Marka 3 - BIBELE Mahungu Lamanene

Ta munhu loyi a khwanyaleke voko

¹ Yesu a tlhela a nghena esinagogeni; kwalaho a ku ri ni munhu la khwanyaleke voko.

² Kutani Vafarisi va xiya Yesu ku vona loko a ta hanyisa munhu loyi hi siku ra Savata, leswaku va ta kota ku n'wi veka nandzu.

³ Kavaloko a ku ka munhu la khwanyaleke voko: “Suka, u yima la xikarhi.”

⁴ Kutani a ku ka vona: “Leswi lulameke ku endliwa hi Savata hi swihi xana: Ku endla leswinene kumbe ku endla leswo biha, ku hanyisa munhu kumbe ku n'wi dlaya xana?” Kambe va miyela.

⁵ Yesu a va rhalarhala hi mahlo a hlundzukile, a vavisekile hi ku nonon'hwa ka timbilu ta vona, kutani a ku ka munhu loyi: “Tshambuluta voko ra wena.” A ri tshambuluta, kutani voko ra yena ri tlhela ri ololoka.

⁶ Kutani Vafarisi va huma esinagogeni, va ya n'wi tshama xikungu swin'we ni va ntlawa wa Heroda, ku vona hilaha va nga ta n'wi dlaya hakona.

Ta ntshungu eribuweni ra lwandle

⁷ Yesu a suka a ya kusuhi ni lwandle swin'we ni vadyondzisiwa va yena, kutani ntshungu lowukulu wu n'wi landza, wu huma eGaleliya, van'wana va huma eYudiya,

⁸ na Yerusalema, na Idumiya, ni le ntsungeni wa Yordani, ni le matikweni ya Tiri na Sidoni. A va tshirimukela ka yena hi ku twa leswikulu leswi a swi endleke.

⁹ Kutani a lerisa vadyondzisiwa va yena leswaku byatso byi tshama byi yimelerile kusuhi, leswaku ntshungu wu nga n'wi kamanyeti.

¹⁰ Hinkwavo lava a va ri ni mavabyi a va kamanyetana ku ya eka yena leswaku va ta n'wi khumba, hikuva a a hanyisile lavo tala.

¹¹ Na vona lava a va ri ni mimoya ya thyaka, loko va n'wi vona, a va nkhinsama emahlweni ka yena, va huwelela, va ku: “U N'wana wa Xikwembu!”

¹² Kambe Yesu a a laya mimoya hi matimba leswaku yi nga tshuki yi n'wi twarisa.

Ta Yesu loko a hlawula vaapostola va khume na vambirhi

¹³ Kutani Yesu a tlhandlukela entshaveni, a tivitanela lava a va rhandzaka; hiloko va ta eka yena.

¹⁴ A hlawula khume na vambirhi leswaku va va na yena, ni leswaku a ta va rhuma ku twarisa Evhangeli,

¹⁵ a va nyika ni matimba ya ku hlongola mademona.

¹⁶ Vaapostola va khume na vambirhi lava a nga va hlawula hi lava: I Simoni (loyi a nga n'wi thya vito ra Petro),

¹⁷ na Yakobo na Yohane vana va Zebediya (lava a nga va thya vito ra Bowanergesi, hileswaku “va-ka-dzindzatilo”),

¹⁸ ku landza Andriya, na Filipi, na Bartolomi, na Matewu, na Tomasi, na Yakobo n'wana Alfiya, na Tadiya, na Simoni wa Kanana,

¹⁹ na Yudasi Iskariyota, loyi a xengeke Yesu.

Ta Yesu na Belzebule

²⁰ Loko Yesu a tlhelele emutini, ntshungu wu engeta wu hlengeletana kona, vanhu va ko va tsandzeka ni ku dya swakudya.

²¹ Loko varikwavo va twa sweswo, va ta hi le kaya va ta n'wi teka, hikuva vanhu a va ku: “Ú hlangene nhloko.”

²² Na vona vatsari lava rheleleke va huma eYerusalema, a va ku: “Ú fumiwa hi Belzebule, naswona ú hlongola mademona hi hosi ya mademona.”

²³ Kuteloko Yesu a va vitanile, a vulavula na vona hi swifaniso, a ku: “Xana Sathana a nga swi kotisa ku yini ku hlongola Sathana ke?

²⁴ Naswona, loko mfumo wu avana hi le xikarhi, mfumo lowu a wu koti ku tiya.

²⁵ Ni loko ndyangu wu avene hi le xikarhi, ndyangu wolowo a wu nga tiyi.

²⁶ Na yena Sathana, loko a tilwisa, a avana hi le xikarhi, a nga ka a nga tiyi, ku ta va ku hela ka yena.

²⁷ A ku na munhu loyi a kotaka ku nghena endlwini ya nhenha ya matimba ku ya phangha xuma xa yona, a nga si rhanga a boha nhenha yoleyo; hi kona a nga ta phangha swa yindlu ya yona.

²⁸ “Ndzi tiyisile ndzi ri ka n'wina: Loko vanhu va dyohela Xikwembu kumbe loko va xi sandza, va nga rivaleriwa;

²⁹ kambe loyi a nga ta sandza Moya lowo Kwetsima a nga ka a nga rivaleriwi ni siku ni rin'we; hileswaku ú ni nandzu wa xidyoho lexi nga heriki.”

³⁰ A a vurisa sweswo, hikuva a va ku: “Ú ni moya wa thyaka.”

Ta mana wa Yesu ni vamakwavo

³¹ Mana wa Yesu ni vamakwavo va ta, va yima handle, va rhuma van'wana ku ya n'wi vitana.

³² Kambe ntshungu a wu tshamile, wu n'wi rhendzerile. Kutani va ku ya yena: “Vona, mana wa wena ni vamakwenu va kona la handle, va ku lava.”

³³ A va hlamula a ku: “Manana ni vamakwerhu i vamani?”

³⁴ Kutani Yesu a languta vanhu lava a va n'wi rhendzerile, a ku: “Langutani, manana ni vamakwerhu, hi volava;

³⁵ hikuva un'wana ni un'wana la endlaka ku rhandza ka Xikwembu, hi yena makwerhu wa xinuna, ni wa xisati, na manana.”