Luka 24 - BIBELE Mahungu Lamanene

Ta ku pfuka ka Yesu eku feni

¹ Hi siku ra Sonto dyambu ri nga si huma, vavasati va ya esirheni, va tamele mirhi ya risuna leyi va yi lunghiseke.

² Va kuma ribye ri vumbuluxiwele kule ni sirha.

³ Kambe loko va nghena, a va kumanga ntsumbu wa Hosi Yesu.

⁴ Va ku va ha hlamala ha swona, vavanuna vambirhi va tshuka va humelela eka vona, va ri ni swiambalo leswi hatimaka.

⁵ Loko vavasati va ha chavile ngopfu ni ku languta hansi hi mhaka ya gome, vavanuna va ku ka vona: “Hikwalaho ka yini mi lava la hanyaka exikarhi ka vafi xana?

⁶ A nga kona la, kambe ú pfukile eku feni. Tsundzukani hilaha a nga vulavula na n'wina hakona, loko a ha ri eGaleliya,

⁷ loko a te: ‘N'wana-wa-Munhu ú fanele ku nyiketiwa emavokweni ya vadyohi, a vambiwa, kutani ú ta pfuka hi siku ra vunharhu.’ ”

⁸ Va tsundzuka marito ya yena,

⁹ kutani va suka esirheni, va ya rungula timhaka leti hinkwato eka lava khume na un'we ni ka van'wana hinkwavo.

¹⁰ Vavasati lava, a va ri va Mariya wa Magadala, na Yohana, na Mariya mana wa Yakobo; kutani vona ni van'wana lava a va ri na vona, va vikela vaapostola timhaka teto.

¹¹ Kambe marito lawa a va ma teka ma ri ya ku vungunya, va nga ma pfumeli. [

¹² Loko a ri yena Petro a suka, a tsutsumela esirheni; kuteloko a korhamile a hlometela, a vona tinguvu ntsena, kutani a tlhelela ekaya, a ri karhi a hlamala hi leswi humeleleke.]

Ta lava yaka le Emawusi

¹³ Hi siku rero, vambirhi va vona, a va ya emutini lowu vuriwaka Emawusi; vukule bya wona na Yerusalema, a byi ringana mpfhuka wa 12 km.

¹⁴ A va vulavula swin'we hi timhaka hinkwato leti humeleleke.

¹⁵ Va ku va ha vulavula ha tona va ti kanela, Yesu hi xiviri xa yena a va tshinelela, a famba na vona.

¹⁶ Kambe mahlo ya vona a ma siveriwa, va nga n'wi tivi.

¹⁷ Kutani a ku ka vona: “Hi tihi timhaka leti mi vulavulaka ha tona endleleni ke?” Hiloko vona va yima va ri ni gome.

¹⁸ Un'wana loyi a va ku i Keleyopasi, a hlamula, a ku: “Exikarhi ka lava endzeke eYerusalema, xana hi wena u ri wexe la nga tiviki timhaka leti humeleleke kona hi masiku lawa ke?”

¹⁹ A ku ka vona: “Hi tihi xana?” Va ku ka yena: “Ta Yesu wa Nazareta, loyi a a ri muprofeta wa matimba emintirhweni ne ku vulavuleni, emahlweni ka Xikwembu ne mahlweni ka tiko hinkwaro;

²⁰ vaprista lavakulu ni vakulukumba va hina va n'wi nyiketile leswaku a avanyiseriwa rifu, kutani va n'wi vambile.

²¹ Loko hi ri hina, a hi tshembile leswaku hi yena loyi a nga ta kutsula Israele; hambiswiritano, namuntlha i siku ra vunharhu timhaka leti ti humelerile.

²² Kunene vavasati van'wana va ka hina va hi hlamarisile ngopfu; va yile esirheni nimpundzu swinene,

²³ kutani a va kumanga ntsumbu wa yena; va vuyile, va vula leswaku va vonile mahlori ya tintsumi leti nga te: ‘Wa hanya.’

²⁴ Van'wana va ka hina va yile esirheni, va kumile swi ri tano, hilaha vavasati va vuleke hakona; kambe yena, a va n'wi vonanga.”

²⁵ Kutani a ku ka vona: “Yo! vanhu lava nga twisisiki, va timbilu leti hlwelaka ku kholwa hinkwaswo leswi vuriweke hi vaprofeta!

²⁶ Xana a swi nga faneri leswaku Mesiya a twisiwa ku vaviseka koloku, a tlhela a nghena eku kwetsimeni ka yena ke?”

