Luka 22 - BIBELE Mahungu Lamanene

Ta loko va twanana ku dlaya Yesu

¹ Nkhuvo wa Xinkwa lexo-ke-comela lowu vuriwaka Paseka, a wu ri kusuhi.

² Kutani vaprista lavakulu ni vatsari a va lava ndlela yo dlaya Yesu, kambe a va chava ntshungu.

³ Hiloko Sathana a nghena eka Yudasi, loyi a va ku i Iskariyota, un'wana wa lava khume na vambirhi;

⁴ kutani Yudasi a ya eka vaprista lavakulu, ni ka tindhuna ta valanguteri, ku ya kanela na vona hilaha a nga ta va nyiketa Yesu hakona.

⁵ Vona va tsaka, va pfumela ku n'wi nyika mali.

⁶ Yudasi a nkhensa, kutani a lava nkarhi lowunene wo va nyiketa yena ha wona, ntshungu wu nga swi tivi.

Ta Yesu loko a dya Paseka ni vadyondzisiwa

⁷ Kuteloko ku fikile siku ra Xinkwa lexo-ke-comela, ri nga leri va tlhavaka swinyimpfana swa Paseka ha rona,

⁸ Yesu a rhuma va Petro na Yohane, a ku ka vona: “Yanani, mi ya hi lunghisela nkhuvo wa Paseka, hi ta kota ku wu dya.”

⁹ Vona va ku ka yena: “Hi kwihi laha u lavaka leswaku hi ya ku lunghisela kona xana?”

¹⁰ A ku ka vona: “Loko mi nghenile emutini, mi ta hlangana ni wanuna la rhwaleke nghotsa ya mati; n'wi landzeni endlwini leyi a nga ta nghena eka yona.

¹¹ Kutani mi ta ku ka n'wini wa yindlu: ‘Mudyondzisi ú hi rhumile eka wena, ú ri, yi kwihi yindlu leyi a nga ta dyela eka yona Paseka, a ri ni vadyondzisiwa va yena, ke?’

¹² Yena ú ta mi komba yindlu leyikulu leyi nge henhla, leyi andlaleriweke; mi hi lunghisela kona.”

¹³ Hiloko va suka, va ya kuma swi ri hilaha a nga va byela hakona; kutani va lunghisa Paseka.

Ta Xilalelo xa Hosi

¹⁴ Loko nkarhi wu fikile, a ya eku dyeni swin'we ni vaapostola.

¹⁵ Kutani a ku ka vona: “Ndzi naverile ngopfu ku dya Paseka leyi na n'wina, ndzi nga si twisiwa ku vaviseka;

¹⁶ hikuva ndzi tiyisile ndzi ri ka n'wina, a ndzi nga ha yi dyi, yi kondza yi hetiseka eMfun'weni wa Xikwembu.”

¹⁷ Kavaloko a teka xinwelo, a nkhensa a ku: “Tekani, mi siyerisana.

¹⁸ Ndzi tiyisile ndzi ri ka n'wina, ku sukela sweswi a ndzi nga ha nwi swa mihandzu ya vhinya, ku kondza ku fika Mfumo wa Xikwembu.”

¹⁹ A va a teka xinkwa, kutani loko a nkhensile, a xi phema, a va nyika a ku: “Leswi i miri wa mina, [lowu nyiketiwaka hikwalaho ka n'wina; endlani leswi hi ku ndzi anakanya.”

²⁰ Hi mukhuva wolowo, a teka xinwelo loko va lalerile, a ku: “Xinwelo lexi i ntwanano lowuntshwa engatini ya mina, leyi halatiwaka hikwalaho ka n'wina.]

²¹ Kambe vonani, loyi a ndzi xengaka ú le ku dyeni na mina sweswi.

²² Loko a ri N'wana-wa-Munhu, ú ta tifambela hilaha swi bohiweke hakona; kambe, ú ni khombo munhu loyi a n'wi xengaka.”

²³ Kutani va sungula ku vutisana, va lava ku tiva leswaku a nga va mani exikarhi ka vona, loyi a nga ta swi endla.

Ta vadyondzisiwa loko va kanetana hi ta vukulukumba

²⁴ Kutani ku humelela ku kanetana exikarhi ka vona ku ta tiva loyi a nga ta langutiwa a ri lonkulu ka vona.

²⁵ Kambe Yesu a ku ka vona: “Tihosi ta matiko ta ma fuma, kutani vafumi va wona, va vuriwa ‘vahlayisi va tiko’.

