Luka 8 - BIBELE Mahungu Lamanene

Ta vavasati lava heleketaka Yesu

¹ Endzhaku ka sweswo, Yesu a famba hi miti ni swimitana a ri karhi a vula Rito, a twarisa Evhangeli ya Mfumo wa Xikwembu; lava khume na vambirhi na vona a va ri na yena,

² ni vavasati van'wana lava ntshunxiweke emimoyeni leyo biha ni le mavabyini, a va ri kona. A va ri va Mariya (loyi a va ku i wa Magadala), loyi mademona ya 7 ma hlongoriweke eka yena,

³ na Yohana, nkata Khuza ndhuna ya Heroda, na Suzana, ni vavasati van'wana lavo tala lava a va tirhisa swa vona ku pfuna Yesu ni vadyondzisiwa va yena.

Xifaniso xa muhaxi

⁴ Vanhu a va ta eka Yesu va huma emitini leyo tala, va ko va endla ntshungu lowukulu, kutani a vulavula na vona hi xifaniso a ku:

⁵ “Muhaxi ú hume ku ya haxa mbewu; loko a ri karhi a haxa, timbewu tin'wana ti wela endleleni, vanhu va ti kandziyela, kutani tinyanyana ti ta, ti ta ti dya hinkwato.

⁶ Tin'wana ti wela emaribyeni, kutani loko ti mila, swimila swi vuna hi ku pfumala ndzhongho.

⁷ Timbewu tin'wana ti wela exikarhi ka mitwa, kutani mitwa yi mila swin'we na tona, yi ti kamanyeta ti fa.

⁸ Kambe tin'wana ti wela emisaveni leyinene; loko ti mirile, ti chela ka dzana.” Loko a vurile sweswo, a tlakusa rito a ku: “La nga ni tindleve ku yingisa, a a yingise.”

Xikongometo xa swifaniso

⁹ Kutani vadyondzisiwa va Yesu va n'wi vutisa xifaniso lexi, ku tiva leswaku xi vula yini.

¹⁰ Kutani a ku: “N'wina, mi nyikiwile ku tiva swihundla swa Mfumo wa Xikwembu, kambe van'wana va nyikiwa swona hi swifaniso, leswaku: “ ‘Ni loko va vona, va nga vonisisi, ni loko va twa, va nga twisisi.’

Ta Yesu loko a hlamusela xifaniso xa muhaxi

¹¹ “Loko xi ri xifaniso lexi, xi vula leswi: Timbewu i Rito ra Xikwembu.

¹² Leti nga wela endleleni, i vanhu lava twaka Rito; kutani Diyavulosi a ta, a ri susa etimbilwini ta vona, leswaku va ta ka va nga pfumeli, va nga ponisiwi.

¹³ Timbewu leti nga wela emaribyeni, i vanhu lava amukelaka Rito hi ku tsaka siku va ri twaka, kambe va pfumala timitsu, va tiyisela nkarhinyana ntsena; kutani hi siku ra ndzingo va tlhelela ndzhaku.

¹⁴ Timbewu leti nga wela emitweni, i vanhu lava tweke Rito, kambe loko va ri karhi va ya emahlweni, va kamanyetiwa hi ku vilela, ni rifuwo, ni ku titsakisa hi swa vutomi lebyi, kutani va nga ha veki mihandzu leyi vupfaka.

¹⁵ Timbewu leti nga wela emisaveni leyinene, i vanhu lava yingisaka Rito hi timbilu leto lulama, letinene, va ri hlayisa, va veka mihandzu hi ku tiyisela.

Xifaniso xa rivoni ro khubumetiwa hi mbita

¹⁶ “A ku na munhu loyi a lumekaka rivoni, kutani a ri khubumeta hi mbita, kumbe ku ri veka ehansi ka mubedo; kambe ú ri veka ehenhla, leswaku lava nghenaka ndlwini va vona ku vonakala.

¹⁷ A ku na xilo lexi fihliweke lexi nga ta ka xi nga paluxiwi, a ku na xilo lexi nge xihundleni lexi nga ta ka xi nga tiviwi ni ku humela erivaleni.

