni a ri swakwe.

⁴⁸ Kutani a va vona va karhateka ngopfu hi ku tluta, hikuva mheho a yi va sivela; kakuloko ku lava ku va nkarhi wa mahlamba-ndlopfu, a ta ka vona, a ri karhi a famba ehenhla ka lwandle, a endla onge ú hundzela emahlweni.

⁴⁹ Loko va n'wi vona a famba ehenhla ka lwandle, va anakanya leswaku i xipuku, kutani va huwelela;

⁵⁰ a va n'wi vonile hinkwavo, kutani a va tshukile ngopfu; kambe a hatla a vulavula na vona, a ku: “Tiyisani timbilu, hi mina mi nga chaveni!”

⁵¹ Kutani a nghena ebyatsweni laha a va ri kona; hiloko mheho yi miyela, kutani va hlamala ngopfu,

⁵² hikuva a va nga twisisanga swa mahlori ya swinkwa, naswona timbilu ta vona a ti ri leto nonon'hwa.

Ta Yesu loko a hanyisa vavabyi eGenesareta

⁵³ Kuteloko va pelele entsungeni, va fika etikweni ra Genesareta, kutani va xikela eribuweni.

⁵⁴ Loko va ri karhi va huma ebyatsweni, vanhu va kona va hatla va tiva Yesu,

⁵⁵ kutani va tsutsuma-tsutsuma na tiko rero hinkwaro, va tisa hi vuhlaka vanhu lava vabyaka, hinkwako lomu a va twa leswaku Yesu ú kona.

⁵⁶ Hinkwako laha a a nghena kona, eswimitaneni ni le mitini ni le tikweni, vanhu a va lata lava vabyaka emintsendzeleni, kutani va n'wi khongela leswaku a va pfumelela ku khumba hambi ma ri makumu ya nguvu ya yena ntsena; kutani hinkwavo lava va n'wi khumbeke, a va hanyisiwa.