Luka 3 - BIBELE Mahungu Lamanene

Ta ku dyondzisa ka Yohane Mukhuvuri

¹ Hi lembe ra khume na ntlhanu ra ku fuma ka Tiberiyo Khezari, Pontiyo Pilato a a fuma Yudiya; Heroda yena a a ri hosi ya Galeliya; Filipi makwavo a a ri hosi ya Ituriya ni ya tiko ra Trakonita; Lisaniya a a ri hosi ya Abilene;

² Anasi na Kayafasi a va ri vaprista lavakulu; enkarhini wolowo, rito ra Xikwembu ri fika eka Yohane n'wana Zakariya, emananga.

³ Kutani a suka, a ya rhendzeleka na tiko hinkwaro leri nge kusuhi na Yordani, a ri karhi a huwelela, a byela vanhu ku hundzuka va khuvuriwa, leswaku Xikwembu xi va rivalela swidyoho swa vona.

⁴ Hi swona leswi nga tsariwa ebukwini ya muprofeta Esaya, loko a te: “Rito ra munhu la huwelelaka emananga, ri ri: ‘Khulelani ndlela ya Hosi, mi lulamisa magondzo ya yona.

⁵ Minkova hinkwayo yi ta gandleteriwa, tintshava hinkwato ni switsunga hinkwaswo swi ta hindzimuxiwa; leswi gombonyokeke swi ta lulamisiwa, ni tindlela to biha ti ta khuleriwa,

⁶ kutani munhu un'wana ni un'wana ú ta vona hilaha Xikwembu xi ponisaka vanhu hakona.’ ”

⁷ Kutani Yohane a byela mintshungu leyi taka ku ta khuvuriwa hi yena, a ku: “Rixaka ra timhiri, i mani la nga mi tsundzuxa ku baleka vukari lebyi taka xana?

⁸ Vekani mihandzu leyi fambelanaka ni ku hundzuka ka n'wina! Mi nga anakanyi mi ku, mi na Abrahama, yena tata wa n'wina, hikuva ndzi ri ka n'wina: Xikwembu xi nga pfuxela Abrahama evana hi maribye lawa.

⁹ Ni sweswi xihloka xi vekiwile etimitswini ta mirhi; murhi wun'wana ni wun'wana lowu nga vekiki mihandzu leyinene, wu ta tsemiwa wu hoxiwa endzilweni.”

¹⁰ Kutani mintshungu yi n'wi vutisa yi ku: “Loko swi ri tano, hi ta endla yini ke?”

¹¹ A hlamula a ku ka vona: “Loyi a nga ni swiambalo swimbirhi, a a avele la pfumalaka; ni loyi a nga ni swakudya, a a endlise sweswo na yena.”

¹² Valuvisi na vona va ta eku khuvuriweni, va ku ka yena: “Mudyondzisi, hi ta endla yini xana?”

¹³ A ku ka vona: “Mi nga therisi vanhu ku tlula leswi mi lerisiweke swona.”

¹⁴ Masocha na wona ma n'wi vutisa ma ku: “Hina ke, hi ta endla yini?” A ku ka vona: “Mi nga phanghi swilo swa vanhu, mi nga va tekeli swona hi ku xisa, kambe mi kolwa hi hakelo ya n'wina.”

¹⁵ Vanhu a va tshama va langutele, kutani hinkwavo a va ehleketa etimbilwini ta vona leswaku kumbexana Yohane a nga va yena Mesiya.

¹⁶ Yohane a va hlamula hinkwavo, a ku: “Loko ndzi ri mina, ndzi mi khuvula hi mati, kambe wa ta un'wana loyi a ndzi tlulaka hi matimba, loyi swi nga ndzi faneriki ku ntshunxa ngoti ya tintanghu ta yena; yena ú ta mi khuvula hi Moya lowo Kwetsima ni ndzilo.

¹⁷ Rihlelo ri le vokweni ra yena; ú ta hlela swinene hinkwaswo leswi nge xivuyeni xa yena a heta: kutani mavele ú ta ma chela enguleni; kambe mungu wona, ú ta wu hisa endzilweni lowu nga timekiki.”

¹⁸ Kutani a tshama a va khongotela hi timhaka tin'wana leto tala, a ri karhi a twarisa Evhangeli exikarhi ka vanhu.

¹⁹ Kambe Hosi Heroda a a tekile Herodiya, nsati wa makwavo wa yena Filipi, a endla ni swin'wana leswo tala leswi biheke, kutani Yohane a a tala ku n'wi tshinya etimhakeni teto.

²⁰ Kutani Heroda a engetela vubihi lebyi hi ku pfalela Yohane ekhotsweni.

Ta ku khuvuriwa ka Yesu

²¹ Loko vanhu hinkwavo va khuvuriwa, ni loko Yesu na yena a khuvuriwile, matilo ma pfuleka a ri karhi a khongela;

²² Moya lowo Kwetsima wu xikela henhla ka yena, wu ri ni xivumbeko lexi fanaka ni xa tuva; kutani rito ri huma etilweni ri ku: “U N'wananga la rhandzekaka, loyi ndzi n'wi tsakelaka swinene.”

Xivongo xa Yesu

²³ Yesu a a ri kusuhi ni malembe ya 30 loko a sungula ntirho wa yena; kutani, hi ku ehleketa ka vanhu, a a ri n'wana Yosefa, wa Heli,

²⁴ wa Matati, wa Levhi, wa Melki, wa Yanayi, wa Yosefa,

²⁵ wa Matatiya, wa Amosi, wa Nahume, wa Esli, wa Nagayi,

²⁶ wa Mate, wa Matatiya, wa Semeyini, wa Yoseke, wa Yoda,

²⁷ wa Yohana, wa Resa, wa Zerubabele, wa Salatiele, wa Neri,

²⁸ wa Melki, wa Adi, wa Kosama, wa Elmadema, wa Ere,

²⁹ wa Yoxuwa, wa Eliezere, wa Yorimi, wa Matati, wa Levhi,

³⁰ wa Simiyoni, wa Yuda, wa Yosefa, wa Yonama, wa Eliyakimi,

³¹ wa Meleya, wa Mena, wa Matati, wa Natani, wa Davhida,

³² wa Yese, wa Obede, wa Bowazi, wa Sala, wa Nasoni,

³³ wa Aminadaba, wa Admini, wa Arni, wa Esromo, wa Faresi, wa Yuda,

³⁴ wa Yakobo, wa Isaka, wa Abrahama, wa Tera, wa Nakori,

³⁵ wa Serugi, wa Rhewu, wa Pelege, wa Ebere, wa Sala,

³⁶ wa Kayinama, wa Arifakisada, wa Seme, wa Nowa, wa Lameke,

³⁷ wa Metuxela, wa Enoko, wa Yarete, wa Maleleyeli, wa Kayinama,

³⁸ wa Enosi, wa Seta, wa Adamu, wa Xikwembu.