Luka 20 - BIBELE Mahungu Lamanene

Va kaneta matimba ya Yesu

¹ Siku rin'wana, loko Yesu a dyondzisa vanhu eTempeleni ni ku va tivisa Evhangeli, vaprista lavakulu ni vatsari va fika swin'we ni vakulukumba va tiko, va ku ka yena:

² “Wa nga hi byela leswaku xana u endla swilo leswi hi matimba wahi ke? Loyi a ku nyikeke matimba lawa, i mani ke?”

³ A va hlamula a ku: “Na mina ndzi ta mi vutisa xivutiso.

⁴ Ndzi byeleni: Xana nkhuvulo wa Yohane a wu huma etilweni, kumbe eka vanhu ke?”

⁵ Vona va kanetana va ku: “Loko hi ku: ‘A wu huma etilweni’, ú ta ku: ‘Hikwalaho ka yini mi nga pfumelanga eka yena ke?’

⁶ Kambe loko hi ku: ‘A wu huma eka vanhu’, vanhu hinkwavo va ta hi khandla hi maribye, hikuva hinkwavo va kholwa leswaku Yohane a a ri muprofeta.”

⁷ Kutani va hlamula va ku: “A hi tivi laha a wu huma kona.”

⁸ Hiloko Yesu a ku ka vona: “Na mina, a ndzi nga mi byeri lomu matimba lawa ndzi tirhaka ha wona, ma humaka kona.”

Xifaniso xa nsimu ya vhinya ni vatirhi

⁹ Kutani a byela vanhu xifaniso lexi, a ku: “Munhu un'wana a a byarile mirhi ya vhinya ensin'wini ya yena, kutani a yi veka emavokweni ya vatirhi, yena a teka riendzo ra nkarhi wo leha.

¹⁰ Hi nguva ya kona, a rhuma nandza eka vatirhi, leswaku va n'wi nyika mihandzu yin'wana ya vhinya. Kambe vatirhi va n'wi ba, va n'wi tlherisa a nga ri na nchumu.

¹¹ A tlhela a rhuma nandza un'wana; na yena va n'wi ba, va n'wi khomisa ni tingana, kutani va n'wi tlherisa a nga ri na nchumu.

¹² A engeta a rhuma wa vunharhu; yoloye va n'wi boxa timbanga, va n'wi hlongola.

¹³ Endzhaku ka swona, n'wini wa nsimu a ku: ‘Ndzi ta endla yini? Ndzi ta rhuma n'wana wa mina, loyi ndzi n'wi rhandzaka; kumbexana loko va n'wi vona, va ta n'wi chava.’

¹⁴ Kambe vatirhi, loko va n'wi vona, va byelana va ku: ‘Mudyandzhaka hi loyi; a hi n'wi dlayeni, leswaku ndzhaka yi va ya hina.’

¹⁵ Kutani va n'wi cukumeta ehandle ka nsimu, va n'wi dlaya. Xana n'wini wa nsimu ú ta endla yini hi vona xana?

¹⁶ Ú ta ta, a ta lovisa vatirhi volavo, a nyika nsimu ya vhinya eka van'wana.” Loko va twa sweswo, va ku: “Swi nga tshuki swi va tano.”

¹⁷ Kambe Yesu a va languta a ku: “Xana ri vula yini tsalwa leri nge: “ ‘Ribye leri vaaki va nga ri nyenya, hi rona leri nga endliwa ribye lerikulu ra yinhla’ xana?

¹⁸ “Un'wana ni un'wana la nga ta wela ehenhla ka ribye leri, ú ta phyandleka; naswona ri ta phyandlasa loyi ri nga ta n'wi wela henhla.”

¹⁹ Kutani vaprista lavakulu ni vatsari a va navela ku n'wi khoma enkarhini wolowo, hikuva a va swi vonile leswaku a a vula vona hi xifaniso lexi, kambe a va chava ntshungu.

Ta ku humesela Khezari endzuvo

²⁰ Hiloko va xiya nkarhi lowunene, kutani va rhuma tinhlori leti ti tiendlaka vanhu lavo lulama, leswaku ti ta n'wi phasa hi marito ya yena, kutani ti n'wi nyiketa emavokweni ya muyimeri wa vuhosi.

²¹ Vanhu lava va vutisa Yesu va ku: “Mudyondzisi, ha swi tiva leswaku u vulavula ni ku dyondzisa hi ku lulama; a wu yi hi nghohe, kambe u dyondzisa ndlela ya Xikwembu hi ntiyiso.