¹⁸ Hikwalaho, tivoneleni, mi hlayisa leswi mi swi twaka. La nga ni xanchumu, ú ta nyikiwa swin'wana, kasi loyi a nga riki na nchumu, ú ta tekeriwa ni lexi a ehleketaka leswaku ú na xona.”

Ta mana wa Yesu ni vamakwavo

¹⁹ Mana wa Yesu ni vamakwavo va ta ka yena, kambe va tsandzeka ku fika kusuhi na yena hikwalaho ka ntshungu.

²⁰ Kutani van'wana va n'wi tivisa va ku: “Mana wa wena ni vamakwenu va kwala handle, va navela ku ku vona.”

²¹ Kambe yena a ku: “Manana ni vamakwerhu, hi lava twaka Rito ra Xikwembu, va vuya va hanya ha rona.”

Ta Yesu loko a miyeta xidzedze

²² Hi siku rin'wana Yesu a nghena ebyatsweni ni vadyondzisiwa va yena, kutani a ku ka vona: “A hi peleleni entsungeni wa tiva.” Hiloko va tluta va famba.

²³ Va te va ha pela, Yesu a khoma hi vurhongo a etlela; kutani xidzedze xi va fikela etiveni, byatso byi lava ku tala hi mati, kutani va va ekhombyeni.

²⁴ Va ya n'wi pfuxa va ku: “Hosi, Hosi, ha lova!” Hiloko a pfuka a yima, a tshinya moya ni magandlati, swi va swi miyela, ku rhula ku va kona.

²⁵ Kutani a ku ka vona: “Xana ku pfumela ka n'wina ku kwihi ke?” Vona va chava, va hlamala, va vutisana va ku: “Xana i munhu muni loyi, leswi a lerisaka mheho ni lwandle, swi vuya swi n'wi yingisa ke?”

Ta ku hanyisiwa ka Mugerasi loyi a a ri ni mademona

²⁶ Kutani va pelela etikweni ra Vagerasi leri langutaneke na Galeliya.

²⁷ Loko a fikile eribuweni, a xika, kutani a hlangana ni wanuna un'wana la humaka emutini, a ri ni mademona; a ku ri khale a nga ha ambali nchumu, ni le ndlwini a nga ha tshami, kambe a a tshama emasirheni.

²⁸ Loko a vona Yesu, a huwelela, a tiwisela hansi emahlweni ka yena, a tlakusa rito a ku: “Mhaka ya mina na wena hi yihi ke, wena Yesu N'wana wa Xikwembu xa le henhla-henhla? Ndza ku khongela, u nga ndzi xanisi.”

²⁹ A a vula sweswo hikuva Yesu a a lerisile moya lowo biha ku huma eka munhu yoloye; moya wa kona a wu tala ku n'wi khoma, kutani a va n'wi boha mavoko ni milenge hi tinketani va n'wi rindza, kambe yena a tsema tinsimbhi teto, a yisiwa emananga hi moya lowo biha.

³⁰ Yesu a n'wi vutisa a ku: “Vito ra wena u mani?” A ku: “Hi Vandla.” Hikuva mademona yo tala a ma nghenile eka yena.

³¹ Kutani ma khongela Yesu leswaku a nga ma lerisi ku huma ma ya exivandleni xa va le hansi.

³² A ku ri ni ntlhambi lowukulu wa tinguluve kwalaho, leti a ti ri eku dyeni egangeni. Mademona ma kombela hi matimba eka Yesu leswaku a ma pfumelela ku ya nghena eka tona. Kutani a ma pfumelela.

³³ Kavaloko mademona ma huma eka munhu yoloye, ma nghena etingulubyeni, kutani hinkwato ti tsutsumela eriweni, ti ya tihoxa exidziveni, ti nwela kona.

³⁴ Loko varisi va tona va vona leswi humeleleke, va baleka, va ya rungulela va muti ni va le masin'wini.

³⁵ Kutani vona va huma, va ya vona leswi humeleleke. Loko va fika eka Yesu, va kuma munhu loyi mademona ma nga suka eka yena a tshamile emilengeni ya Yesu, a ambele, a ri munhu; kutani va chava ngopfu.

³⁶ Lava voneke timhaka leti, va va rungulela hilaha munhu loyi wa mademona a hanyisiweke hakona.

