Marka 11 - BIBELE Mahungu Lamanene

Ta Yesu loko a nghena eYerusalema

¹ Loko va tshinelela Yerusalema ni miti ya Betefage na Betaniya, kusuhi ni Ntshava ya Mitlhwari, Yesu a hlawula vambirhi exikarhi ka vadyondzisiwa va yena, a va rhuma,

² a ku: “Yanani emutini lowu vonakaka lahaya, kutani loko mi nghena ka wona, mi ta kuma ximbhongolwana lexi bohiweke, lexi nga si gadiwaka hi munhu; xi ntshunxeni, mi ta na xona haleno.

³ Loko munhu a mi vutisa a ku: ‘Mi endlela ku yini sweswo?’ mi ta ku: ‘Hosi ya xi lava; yi ta xi vuyisa sweswi.’ ”

⁴ Kutani va famba, va ya kuma ximbhongolwana xi ri handle, xi bohiwile enyangweni kusuhi ni ndlela, kutani va xi ntshunxa.

⁵ Van'wana lava a va yimile kwalaho, va ku ka vona: “Mi ntshunxela yini ximbhongolwana xexo ke?”

⁶ Vona va va hlamula hilaha Yesu a nga va lerisa hakona, kutani va va tshika.

⁷ Va ta na ximbhongolwana eka Yesu, kutani va kapeka tinguvu ta vona ehenhla ka xona, Yesu a xi gada.

⁸ Vanhu lavo tala va andlala tinguvu ta vona endleleni, van'wana va tshova swirhabyana leswi nga na matluka swa le nhoveni, va andlala endleleni.

⁹ Lava rhangeke mahlweni, ni lava landzelelaka, va huwelela, va ku: “Hozana! A ku dzunisiwe la taka hi vito ra Hosi!

¹⁰ A ku dzunisiwe Mfumo wa tatana Davhida lowu taka eka hina! Hozana ematilweni lama nga henhla-henhla!”

¹¹ Yesu a fika eYerusalema, a ya nghena eTempeleni, a rhendzeleka a ri karhi a languta hinkwaswo; kambe leswi a ri perile, a huma, a ya eBetaniya ni lava khume na vambirhi.

Ta murhi wa nkuwa lowu rhukaniweke

¹² Hi siku leri tlhandlamaka loko va vuya hi le Betaniya, a twa ndlala.

¹³ Kutani a vona nkuwa lowu nga ni matluka a ha ri kulenyana; a hambuka ku ya kamba loko kumbexana a nga kuma xa nchumu eka wona, kambe loko a fika kona, a nga kumanga nchumu, loko ma nga ri matluka ntsena, hikuva a wu nga ri nkarhi wa makuwa.

¹⁴ Kutani a ku ka murhi lowu: “A ku nga ha vi na munhu la nga ta dya mihandzu ya wena ni siku ni rin'we!” Vadyondzisiwa va yena a va ri karhi va swi twa.

Ta ku basisiwa ka Tempele

¹⁵ Kutani va fika eYerusalema. Kuteloko a nghenile exivaveni xa Tempele, a hlongola lava xavisaka ni lava xavaka kona, a wisetela matafula ya lava bindzurisaka mali, ni switshamu swa lava xavisaka matuva.

¹⁶ Naswona, a nga pfumelelanga munhu ku tsemakanya xivava xa Tempele, a rhwele xa nchumu.

¹⁷ Kutani a va dyondzisa, a ku: “Xana a ku tsariwanga leswaku: “ ‘Yindlu ya mina yi ta vuriwa yindlu ya xikhongelo eka matiko hinkwawo’ xana? Kasi n'wina mi yi endlile ‘bako ra makhamba’. ”

¹⁸ Vaprista lavakulu ni vatsari va swi twa, kutani va lava hilaha va nga ta n'wi dlaya hakona; hikuva a va n'wi chava, hileswi ntshungu hinkwawo a wu hlamala dyondzo ya yena.

¹⁹ Kutani loko ri perile, Yesu ni vadyondzisiwa va huma emutini.

Dyondzo ya nkuwa lowu omeke

²⁰ Nimixo loko va hundza kwalaho, va vona nkuwa wolowo wu omile ku sukela etimitswini.

²¹ Petro a tsundzuka leswi humeleleke, a ku ka Yesu: “Mufundhisi, vona, nkuwa lowu u nga wu rhuketela wu omile.”

²² Yesu a va hlamula, a ku: “Mi va ni ku pfumela eka Xikwembu!

²³ Ndzi tiyisile ndzi ri ka n'wina, loko munhu a ku ka ntshava leyi: ‘Suka, u ya tihoxa elwandle’, a nga kanakani embilwini ya yena, kambe a pfumela leswaku leswi a swi vulaka swi ta endleka, ú ta endleriwa swona.

²⁴ Hikokwalaho ndzi ri ka n'wina: Hinkwaswo leswi mi swi kombelaka hi ku khongela, pfumelani leswaku mi nyikiwile swona, kutani mi ta endleriwa swona.

²⁵ Loko mi yima mi khongela, rivalelani loyi mi nga va ni mhaka na yena, leswaku na yena Tata wa n'wina la nge matilweni, a mi rivalela swidyoho swa n'wina.” [

²⁶ “Hikuva loko mi nga rivaleri van'wana, Tata wa n'wina la nga matilweni na yena a nga ka a nga mi rivaleri swidyoho swa n'wina!”]

Va kaneta matimba ya Yesu

²⁷ Kutani va tlhela va vuyela Yerusalema; kakuloko Yesu a ri karhi a rhendzeleka ni xivava xa Tempele, vaprista lavakulu ni vatsari ni vakulukumba va ta ka yena

²⁸ va ku: “Xana u endla swilo leswi hi matimba wahi ke? Xana i mani la nga ku nyika matimba ya ku endla swilo sweswo ke?”

²⁹ Yesu a va hlamula a ku: “Ndzi ta mi vutisa xivutiso xin'we; loko mi ndzi hlamula xona, hi kona na mina ndzi nga ta mi byela lomu matimba lawa ndzi tirhaka ha wona, ma humaka kona.

³⁰ Xana nkhuvulo wa Yohane a wu huma etilweni, kumbe eka vanhu ke? Ndzi hlamuleni.”

³¹ Vona va kanetana va ku: “Loko hi ku: ‘A wu huma etilweni’, ú ta ku: ‘Loko swi ri tano, hikwalaho ka yini mi nga pfumelanga eka yena ke?’

³² Kumbe loko hi ku: ‘A wu huma eka vanhu’ ... (A va chava ntshungu; hikuva hinkwavo a va kholwa leswaku Yohane a a ri muprofeta wa xiviri.)”

³³ Kutani va hlamula Yesu, va ku: “A hi swi tivi.” Hiloko Yesu u ku ka vona: “Na mina a ndzi nga mi byeli lomu matimba lawa ndzi tirhaka ha wona, ma humaka kona.”