Marka 5 - BIBELE Mahungu Lamanene

Ta ku hanyisiwa ka Mugerasi loyi a a ri ni moya wa thyaka

¹ Kutani va fika entsungeni wa lwandle, etikweni ra Vagerasi.

² Loko Yesu a ha ku huma ebyatsweni, kan'we kan'we munhu un'wana loyi a a ri ni moya wa thyaka, la humaka hi le masirheni, a hlangana na yena.

³ A a tshama emasirheni, kutani a ku nga ri na munhu la kotaka ku n'wi boha, hambi ku ri hi tinketani;

⁴ hakanyingi, a a bohiwa mavoko ni milenge, kambe a a tshovile tinketani ta kona, kutani a ku nga ri na munhu loyi a a ri ni matimba yo n'wi hlula.

⁵ Hi masiku hinkwawo, vusiku ni nhlekanhi, a a tshama emasirheni ne tintshaveni, a ri karhi a huwelela, a tixekelela hi maribye.

⁶ Kuteloko a vonile Yesu, a ha ri kule, a tsutsuma, a ya n'wi nkhinsamela;

⁷ kutani a huwelela hi rito leri tlakukeke, a ku: “Mhaka ya mina na wena hi yihi ke, wena Yesu N'wana wa Xikwembu xa le henhla-henhla? Ndza ku khongela hi vito ra Xikwembu, u nga ndzi xanisi!”

⁸ (A a vula sweswo, hikuva Yesu a a te ka yena: “Huma eka munhu loyi, we moya wa thyaka!”)

⁹ Kutani Yesu a n'wi vutisa, a ku: “Vito ra wena u mani?” A hlamula a ku: “Vito ra mina ndzi Vandla, hikuva hi tele.”

¹⁰ Kutani a khongela Yesu a ku: “U nga hi hlongoli hi huma etikweni leri!”

¹¹ Kambe a ku ri ni ntlhambi lowukulu wa tinguluve emagangeni, leti a ti ri eku dyeni,

¹² kutani mimoya yoleyo ya thyaka yi khongela Yesu, yi ku: “Wa nga hi rhumela etingulubyeni, hi ya nghena eka tona.”

¹³ Yena a yi pfumelela. Kavaloko mimoya ya thyaka yi huma, yi nghena etingulubyeni, kutani ntlhambi wolowo wu tsutsumela eriweni, wu ya tihoxa exidziveni; tinguluve a ti lava ku ringana 2 000, kutani ti nwela kona.

¹⁴ Varisi va tona va baleka, va ya rungulela va muti ni va le masin'wini, kutani vona va ta, va ta vona leswi humeleleke.

¹⁵ Kuteloko va fikile eka Yesu, va vona loyi a a ngheniwile hi vandla ra mademona a tshamile, a ambele a ri munhu, kutani va chava ngopfu.

¹⁶ Lava swi voneke va va hlamusela leswi humeleleke eka munhu loyi wa mademona, ni le ka tinguluve.

¹⁷ Hiloko vona va khongela Yesu leswaku a suka etikweni ra vona.

¹⁸ Loko Yesu a ri karhi a nghena ebyatsweni, munhu loyi a a ri na mademona a kombela hi matimba leswaku a pfumeleriwa ku famba na yena.

¹⁹ Kambe Yesu a nga n'wi pfumelelanga, ntsena ú te ka yena: “Famba, u ya ekaya eka varikwenu, u ya va tivisa hinkwaswo leswi Hosi yi ku endleleke swona ni hilaha yi ku tweleke vusiwana hakona.”

²⁰ Kavaloko a suka, a ya etikweni ra Dekapolisi, a ya twarisa hinkwaswo leswi Yesu a n'wi endleleke swona; kutani hinkwavo va hlamala.

Ta n'wana Yayiro, ni ta wansati la khumbeke nguvu ya Yesu

²¹ Kuteloko Yesu a tlhelele entsungeni hi byatso, ntshungu lowukulu wu ta hlengeletana ka yena, kusuhi ni lwandle.