²⁶ Swi nga tshuki swi va tano eka n'wina; kambe lonkulu exikarhi ka n'wina, a a kotise lontsongo; kutani loyi a lerisaka a a kotise la tirhelaka van'wana.

²⁷ Hikuva lonkulu i mani xana? Xana hi loyi a tshamaka eswakudyeni, kumbe hi loyi a tirhaka ku phamela van'wana xana? Ma swi tiva, hi loyi a tshamaka eswakudyeni. Kambe mina ndzi le xikarhi ka n'wina ndzi ri loyi a tirhelaka van'wana.

²⁸ Hi n'wina lava mi tiyiseleke na mina emiringweni ya mina.

²⁹ Hilaha Tata wa mina a ndzi nyikeke Mfumo hakona, na mina ndzi mi nyika wona;

³⁰ eMfun'weni wa mina, mi ta dya ni ku nwa mi ri na mina, kutani mi ta tshama eswiluvelweni, mi avanyisa tinyimba ta Israele leta 12.”

Ta Petro loko a tivisiwa leswaku ú ta landzula Hosi

³¹ Yesu a ku ka Petro: “Simoni, Simoni, yingisa: Sathana ú pfumeleriwile ku mi hlela hinkwenu kukota mavele,

³² kambe mina ndzi ku khongelerile, leswaku ku pfumela ka wena ku nga tshuki ku titivala. Kutani wena, loko u ta va u hundzukile, u ta tiyisa vamakwenu.”

³³ Kutani yena a ku: “Hosi, ndzi tilunghisele ku famba na wena ekhotsweni ni le ku feni.”

³⁴ Kambe a ku ka yena: “Petro, ndza ku byela leswaku namuntlha nkuku wu nga si ringa, u ta va u vurile kanharhu leswaku a wu ndzi tivi.”

Ta xinkwamana xa mali, ni nkwama, ni banga

³⁵ Kutani a ku ka vona: “Enkarhini lowu ndzi mi rhumeke mi ri hava xinkwamana xa mali, ni nkwama wa timbuva, ni tintanghu, xana mi ve mi pfumala nchumu ke?” Va ku: “A hi pfumalanga nchumu.”

³⁶ A ku ka vona: “Kambe sweswi, loyi a nga ni xinkwamana xa mali, a a xi teke, na wona nkwama a a wu teke, ni loyi a pfumalaka banga, a a xavise xiambalo xa yena, a tixavela rona,

³⁷ hikuva ndza mi byela leswaku tsalwa leri nge: ‘Ú hlayiwile ni swidyohi’, ri fanele ku hetiseka eka mina. Kunene timhaka leti nga vuriwa ehenhla ka mina, ta karhi ta hetiseka.”

³⁸ Kutani va ku: “Hosi, mabanga mambirhi hi lawa!” A ku ka vona: “Swi ringene!”

Ta Yesu loko a khongela entangeni wa Getsemani

³⁹ Kutani a suka a ya eNtshaveni ya Mitlhwari, hi ku tolovela ka yena; na vona vadyondzisiwa va n'wi landza.

⁴⁰ Loko a fikile kona, a ku ka vona: “Khongelani leswaku mi nga ngheni emiringweni.”

⁴¹ Kutani a suka a ya kulenyana na vona, hi mpfhuka wo ringana ku hoxa ka ribye, kutani a nkhinsama hi matsolo, a khongela, a ku:

⁴² “Tatana, loko u swi rhandza, xinwelo lexi xi tshinete kule na mina! Ntsena ku nga endliwi ku rhandza ka mina, kambe a ku endliwe ku rhandza ka wena.” [

⁴³ Kutani ntsumi yo huma etilweni yi humelela eka yena, yi n'wi tiyisa.

⁴⁴ Kakuloko a ri emaxangwini lamakulu, a khongela hi matimba ngopfu, nyuku wa yena wu ko wu xiririka, wu fana ni mathonsi ya ngati lama tshonelaka emisaveni.]

⁴⁵ Loko a hetile ku khongela, a suka a yima, a ta eka vadyondzisiwa, a va kuma va etlele hikwalaho ka gome.

⁴⁶ Kutani a ku ka vona: “Hikwalaho ka yini mi etlele xana? Pfukani, mi khongela, leswaku mi nga ngheni emiringweni.”