³⁷ Kutani vaaki hinkwavo va tiko ra Vagerasi, va kombela Yesu leswaku a suka etikweni ra vona, hikuva a va khomiwile hi ku chava lokukulu. Hiloko Yesu a nghena ebyatsweni, a tlhela.

³⁸ Kutani munhu loyi mademona ma humeke eka yena, a kombela ku famba na Yesu; kambe Yesu a n'wi tlherisa, a ku:

³⁹ “Tlhelela ka rikwenu, u ya vula leswikulu leswi Xikwembu xi ku endleleke swona.” Kutani a famba a ya rungula hinkwako emutini swilo leswikulu leswi Yesu a n'wi endleleke swona.

Ta n'wana Yayiro, ni ta wansati la khumbeke nguvu ya Yesu

⁴⁰ Kuteloko Yesu a tlherile, ntshungu wu n'wi amukela hi ku tsaka, hikuva hinkwavo a va n'wi languterile.

⁴¹ Kutani ku ta wanuna loyi a va ku i Yayiro, loyi a a ri murhangeri wa sinagoga; a wa emilengeni ya Yesu, a n'wi khongela leswaku a nghena emutini wa yena,

⁴² hikuva a a ri ni n'wana un'we ntsena wa wanhwanyana, wa malembe yo lava ku ringana 12, loyi a a ri kusuhi ni ku fa. Loko Yesu a suka a ya kona, a kamanyetiwa hi mintshungu.

⁴³ Kutani a ku ri na wansati kwalaho loyi a a ri ni vuvabyi bya ngati lebyi nga n'wi karhata malembe ya 12; [a a hetile xuma xa yena hinkwaxo etin'angeni], ku nga ri na munhu la kotaka ku n'wi hanyisa.

⁴⁴ A ta hi ku nyandlamela hi le ndzhaku ka Yesu, a khumba makumu ya nguvu ya yena, kutani vuvabyi bya yena bya ngati byi hola kan'we-kan'we.

⁴⁵ Yesu a ku: “I mani la ndzi khumbeke?” Kakuloko va kaneta hinkwavo, Petro a ku: “N'wini wanga, u rhendzeriwe hi mintshungu, kutani ya ku kamanyeta!”

⁴⁶ Kambe Yesu a ku: “Munhu un'wana ú ndzi khumbile hikuva ndzi swi twile loko ku huma matimba man'wana laha ka mina.”

⁴⁷ Loko wansati a vonile leswaku ú kumiwile, a ta hi ku rhurhumela, a wela emilengeni ya Yesu, a hlamusela emahlweni ka vanhu hinkwavo leswi a n'wi khumbeleke swona, ni hilaha a hanyisiweke hakona hi ku hatlisa.

⁴⁸ Kutani Yesu a ku ka yena: “N'wananga, ku pfumela ka wena ku ku hanyisile, famba hi ku rhula.”

⁴⁹ A ku a ha vulavula, ku ta un'wana la humaka eka murhangeri wa sinagoga, a fika a tivisa Yayiro a ku: “N'wana wa wena ú file, u nga ha karhati Mudyondzisi.”

⁵⁰ Kambe loko Yesu a swi twa, a ku ka Yayiro: “U nga chavi, pfumela ntsena, n'wana ú ta hanya.”

⁵¹ Loko a fikile emutini, a nga pfumelelanga munhu ni un'we ku nghena na yena endlwini, loko va nga ri va Petro, na Yohane, na Yakobo, ni vatswari va lowa nhwanyana.

⁵² Vanhu hinkwavo a va n'wi rila hi xiviti; kutani Yesu a ku: “Mi nga rili; a nga fanga, ú lo etlela.”

⁵³ Kutani va n'wi hleka, hi ku tiva leswaku n'wana ú file.

⁵⁴ Kambe Yesu a n'wi khoma hi voko, a n'wi vitana a ku: “Nhwanyana, pfuka!”

⁵⁵ Moya wu tlhelela ka yena, a sisimuka, kutani Yesu a va lerisa ku n'wi nyika swakudya.

⁵⁶ Vatswari va yena va hlamala ngopfu; kambe a va lerisa leswaku va nga byeli munhu leswi humeleleke.