Marka 16 - BIBELE Mahungu Lamanene

Ta ku pfuka ka Yesu eku feni

¹ Loko siku ra Savata ri hundzile, Mariya wa Magadala, na Mariya mana wa Yakobo, na Salome, va xava mirhi leyo nun'hwela ku ya n'wi tota ha yona.

² Nimpundzu wa siku leri ra Sonto, eku humeni ka dyambu, va ya esirheni.

³ A va ri karhi va vutisana, va ku: “I mani la nga ta hi vumbuluxela ribye, a ri susa enon'weni wa sirha ke?”

⁴ Kambe loko va tlakusa mahlo, va vona leswaku ribye ri vumbuluxiwile, kasi a ri ri lerikulu ngopfu.

⁵ Loko va nghenile esirheni, va vona jaha leri tshameke etlhelweni ra xinene, ri ambele nguvu yo leha yo basa; kutani va hlamala.

⁶ Kambe jaha ri ku ka vona: “Mi nga hlamaleni; Yesu wa Nazareta la vambiweke, loyi mi n'wi lavaka, ú pfukile, a nga kona la; laha a va n'wi vekile kona hi kwala.

⁷ Fambani, mi ya tivisa vadyondzisiwa va yena, na Petro, leswaku wa mi rhangela ku ya eGaleliya; hi kona laha mi nga ta n'wi vona kona, hilaha a mi byeleke hakona.”

⁸ Vavasati va huma esirheni, va tsutsuma va khomiwe hi ku rhurhumela ni ku hloleriwa; kutani a va vulanga nchumu eka munhu ni un'we hikuva a va chavile. [

Ta Yesu loko a tikomba eka Mariya wa Magadala

⁹ Loko Yesu a pfukile eku feni, empundzwini wa siku lero sungula ra vhiki, a rhanga a tikomba eka Mariya wa Magadala, a nga wansati loyi Yesu a a hlongorile mademona ya 7 eka yena.

¹⁰ Mariya a ya tivisa vadyondzisiwa lavan'wana va Yesu lava a va ri enkosini, va n'wi rila;

¹¹ loko vona va twa leswaku Yesu wa hanya, ni leswaku ú voniwile hi Mariya, a va swi kholwanga.

Ta Yesu loko a tikomba eka vadyondzisiwa vambirhi

¹² Endzhaku ka swona, a tikomba hi xivumbeko xin'wana eka vambirhi va vona, loko va ri endleleni va timukela.

¹³ Vona va tlhela, va ya rungulela lavan'wana, kambe na vona lava a va va kholwanga.

Ta Yesu loko a rhuma vadyondzisiwa va 11

¹⁴ Eku heteleleni, Yesu a tikomba eka lava khume na un'we loko va ri eku dyeni; kutani a va sola hi leswi a va kala ku pfumela ni leswi a va ri ni timbilu to nonon'hwa, hikuva a va nga pfumelanga lava va n'wi voneke loko a pfukile eku feni.

¹⁵ Kutani a ku ka vona: “Yanani emisaveni hinkwayo, mi ya twarisa Evhangeli eka swivumbiwa hinkwaswo.

¹⁶ La nga ta pfumela, a vuya a khuvuriwa, ú ta ponisiwa; kambe la nga pfumeriki, ú ta avanyisiwa.

¹⁷ Mahlori lama nga ta endliwa hi lava pfumelaka hi lawa: Hi vito ra mina va ta hlongola mademona; va ta vulavula tindzimi letintshwa;

¹⁸ va ta khoma tinyoka hi mavoko; kutani hambi va nga nwa leswi dlayaka, swi nga ka swi nga va endli nchumu; va ta tlhandleka mavoko ehenhla ka lava vabyaka, va va hanyisa.”

Ta ku tlhandluka ka Yesu

¹⁹ Kuteloko Hosi Yesu a vulavurile na vona, a tlakuriwa a ya etilweni, a ya tshama evokweni ra xinene ra Xikwembu.

²⁰ Loko va ri vona, va suka va famba, va ya twarisa Evhangeli hinkwako, Hosi yi ri karhi yi tirhisana na vona, yi tiyisa marito ya vona hi mahlori lawa a ma humelela enkarhini wolowo.]