Ta Yesu loko a xengiwa ni ku khomiwa

⁴⁷ Loko a ha vulavula, ku humelela ntshungu wa vanhu; na yena loyi a va ku i Yudasi, un'wana wa lava khume na vambirhi, a a wu rhangele emahlweni; a tshinelela Yesu ku n'wi ntswontswa.

⁴⁸ Kambe Yesu a ku ka yena: “Yudasi, xana u nyiketa N'wana-wa-Munhu hi ku n'wi ntswontswa xana?”

⁴⁹ Lava a va ri na Yesu, loko va vona leswi lavaka ku humelela, va ku: “Hosi, xana hi fanela ku teka mabanga hi lwa ke?”

⁵⁰ Kutani un'wana wa vona a ba nandza wa Muprista lonkulu, a n'wi tsema ndleve ya xinene.

⁵¹ Kambe Yesu a hlamula a ku: “Tshikani! Mi nga ha engeti!” Kutani a khumba ndleve ya nandza yoloye, a n'wi horisa.

⁵² Kutani Yesu a vulavula ni lava nga n'wi tela, va nga vaprista lavakulu ni tindhuna ta Tempele ni vakulukumba, a ku: “Leswi mi humeke, mi ri ni mabanga ni tinhonga, ndzo va xigevenga xana?

⁵³ A ndzi ri na n'wina eTempeleni masiku hinkwawo; a mi ndzi khomanga. Kambe sweswi, hi wona nkarhi wa n'wina, hikuva ku fuma munyama.”

Ta Petro loko a landzula Yesu

⁵⁴ Kuteloko va n'wi khomile, va famba na yena, va n'wi yisa endlwini ya Muprista lonkulu. Kambe Petro a a landza hi le kule.

⁵⁵ Loko va tshiverile ndzilo exivaveni, va orha, Petro na yena a tshama exikarhi ka vona.

⁵⁶ Nandza un'wana wa wansati, loko a n'wi vona a tshamile a orha ndzilo, a n'wi langutisisa, a ku: “Loyi na yena, a a ri na munhu luya.”

⁵⁷ Kambe Petro a kaneta, a ku: “Wansati ndziwena, a ndzi n'wi tivi mina munhu loyi!”

⁵⁸ Endzhakunyana un'wana a n'wi vona, a ku: “Na wena, u wa vona.” Kambe Petro a ku: “Munhu ndziwena, a ndzi wa vona mina!”

⁵⁹ Kuteloko ku hundzile awara yi ri yin'we, un'wana a tiyisa, a ku: “Hakunene, na yena loyi, a a ri na luya; swi tiyile hikuva i Mugaleliya.”

⁶⁰ Kambe Petro a ku: “Munhu ndziwena, a ndzi tivi leswi u swi vulaka!” A ku a ha vulavula, nkuku wu ringa.

⁶¹ Kutani Hosi yi hundzuluka, yi languta Petro; kavaloko Petro a tsundzuka rito ra Hosi, loko yi te ka yena: “Nkuku wu nga si ringa, u ta va u ndzi landzurile kanharhu.”

⁶² Kutani Petro a humela handle, a ya rila hi xiviti.

Ta Yesu loko a tseketseriwa, a biwa

⁶³ Kutani vavanuna lava khomeke Yesu, va n'wi tseketsela, va n'wi ba.

⁶⁴ Kuteloko va n'wi bohile mahlo, va n'wi vutisa va ku: “Vhumbha loyi a ku beke.”

⁶⁵ Kutani va n'wi rhuketela hi swin'wana leswo tala.

Ta Yesu loko a yisiwa ehubyeni

⁶⁶ Loko byi xile, vakulukumba va tiko, va nga vaprista lavakulu ni vatsari, va hlengeletana; kutani va yisa Yesu ehubyeni ya vona.

⁶⁷ Va ku ka yena: “Loko u ri Mesiya, hi byele!” Yena a va hlamula a ku: “Hambi ndzi mi byela, a mi nga pfumeri,

⁶⁸ ni loko ndzi mi vutisa, a mi nga hlamuri.

⁶⁹ Ku sukela sweswi, N'wana-wa-Munhu ú ta tshama evokweni ra xinene ra Xikwembu xa matimba hinkwawo.”

⁷⁰ Hinkwavo va n'wi hlamula va ku: “Xana hileswaku u N'wana wa Xikwembu ke?” A ku ka vona: “Ma vula leswaku ndzi yena.”

⁷¹ Kutani va ku: “Ha ha lavela yini vumbhoni xana? Na hina hi swi twile swi huma enon'wini wa yena.”