Marka 13 - BIBELE Mahungu Lamanene

Ta Yesu loko a tivisa ku onhaka ka Tempele

¹ Loko Yesu a ha ku huma eTempeleni, un'wana wa vadyondzisiwa va yena a ku ka yena: “Mudyondzisi, languta ku kula ni ku hlamarisa ka maribye lawa ni ka tindlu leti!”

² Yesu a n'wi hlamula a ku: “Xana wa ti vona tindlu letikulu leti ke? A ku nga sali ribye ehenhla ka ribye rin'wana; hinkwawo ma ta hindzimuxiwa.”

Ta masungulo ya makhombo

³ Kuteloko a tshamile eNtshaveni ya Mitlhwari, a langutene ni Tempele, Petro na Yakobo swin'we na Yohane na Andriya, va n'wi tekela tlhelo, va n'wi vutisa va ku:

⁴ “Hi byele, xana timhaka leti ti ta humelela rini xana? Ni xikombiso xi ta va xihi xa leswaku hinkwaswo leswi swi le kusuhi ni ku humelela ke?”

⁵ Hiloko Yesu a sungula ku va dyondzisa a ku: “Tivoneleni leswaku mi nga tshuki mi xisiwa hi munhu.

⁶ Lavo tala va ta ta hi vito ra mina, un'wana ni un'wana a ku: ‘Mina ndzi yena’, kutani va ta xisa lavo tala.

⁷ Kutaku loko mi twa huwa ya tinyimpi ni mahungu-ndlela ya tinyimpi, mi nga chaveni, hikuva sweswo swi fanela ku humelela; kambe a hi wona makumu.

⁸ Tiko rin'wana ri ta pfukela tiko rin'wanyana, mfumo wun'wana wu ta lwa ni mfumo wun'wanyana; ku tsekatseka ka misava ku ta va kona ematlhelweni layo tala, ni tindlala ti ta va kona. Sweswo i ku sungula ka mahlomulo.

⁹ “Loko mi ri n'wina, tivoneleni; va ta mi nyiketa etihubyeni; mi ta biwa emasinagogeni, mi ta yimisiwa emahlweni ka tindhuna ni tihosi hikwalaho ka mina, mi va timbhoni eka tona.

¹⁰ Kambe Evhangeli yi fanele ku rhanga yi twarisiwa ematikweni hinkwawo.

¹¹ Kutani siku va nga ta mi khoma, va mi yisa eku avanyisiweni, mi nga tshuki mi vilela hi leswi mi nga ta vula swona, kambe vulani leswi mi nga ta nyikiwa swona enkarhini wolowo, hikuva a hi n'wina mi nga ta vulavula, kambe i Moya lowo Kwetsima.

¹² “Munhu ú ta nyiketa makwavo eku dlaweni, tatana ú ta endlisa sweswo eka n'wana wa yena; ni vana va ta pfukela vatswari va vona, va va dlaya.

¹³ Mi ta vengiwa hi vanhu hinkwavo hikwalaho ka vito ra mina, kambe loyi a tiyiselaka ku fika makumu hi yena loyi a nga ta ponisiwa.

Ta ku xaniseka lokukulu

¹⁴ “Kutaku loko mi vona ‘xilo xa manyala lexi onhetelaka’ xi ri laha xi nga faneriki ku va kona (la hlayaka a a twisise), enkarhini wolowo, lava nge Yudiya a va tsutsumele etintshaveni;

¹⁵ la nge henhla ka lwangu, a nga tshuki a xika ku ya nghena ndlwini a ya teka xa nchumu kona;

¹⁶ la nge masin'wini, a nga tshuki a tlhelela kaya ku ya teka xiambalo xa yena.

¹⁷ Va ta va ni khombo vavasati lava tikeke ni lava mamisaka eminkarhini yoleyo.

¹⁸ Khongelani leswaku swilo leswi swi nga humeleri hi vuxika.

¹⁹ Hikuva eminkarhini yoleyo, ku ta va ni nhlomulo lowu nga si tshamaka wu humelela, hi mpfhuka Xikwembu xi tumbuluxa hinkwaswo, ku fikela namuntlha; naswona nhlomulo lowo tano wu nga ka wu nga ha vi kona.

²⁰ Loko Hosi a yi nga hungutanga masiku walawo, a ku nga ta pona munhu ni un'we; kambe yi ma hungutile hikwalaho ka vahlawuriwa va yona.

²¹ “Enkarhini wolowo, loko munhu a mi byela a ku: ‘Vonani, Mesiya hi loyi’, kumbe: ‘Hi luya’, mi nga tshuki mi pfumela;

²² hikuva ku ta humelela Vamesiya va mavunwa, ni vaprofeta va mavunwa; va ta endla mahlori ni swihlamariso ku hambukisa na vona vahlawuriwa va Xikwembu, loko swi endleka.

²³ Loko mi ri n'wina, tlharihani! Ndzi mi byerile hinkwaswo swi nga si humelela.

Ta ku humelela ka N'wana-wa-Munhu

²⁴ “Eminkarhini yoleyo, endzhaku ka nhlomulo wolowo, “ ‘dyambu ri ta hundzuka ntima, ni n'weti a wu nga ha voningi;

²⁵ tinyeleti ti ta wa hi le tilweni, ni leswa matimba swa le matilweni swi ta dzinginisiwa.’

²⁶ “Hi kona a nga ta vona N'wana-wa-Munhu a ta hi mapapa, a ri ni matimba lamakulu ni ku kwetsima.

²⁷ Kutani ú ta rhuma tintsumi ta yena ku ta hlengeleta vahlawuriwa va yena; va ta huma ematlhelweni ya mune ya misava, ku sukela emakun'wini ya yona ku yisa emakun'wini ya tilo.

Dyondzo ya murhi wa nkuwa

²⁸ “Dyondzani leswi hi murhi wa nkuwa: Loko marhavi ya wona ma sungula ku olova ni loko matluka ya wona ma hluka, mi tiva leswaku ximumu xi le kusuhi.

²⁹ Hi mukhuva wolowo, loko mi vona swilo sweswo swi humelela, tivani leswaku nkarhi wu le kusuhi, wu le nyangweni.

³⁰ Ndzi tiyisile ndzi ri ka n'wina: Rixaka leri ri nga ka ri nga hundzi, ku nga si humelela swilo leswi hinkwaswo.

³¹ Tilo ni misava swi ta hundza, kambe marito ya mina ma nga ka ma nga hundzi.

A ku na munhu la tivaka siku ni nkarhi

³² “Loko ri ri siku ra kona ni nkarhi wa kona, a ku na loyi a swi tivaka, hambi ti ri tintsumi ta le tilweni, hambi a ri N'wana; swi tiviwa hi Tatana ntsena.

³³ Tlharihani mi hiteka, hikuva a mi tivi leswaku nkarhi wu ta va rini.

³⁴ Swi fana ni munhu loko a endza, a suka emutini wa yena, a siyile hinkwaswo emavokweni ya malandza ya yena, un'wana ni un'wana entirhweni wa yena, a lerisile ni mulanguteri wa nyangwa leswaku a hiteka.

³⁵ Hitekani ke, hikuva a mi tivi nkarhi lowu n'wini wa muti a nga ta ta ha wona; ku nga va nimadyambu, kumbe nivusiku lebyikulu, kumbe loko nkuku wu ringa, kumbe nimixo;

³⁶ loko a fika hi xitshuketa, a nga mi kumi mi etlele.

³⁷ Kutani leswi ndzi mi byelaka swona, ndzi byela hinkwavo, ndzi ri: Hitekani!”