Luka 23 - BIBELE Mahungu Lamanene

Ta Yesu emahlweni ka Pilato

¹ Kutani va suka va yima hinkwavo, va yisa Yesu eka Pilato,

² va sungula ku n'wi veka nandzu, va ku: “Hi kumile munhu loyi a ri karhi a hlohlotela tiko ra hina, a arisa vanhu ku humesela Khezari endzuvo; kutani ú tivula Mesiya, Hosi.”

³ Hiloko Pilato a n'wi vutisa, a ku: “Xana u hosi ya Vayuda ke?” A n'wi hlamula, a ku: “U vula swona!”

⁴ Kavaloko Pilato a ku ka vaprista lavakulu ni ka ntshungu: “A ndzi kumi nandzu eka munhu loyi.”

⁵ Kambe va phikelela, va ku: “Ú pfilunganya tiko hi ku dyondzisa hinkwako eYudiya; ú sungule eGaleliya, sweswi ú tile haleno.”

Ta Yesu loko a ri emahlweni ka Heroda

⁶ Loko Pilato a swi twa, a vutisa a ku: “Xana munhu loyi i Mugaleliya xana?”

⁷ Loko a twile leswaku i munhu wa tiko leri fumiwaka hi Heroda, a n'wi rhumela eka Heroda, loyi na yena a a ri eYerusalema hi masiku wolawo.

⁸ Kuteloko Heroda a vona Yesu, a tsaka ngopfu, hikuva a ku ri khale a rhandza ku n'wi vona, hikwalaho ka leswi a a swi twile ehenhla ka yena, kutani a a tshemba leswaku ú ta n'wi vona a endla mahlori.

⁹ A n'wi vutisa timhaka to tala, kambe Yesu a nga hlamulanga nchumu.

¹⁰ Vaprista lavakulu ni vatsari a va yime kwalaho, va n'wi hehla hi matimba swinene.

¹¹ Hiloko Heroda a n'wi sandza, ni ku n'wi tseketsela a ri ni masocha ya yena; kuteloko a n'wi ambexile nguvu yo vangama, a n'wi tlherisela eka Pilato.

¹² Hi siku rero Heroda na Pilato va hundzukile vanghana, kasi khale a va vengana.

Ta Yesu loko a avanyiseriwa rifu

¹³ Kuteloko Pilato a hlengeletile vaprista lavakulu, ni vakulukumba, ni vanhu va tiko,

¹⁴ a ku ka vona: “Mi tisile munhu loyi eka mina, mi ku: ‘Ú hambukisa tiko.’ Sweswi ndzi kambile mhaka emahlweni ka n'wina, kambe a ndzi kumanga nandzu eka yena, hambi wu ri wun'we wa leswi mi n'wi hehlaka ha swona.

¹⁵ Swi tano na Heroda, hikuva ú n'wi tlheriserile ka hina; swa tikomba leswaku a nga endlanga ni xilo ni xin'we lexi fanelaka hi rifu.

¹⁶ Hikokwalaho, ndzi ta lerisa leswaku a biwa, kutani ndzi ta n'wi ntshunxa.” [

¹⁷ Pilato a a fanele ku va ntshunxela mubohiwa hi siku ra nkhuvo.]

¹⁸ Kambe hinkwavo va huwelela hi rito rin'we, va ku: “Dlaya yena loyi, u hi ntshunxela Barabasi!”

¹⁹ (Barabasi a a nghenisiwile ekhotsweni, hikuva a a pfuxile dzolonga emutini, a dlayile ni munhu.)

²⁰ Pilato a tlhela a vulavula na vona, hi ku lava ku ntshunxa Yesu.

²¹ Kambe va engeta va huwelela, va ku: “N'wi vambe! N'wi vambe!”

²² A va vutisa ra vunharhu a ku: “Xana munhu loyi ú dyohile yini ke? A ndzi voni nandzu lowu a fanelaka ku fela wona; hikokwalaho ndzi ta lerisa leswaku a biwa, kutani ndzi ta n'wi ntshunxa.”

²³ Kambe va huwelela hi marito layo tlakuka, va kombela leswaku a vambiwa; kutani ku huwelela ka vona ku yingisiwa.

²⁴ Pilato a tsema mhaka, a ku: “A ku endliwe hilaha mi kombelaka hakona!”

²⁵ Kutani a va ntshunxela loyi va n'wi kombeleke, loyi a a khotsiwile hikwalaho ka dzolonga ni ku dlaya munhu; loko a ri Yesu, Pilato a n'wi nyiketa eka vona, leswaku va n'wi endla leswi va swi rhandzaka.

Ta ku vambiwa ka Yesu

²⁶ Kakuloko va famba na yena, va khoma un'wana loyi a va ku i Simoni, wa Kirene, loyi a a vuya hi le masin'wini; va n'wi rhwexa xihambano xa Yesu, kutani Simoni a landza Yesu hi le ndzhaku.

²⁷ Na wona ntshungu lowukulu ni vavasati lavo tala a va landza Yesu, va ri karhi va ba nkosi, va n'wi rila.

