Marka 12 - BIBELE Mahungu Lamanene

Xifaniso xa nsimu ya vhinya ni vatirhi

¹ Yesu a vulavula na vona hi swifaniso, a ku: “Munhu un'wana a a byarile mirhi ya vhinya ensin'wini ya yena, a yi biyela hi rihlampfu, a cela xikamelo xo pyanyela kona mihandzu, a aka ni xihondzo; kutani a lerisa vatirhi ku sala va swi vona, yena a teka riendzo a famba.

² Hi nkarhi wa kona, a rhuma nandza eka vatirhi, leswaku a ya teka mihandzu yin'wana ya vhinya eka vona.

³ Kambe va n'wi khoma, va n'wi ba, kutani va n'wi tlherisa a nga ri na nchumu.

⁴ A tlhela a rhuma nandza un'wana; kambe yena, va n'wi balesa nhloko, va n'wi khomisa ni tingana.

⁵ A engeta a rhuma un'wanyana; yena, va khoma va dlaya. A rhuma van'wana lavo tala; ku biwa van'wana, van'wana va dlawa.

⁶ A a sele na un'we ntsena, a nga n'wana wa yena la rhandziwaka; kutani a n'wi rhuma ku ya ka vona a ri yena wo hetelela, a ku: ‘Va ta chava n'wana wa mina.’

⁷ Kambe vatirhi va byelana va ku: ‘Mudyandzhaka hi loyi; tanani hi n'wi dlaya, ndzhaka yi ta va ya hina.’

⁸ Kutani va n'wi khoma, va n'wi dlaya, va n'wi cukumeta ehandle ka nsimu ya vhinya.

⁹ Xana n'wini wa nsimu ú ta endla yini ke? Ú ta ta, a ta lovisa vatirhi lava, kutani nsimu ya vhinya, ú ta yi nyika van'wana.

¹⁰ Xana a mi si tshama mi hlaya tsalwa leri nge: “ ‘Ribye leri vaaki va nga ri nyenya, hi rona leri nga endliwa ribye lerikulu ra yinhla’ xana?

¹¹ ‘Swilo leswi swi endliwile hi Hosi, i mhaka leyi hlamarisaka loko hi yi languta!’ ”

¹² A va navela ku n'wi khoma, hikuva a va swi vonile leswaku a a vula vona hi xifaniso lexi; kambe a va chava ntshungu, kutani va n'wi tshika, va hangalaka.

Ta ku humesela Khezari endzuvo

¹³ Vafarisi ni va ntlawa wa Heroda va rhuma van'wana va vona eka Yesu, leswaku va ya n'wi phasa hi xivutiso.

¹⁴ Kutani va ta, va ta ku ka yena: “Mudyondzisi, ha swi tiva leswaku u vula ntiyiso, ni leswaku a wu landzeleli swa vanhu, hikuva a wu yi hi nghohe, kambe u dyondzisa ndlela ya Xikwembu hi ntiyiso. Xana swa fanela ku humesela Khezari endzuvo, kambe a swi faneli ke? Xana ha humesa, kumbe a hi humesi ke?”

¹⁵ Kambe Yesu, hi ku tiva vukanganyisi bya vona, a ku ka vona: “Mi ndzi ringela yini? Ndzi tiseleni denari ndzi yi vona.”

¹⁶ Va yi tisa. Kutani a ku ka vona: “Xifaniso lexi i xa mani ke? Ni vito leri i ra mani ke?” Vona va ku: “I swa Khezari.”

¹⁷ Hiloko Yesu a ku: “Nyikani Khezari leswi nga swa Khezari, ni Xikwembu leswi nga swa Xikwembu.” Kutani va hlamala ngopfu hi ku hlamula ka yena.

Xivutiso ehenhla ka ku pfuka eku feni

¹⁸ Vasaduki a va vula leswaku vafi va nge pfuki, kutani siku rin'wana van'wana va vona va ta eka Yesu, va fika va n'wi vutisa va ku:

¹⁹ “Mudyondzisi, Muxe ú hi tsalele leswi: ‘Loko munhu a fa a siya nsati, kambe a nga si va ni n'wana, makwavo ú ta hlayisa nsati wa mufi, a pfuxa ndyangu wa makwavo.’

²⁰ Kutani mhaka hi leyi: A ku ri ni vamakwavo va xinuna va 7; lowa hosi a teka nsati, kutani a fa, a nga si va ni vana.

²¹ Lowa vumbirhi a hlayisa nsati wa mufi, kutani na yena a fa, a nga si va ni vana; ni ka lowa vunharhu swi va tano.

²² Hinkwavo va 7 va fa va nga si va ni vana. Endzhaku ka vona hinkwavo, wansati na yena a fa.

²³ Leswi lava 7 hinkwavo va veke vanuna va wansati loyi, xana ú ta va nsati wa mani exikarhi ka vona, loko va pfuka esikwini ra ku pfuka eku feni, xana?”

²⁴ Yesu a va hlamula a ku: “Mi lahlekile ngopfu, hikuva a mi tivi Matsalwa ni matimba ya Xikwembu!