²² Xana swa hi fanela ku humesela Khezari endzuvo, kumbe a swi hi faneli ke?”

²³ Kambe yena, hi ku vona mano ya vona, a ku ka vona:

²⁴ “Ndzi kombeni denari. Yi ni xifaniso xa mani ni vito ra mani ke?” Vona va ku: “I swa Khezari.”

²⁵ Hiloko a ku ka vona: “Hikokwalaho, nyikani Khezari leswi nga swa Khezari, ni Xikwembu leswi nga swa Xikwembu.”

²⁶ Kutani va tsandzeka ku n'wi phasa hi marito ya yena emahlweni ka vanhu; va hlamala hi ku hlamula ka yena, va miyela.

Xivutiso ehenhla ka ku pfuka eku feni

²⁷ Vasaduki a va vula leswaku vafi va nge pfuki. Kutani siku rin'wana van'wana va vona va ta eka Yesu, va fika va n'wi vutisa va ku:

²⁸ “Mudyondzisi, Muxe ú hi tsalele leswi: ‘Loko munhu a tekile nsati, kutani a fa a nga ri na vana, makwavo ú ta sala a hlayisa nsati wa mufi, a pfuxa ndyangu wa makwavo.’

²⁹ Kutani mhaka hi leyi: A ku ri ni vamakwavo va xinuna va 7; lowa mativula a teka nsati, kutani a fa a nga ri na vana.

³⁰ Ndzisana ya yena a hlayisa nsati wa mufi,

³¹ na lowa vunharhu a endla sweswo; swi va tano ni ka hinkwavo va 7; va fa, va nga siyanga vana.

³² Eku heteleleni, na yena wansati a fa.

³³ Leswi lava 7 hinkwavo va veke vanuna va wansati loyi, xana hi siku ra ku pfuka eku feni, ú ta va nsati wa mani exikarhi ka vona xana?”

³⁴ Yesu a va hlamula a ku: “Vanhu va minkarhi leyi va teka ni ku tekiwa;

³⁵ kambe lava nyikiwaka ku vona swa minkarhi leyintshwa ni swa ku pfuka ka vafi, a va ha teki kumbe ku tekiwa;

³⁶ a va ha fi, hikuva va fana ni tintsumi, va hundzuka vana va Xikwembu, hi mhaka ya leswi va nga pfuxiwa eku feni.

³⁷ Loko ku ri ku pfuka ka vafi, Muxe na yena ú tiyisile mhaka loko a ri kusuhi ni xihlahla, kutani a vula leswaku Hosi i Xikwembu xa Abrahama, ni Xikwembu xa Isaka, ni Xikwembu xa Yakobo.

³⁸ Hikokwalaho a hi Xikwembu xa lava feke, kambe i xa lava hanyaka; hikuva, eka xona, hinkwavo va hanya.”

³⁹ Hiloko vatsari van'wana va n'wi byela va ku: “Mudyondzisi, u vulavule swinene.”

⁴⁰ Kutani a va ha tiyelanga ku n'wi vutisa mhaka yin'wana.

Xivutiso ehenhla ka n'wana Davhida

⁴¹ Kutani a ku ka vona: “Xana vanhu va vula yini loko va ku: ‘Mesiya i n'wana Davhida’ xana?

⁴² Kasi yena Davhida ú vurile ebukwini ya Tipisalema a ku: “ ‘Hosi Xikwembu xi te ka N'wini wanga: Tana u ta tshama evokweni ra mina ra xinene,

⁴³ ndzi ko ndzi veka valala va wena ehansi ka minkondzo ya wena.’

⁴⁴ “Kutani loko Davhida a vula Mesiya a ku i N'wini wa yena, xana a nga va n'wana wa yena hi ndlela yihi xana?”

Ta Yesu loko a sandza vatsari

⁴⁵ Loko vanhu hinkwavo va ri karhi va n'wi yingisa, a ku ka vadyondzisiwa va yena:

⁴⁶ “Tivoneleni eka vatsari lava rhandzaka ku famba-famba va ambele tinguvu leto leha, va rhandza ni ku xewetiwa hi mafundzha emintsendzeleni; va hlawula switshamu leswinene emasinagogeni, va tsakela ni ku tshama lomu ko chaviseka eminkhubyeni.

⁴⁷ Hi vona va dyelelaka tinoni ni mindyangu ya tona, va endla ni swikhongelo leswo leha leswaku va ta voniwa. Va ta avanyisiwa hi ku avanyisa loku tlurisaka!”