²⁸ Yesu a hundzuluka a ku ka vona: “Vavasati va Yerusalema, mi nga ndzi rileli; kambe tirileleni, n'wina ni vana va n'wina.

²⁹ Hikuva vonani masiku ma ta, lawa va nga ta ku ‘Ku katekile timhika, ni lava nga velekangiki vana, kumbe ku mamisa.’

³⁰ “Enkarhini wolowo va ta ku ka tintshava: ‘Hi weleni henhla!’ ni ka switsunga: ‘Hi funengeteni!’

³¹ Naswona loko va endlise sweswo eka rikunyi lero tsakama, ku ta endliwa yini eka leri omeke?”

³² A va yisa ni vavanuna van'wana vambirhi, ku ya dlawa na yena; vona a va ri swidyohi.

³³ Loko va fikile endhawini leyi va nge i “ya Pala”, va n'wi vamba kona, va vamba ni swidyohi, xin'wana evokweni ra yena ra xinene, xin'wana eka lera ximatsi.

³⁴ [Kutani Yesu a ku: “Tatana, va rivalele, hikuva a va tivi leswi va swi endlaka.”] Kutani va avelana swiambalo swa yena hi ku hoxa vuhlolotwana.

³⁵ Vanhu a va yimile kwalaho, va ri karhi va languta; na vona vakulukumba a va n'wi hlekula, va ku: “Munhu loyi ú ponisile van'wana; a a tiponise, loko a ri Mesiya, Muhlawuriwa wa Xikwembu!”

³⁶ Na wona masocha a ma n'wi tseketsela, ma tshinela kusuhi, ma n'wi nyika ntsuvi,

³⁷ ma ku ka yena: “Loko u ri Hosi ya Vayuda, tiponise!”

³⁸ A ku ri ni papila henhla ka yena, leri nge: “Loyi i Hosi ya Vayuda.”

³⁹ Xin'wana xa swidyohi leswi hayekiweke kwalaho a xi n'wi rhuketela, xi ku: “Xana a hi wena Mesiya ke? Tiponise, na hina u hi ponisa!”

⁴⁰ Kambe lexin'wana xi n'wi tshinya, xi ku: “Xana a wu chavi Xikwembu, leswi u nga avanyisiwa ku fana na yena ke?

⁴¹ Loko hi ri hina, swi hi fanerile, hikuva hi amukela leswi fanekelaka swiendlo swa hina; kambe loyi, a nga endlanga nchumu xo biha.”

⁴² Xidyohi xi engeta xi ku: “Yesu, ndzi anakanye, loko u nghena eMfun'weni wa wena.”

⁴³ Yesu a ku ka xona: “Ndzi tiyisile ndzi ri ka wena, namuntlha u ta va na mina eParadeyisini.”

Ta ku fa ka Yesu

⁴⁴ Hi nkarhi lowu lavaka ku va wa 12 ninhlekanhi, munyama wu funengeta tiko hinkwaro, ku fika enkarhini wa 3 nindzhenga.

⁴⁵ Dyambu ri endla ntima, ni xisirhelelo lexi hingakanyaka Tempele xi handzuka hi le xikarhi.

⁴⁶ Kutani Yesu a huwelela hi rito leri tlakukeke, a ku: “Tatana, ndzi nyiketa moya wa mina emavokweni ya wena.” Loko a vurile sweswo, a hlala a fa.

⁴⁷ Loko ndhuna ya dzana ra masocha yi vonile leswi humeleleke, yi dzunisa Xikwembu, yi ku: “Hakunene munhu loyi a a lulamile.”

⁴⁸ Vanhu lavo tala a va hlengeletanile ku ta hlalela. Loko va vonile leswi humeleleke, va tlhelela emakaya va ri karhi va komba ku vaviseka lokukulu.

⁴⁹ Hinkwavo lava tivaneke na Yesu, ni vavasati lava n'wi landzeke loko a huma eGaleliya, a va yimele kule, va ri karhi va languta swilo sweswo.

Ta ku lahliwa ka Yesu

^50-51 A ku ri ni wanuna la vuriwaka Yosefa; a a ri munhu lonene wo lulama, a langutela Mfumo wa Xikwembu. A a ri xirho xa huvo ya Vayuda, kambe loko va kanela ni ku tsema mhaka ya Yesu, a a nga twanananga na vona.

⁵² Kutani a ya eka Pilato, a ya kombela ntsumbu wa Yesu.

⁵³ Kuteloko a wu hawurile, a wu phutsela hi nceka, a wu veka esirheni leri kovotliweke eribyeni, laha a ku nga si vekiwa munhu kona.

⁵⁴ Siku rero a ri ri Ravuntlhanu, kutani siku ra Savata a ri lava ku sungula.

⁵⁵ Na vona vavasati lava humeke eGaleliya na Yesu, va ta kusuhani, va languta sirha, ni mukhuva lowu ntsumbu wa yena wu vekiwaka ha wona.

⁵⁶ Kutani va tlhelela kaya, va ya lunghisa mirhi ya risuna ni mafurha layo nun'hwela; kambe hi siku ra Savata, va wisa hi ku ya hi nawu.