Malakiya 3 - BIBELE Mahungu Lamanene

¹ HOSI ya matimba hinkwawo yi ri: “Vonani, ndzi ta rhuma nandza wa mina leswaku a ndzi khulelela ndlela. Kutani mina N'wini wa hinkwaswo loyi mi ndzi languteleke, ndzi ta hatla ndzi nghena eTempeleni ya mina. Vonani, nandza loyi mi n'wi tsakelaka, wa ta ku ta mi tivisa ta ntwanano wa mina.”

² Kambe xana i mani la nga tiyelaka siku ra ku ta ka yena, naswona, i mani la nga yimaka emahlweni ka yena loko a humelela xana? La taka, ú fana ni ndzilo wa mufuri ni xisibi xa muhlantswi.

³ Ú ta tshama hansi, kukota munhu loyi a n'okisaka ni ku basisa nsuku ni silivhere: Ú ta basisa va ka Levhi, a va endla lava tengeke, leswaku va humesela HOSI Xikwembu magandzelo lama amukelekaka.

⁴ Kutani magandzelo ya va le Yuda ni ya va le Yerusalema, ma ta tsakisa HOSI Xikwembu ku fana ni le minkarhini ya khale.

⁵ HOSI ya matimba hinkwawo yi ri: “Ndzi ta ta exikarhi ka n'wina ndzi ta mi avanyisa; ndzi ta hatla ndzi boxa nandzu wa vangoma ni wa lava endlaka vuoswi, ni wa lava hlambanyaka hi mavunwa; ndzi ta ba lava nga hakeriki vatirhi va vona hi fanelo, lava xanisaka tinoni ni swisiwana, ni lava hlongolaka valuveri. Ndzi ta avanyisa hinkwavo lava alaka ku ndzi komba xichavo.”

Ta ku humesa vukhume

⁶ “Mina HOSI Xikwembu a ndzi hundzuki, kutani na n'wina ma ha ri va ka Yakobo hakunene.

⁷ Ku sukela eminkarhini ya vatata wa n'wina, mi hambukile endleleni, mi tshika swiletelo swa mina, ni ku swi hlayisa a mi swi hlayisanga. Vuyelani eka mina, kutani na mina ndzi ta vuyela eka n'wina. Ndzi vula sweswo mina HOSI ya matimba hinkwawo. Kambe n'wina mi ndzi vutisa mi ku: ‘Xana hi nga vuyerisa ku yini?’

⁸ Nhlamulo hi leyi: Ku xisa Xikwembu a hi swona! Kambe n'wina mi le ku ndzi xiseni. Kutani mi tlhela mi ndzi vutisa mi ku: ‘Hi ku xisa hi ndlela yihi ke?’ Mina ndzi ri: Ma ndzi xisa eku humeseni ka vukhume ni mihlengo.

⁹ Mi rhukaniwile hakunene, hikuva mi le ku ndzi xiseni hinkwenu ka n'wina.

¹⁰ Tisani vukhume hinkwabyo endlwini ya vuhlayiselo, leswaku ku va ni swakudya eTempeleni ya mina. Kutani mina HOSI ya matimba hinkwawo ndzi ri: Ndzi ringeteni hi ndlela yeleyo, mi vona loko ndzi nga mi pfuleli mafasitere ya le tilweni, ndzi mi nisela minkateko hi ntalo.

¹¹ Ndzi ta sivela tinjiya, leswaku ti nga mi dyeli leswi milaka emasin'wini ya n'wina; ni mirhi ya n'wina ya vhinya a yi nga tshiki ku tswala. Ndzi vula sweswo mina HOSI ya matimba hinkwawo.

¹² Kutani vanhu va matiko hinkwawo va ta mi vula lava katekeke, hikuva mi ta va mi ri tiko ro tsakisa. Ndzi vula sweswo mina HOSI ya matimba hinkwawo.”

Ta ku avanyisiwa ka makumu

¹³ HOSI Xikwembu xi ri: “Marito ya n'wina ma ndzi vavisa mbilu, kambe n'wina mi ri: ‘Hi ku vavisa loko hi vula yini xana?’

¹⁴ Ma ndzi vavisa loko mi ku: ‘Ku tirhela Xikwembu, HOSI ya matimba hinkwawo, a swi pfuni nchumu. Hambiloko hi yingisa leswi yi hi byelaka swona, kumbe hi ya rila emahlweni ka yona, a hi nga vuyeriwi hi nchumu.

¹⁵ Hina hi vona leswi: Lava tikurisaka, hi vona va katekaka, lavo biha va humelela; hambiloko va ringa Xikwembu, xona a xi va bi!’ ”

¹⁶ Kutani vanhu lava chavaka HOSI Xikwembu, a va vulavula swin'we. Hiloko HOSI Xikwembu xi rhiya ndleve xi va yingisa, kutani ku tsariwa buku emahlweni ka xona, yo tsundzuka hinkwavo lava chavaka HOSI Xikwembu, lava xiximaka vito ra xona.

¹⁷ Kutani HOSI ya matimba hinkwawo yi ku: “Vanhu lava va ta va va mina; va ta va ndzhaka ya mina leyo hlawuleka siku ndzi nga ta avanyisa misava. Ndzi ta va tsetselela ku fana ni mutswari, loko a tsetselela n'wana wa yena loyi a n'wi tirhelaka.

¹⁸ Hikona mi nga ta vona ku hambana exikarhi ka lavo lulama ni lavo homboloka, ni le xikarhi ka lava va ndzi tirhelaka, ni lava va nga ndzi tirheliki mina Xikwembu.”