²⁵ Loko vanhu va pfuka eku feni, a va ha teki, hambi ku ri ku tekiwa, kambe va fana ni tintsumi ematilweni.

²⁶ Loko va ri vafi ni ku pfuka ka vona, xana a mi hlayanga ta vona ebukwini ya Muxe xana? Loko Xikwembu xi vulavule na yena exihlahleni, xi te: ‘Hi mina Xikwembu xa Abrahama, ni Xikwembu xa Isaka, ni Xikwembu xa Yakobo!’

²⁷ Xona a hi Xikwembu xa vafi, kambe i Xikwembu xa lava hanyaka. Mi lahlekile ngopfu.”

Ta nsinya wa milawu

²⁸ Un'wana wa vatsari a ta fika kwalaho a va twa va ri karhi va kanetana; kutani loko a vona leswaku Yesu ú va hlamurile swinene, a n'wi vutisa a ku: “Nawu lowo rhanga eka milawu hinkwayo hi wihi xana?”

²⁹ Yesu a n'wi hlamula, a ku: “Nawu lowo rhanga hi lowu nge: ‘Yingisa we Israele, Hosi Xikwembu xa hina i Hosi yi ri yoxe, a ku na yin'wana.

³⁰ Rhandza Hosi Xikwembu xa wena hi mbilu ya wena hinkwayo, ni moya wa wena hinkwawo, ni ku anakanya ka wena hinkwako, ni matimba ya wena hinkwawo.’

³¹ Nawu wa vumbirhi hi lowu nge: ‘Rhandza munhu-kuloni, kukota loko u tirhandza.’ A ku na nawu wun'wana lowu tlulaka milawu yoleyo.”

³² Mutsari a ku ka yena: “Hiswona Mudyondzisi, u vule ntiyiso loko u te: ‘Hosi Xikwembu i Hosi yi ri yoxe’, ni leswaku: ‘A ku na yin'wana ehandle ka yona.’

³³ Loko ku ri ‘ku rhandza Hosi Xikwembu hi mbilu hinkwayo, ni ku anakanya hinkwako, ni matimba hinkwawo’, swin'we ni ‘ku rhandza munhu-kulobye, tanihi loko munhu a tirhandza’, swi tlula magandzelo hinkwawo lama hisiwaka ni timhamba hinkwato.”

³⁴ Loko Yesu a vona leswaku mutsari ú hlamule hi ku tlhariha, a ku ka yena: “A wu le kule ni Mfumo wa Xikwembu.” Kutani a ka ha vanga na munhu la nga tiya nhlana ku n'wi vutisa.

Xivutiso ehenhla ka n'wana Davhida

³⁵ Loko Yesu a ri karhi a dyondzisa eTempeleni, a vutisa vanhu a ku: “Vatsari va vurisa ku yini loko va ku: ‘Mesiya i n'wana Davhida’ ke?

³⁶ Kasi yena Davhida ú vurile hi Moya lowo Kwetsima, a ku: “ ‘Hosi Xikwembu xi te ka N'wini wanga: Tana u ta tshama evokweni ra mina ra xinene, ndzi ko ndzi veka valala va wena ehansi ka minkondzo ya wena.’

³⁷ “Kutani loko Davhida a vula Mesiya a ku i N'wini wa yena, xana a nga va n'wana wa yena hi ndlela yihi ke?” Ntshungu lowukulu a wu n'wi yingisa hi ku tsaka.

Ta Yesu loko a sandza vatsari

³⁸ Yesu loko a ri karhi a va dyondzisa, a va byela a ku: “Chavani vatsari lava rhandzaka ku famba-famba, va ambele tinguvu leto leha, va rhandza ni ku xewetiwa hi mafundzha emitsendzeleni;

³⁹ va hlawula switshamu leswinene emasinagogeni, va tsakela ni ku tshama lomu ko chaviseka eminkhubyeni.

⁴⁰ Hi vona lava dyelelaka tinoni ni mindyangu ya tona, va endla ni swikhongelo leswo leha leswaku va ta voniwa. Va ta avanyisiwa hi ku avanyisa loku tlurisaka.”

Ta nhlengo wa noni

⁴¹ Yesu a a tshamile kusuhi ni xibya xa nhlengo wa Tempele, a languta hilaha vanhu va hoxaka mali exibyeni hakona; vafuwi lavo tala a va hoxa mali leyo tala.

⁴² Ku ta ni noni leyi a yi ri xisiwana, yi hoxa swimalana swimbirhi leswi lavaka ku ringana sente yin'we ntsena.

⁴³ Yesu a vitana vadyondzisiwa va yena, a ku ka vona: “Ndzi tiyisile ndzi ri ka n'wina, noni leyi ya xisiwana yi humesile ku tlula hinkwavo lava nga hoxa mali exibyeni xa nhlengo,

⁴⁴ hikuva hinkwavo va humesile hi ku pambula eka leswo tala swa vona, kasi wansati loyi ú humesile hinkwaswo leswi a a ri na swona evusiwaneni bya yena, swi nga hinkwaswo leswi a a ta tihanyisa ha swona.”