²⁷ Kutani a va hlamusela hilaha timhaka ta yena ti nga vuriwa eMatsalweni hinkwawo hakona, ku sungula hi Muxe ku yisa eka vaprofeta hinkwavo.

²⁸ Kakuloko va fika kusuhi ni muti lowu va yaka eka wona, a endla onge ú hundzela emahlweni.

²⁹ Kutani va n'wi sindzisa va ku: “Xwana na hina, hikuva ri ya eku peleni, ni vusiku bya tshinela.” Kutani a nghena, a ya tshama na vona.

³⁰ Kakuloko va ri eku dyeni, a teka xinkwa, a nkhensa, kutani a phema, a va nyika.

³¹ Hiloko mahlo ya vona ma pfuleka, kutani va n'wi tiva; kambe yena a va siya a nyamalala.

³² Kutani va byelana, va ku: “Hikwalaho ka yini timbilu ta hina ti nga pfurhanga endzeni ka hina, loko a vulavula na hina endleleni, a hi pfuletela Matsalwa xana?”

³³ Kutani hi nkarhi wolowo va suka, va tlhelela eYerusalema, va ya kuma lava khume na un'we, va hlengeletanile na van'wana,

³⁴ va ri karhi va rungulelana va ku: “Hakunene Hosi yi pfukile eku feni, naswona yi tikombile eka Simoni.”

³⁵ Kutani na vona va Emawusi va rungula leswi swi nga va humelela endleleni, ni hilaha va n'wi tiveke hakona, eku phemeni ka xinkwa.

Ta Yesu loko a tikomba eka vaapostola

³⁶ Va ku va ha vulavula, Yesu a yima exikarhi ka vona, yena hi xiviri, kutani a ku ka vona: “Ku rhula a ku ve na n'wina!”

³⁷ Va khomiwa hi ku chava lokukulu, va ehleketa leswaku va vona xipuku.

³⁸ A ku ka vona: “Xana mi chavisiwa ha yini, hikwalaho ka yini mi ri ni ku kanakana etimbilwini ta n'wina ke?

³⁹ Vonani swandla swa mina ni milenge ya mina! Hi mina hi xiviri xa mina. Ndzi khomeni mi ndzi ringetela. Xipuku a xi na nyama ni marhambu, kasi mina ndzi na swona, hilaha mi swi vonaka hakona.” [

⁴⁰ Loko a vurile sweswo, a tlhela a va komba swandla swa yena ni milenge ya yena.]

⁴¹ Kutani leswi eku tsakeni ne ku hlamaleni ka vona a va ha kanakana, a ku ka vona: “Xana mi ni swakudya kwala ke?”

⁴² Vona va n'wi nyika xikwavi xa nhlampfi lexi oxiweke;

⁴³ a xi amukela, a dya emahlweni ka vona.

⁴⁴ Kutani a ku ka vona: “Hi tona timhaka leti ndzi nga mi tivisa tona, loko ndza ha ri na n'wina, loko ndzi te: ‘Hinkwaswo leswi tsariweke ehenhla ka mina eNawini wa Muxe ni ka Vaprofeta, ni ka Tipisalema, swi fanele ku hetiseka.’ ”

⁴⁵ Kavaloko a pfula miehleketo ya yona leswaku va twisisa Matsalwa.

⁴⁶ Kutani a ku ka vona: “Matsalwa ma vurisile ma te: ‘Mesiya ú ta twisiwa ku vaviseka, a tlhela a pfuka eku feni hi siku ra vunharhu.

⁴⁷ Kutani, hi vito ra yena, timhaka ta ku hundzuka ni ta ku rivaleriwa swidyoho ti ta twarisiwa ematikweni hinkwawo, ku sungula hi le Yerusalema.’

⁴⁸ N'wina mi timbhoni ta timhaka leti.

⁴⁹ Loko a ri mina, ndzi ta mi rhumela leswi Tata wa mina a mi tshembiseke swona. Kambe n'wina tshamani kwala mutini, ku fikela loko mi funengetiwa hi matimba ya le henhla.”

Ta ku tlhandluka ka Yesu

⁵⁰ Kutani a va yisa ehandle ka muti, a ya fika na vona kusuhi na Betaniya, kutani a tlakusa mavoko, a va katekisa.

⁵¹ Loko a ri karhi a va katekisa, a avana na vona [a tlakuriwa, a ya etilweni].

⁵² Kutani vona [loko va n'wi nhinsamerile], va tlhelela eYerusalema hi ku tsaka lokukulu.

⁵³ Kutani a va ri eTempeleni masiku hinkwawo, va ri karhi va dzunisa Xikwembu.