²² Kutani ku fika un'wana wa varhangeri va sinagoga loyi a va ku i Yayiro. Loko a n'wi vona, a tiwisela emilengeni ya yena,

²³ a n'wi khongela ngopfu, a ku: “N'wana wa mina wa wanhwanyana wa fa. Wa nga ta, u ta n'wi tlhandleka mavoko leswaku a pfuka a hanya.”

²⁴ Kutani Yesu a famba na yena; ntshungu lowukulu a wu n'wi landzelela, wu n'wi kamanyeta.

²⁵ Kambe a ku ri ni wansati loyi a a ri ni vuvabyi bya ngati, a vabyile malembe ya 12;

²⁶ a a xanisekile ngopfu emavokweni ya tin'anga leto tala; a a hetile xuma xa yena hinkwaxo, kambe a swi n'wi pfunanga nchumu, hikuva vuvabyi a byi ya byi kula.

²⁷ Hi ku twa ta Yesu, a ta entshungwini hi le ndzhaku ka yena, a khumba nguvu ya yena, hikuva a a te:

²⁸ “Loko ndzi nga khumba nguvu ya yena ntsena, ndzi ta hanyisiwa.”

²⁹ Kutani hi nomu lo ngati ya yena yi yima yi nga ha humi, a titwa emirini wa yena leswaku vuvabyi bya yena byi horile.

³⁰ Kan'we kan'we Yesu a titwa leswaku ku humile matimba man'wana eka yena, kutani a hundzulukela ka ntshungu, a ku: “I mani la khumbeke nguvu ya mina?”

³¹ Vadyondzisiwa va yena va ku ka yena: “Wa wu vona ntshungu lowu wu ku kamanyetaka; xana u vutisela yini leswaku: ‘Ndzi khumbe hi mani’ xana?”

³² Yena a rhalarhala hinkwako ku vona loyi a swi endleke.

³³ Kutani wansati yoloye a khomiwa hi ku chava, a rhurhumela hi ku tiva leswi swi n'wi humeleleke, kutani a ta, a tiwisela hansi emahlweni ka yena, a n'wi byela ntiyiso hinkwawo.

³⁴ Yesu a ku ka yena: “N'wananga, ku pfumela ka wena ku ku hanyisile, famba hi ku rhula, ntshunxeka enhlomulweni wa wena.”

³⁵ A ku a ha vulavula, vanhu lava humaka ekaya ka murhangeri wa sinagoga va fika va byela murhangeri wa kona va ku: “N'wana wa wena ú file, wa ha n'wi karhatela yini Mudyondzisi ke?”

³⁶ Kambe Yesu a nga landzelelanga marito lawa, kutani a ku ka murhangeri wa sinagoga: “U nga chavi, pfumela ntsena.”

³⁷ Kutani a nga pfumelelanga munhu ku n'wi heleketa, loko va nga ri va Petro, na Yakobo, na Yohane makwa Yakobo.

³⁸ Loko va fika emutini wa murhangeri wa sinagoga, Yesu a kuma ku ri ni pongo lerikulu, van'wana va rila swinene, van'wana va ba nkalanga.

³⁹ Hiloko a nghena, a ku ka vona: “Mi bela yini pongo leri, mi rilela yini? Nhwanyana loyi a nga fanga, ú lo etlela.”

⁴⁰ Kutani va n'wi hleka, kambe Yesu a va humesela handle hinkwavo, a teka tata wa nhwanyana ni mana wa yena, ni vadyondzisiwa lavanharhu, a nghena laha nhwanyana a a latiwile kona.

⁴¹ Kutani a khoma nhwanyana hi voko, a ku ka yena: “Talita, kumi!” hileswaku: “Nhwanyana, ndzi ri ka wena, pfuka!”

⁴² Kan'we kan'we nhwanyana a pfuka, a famba-famba (malembe ya yena a ma ringana 12); kwalaho vanhu va hlamala hi ku hlamala lokukulu.

⁴³ Kambe Yesu a va laya swinene leswaku swi nga tshuki swi tiviwa hi munhu; kutani a ku: “N'wi nyikeni swakudya.”