Luka 14 - BIBELE Mahungu Lamanene

Ta Yesu loko a hanyisa munhu wa xirhumbe-rhumbe

¹ Hi siku ra Savata, Yesu a nghena endlwini ya nkulukumba un'wana wa Vafarisi, ku ya dya swakudya kona. Vanhu a va n'wi xiyaxiya swinene.

² Kutani munhu wo vabya hi xirhumbe-rhumbe, a a ri kona kwalaho.

³ Yesu a vutisa vadyondzisi va Nawu ni Vafarisi a ku: “Xana swa pfumeleriwa ku hanyisa munhu hi siku ra Savata, kumbe a swi pfumeleriwi xana?”

⁴ Vona va miyela. Kavaloko Yesu a teka muvabyi, a n'wi hanyisa, kutani a n'wi tshika a famba.

⁵ Kutani a ku ka vona: “Xana i mani eka n'wina la nga ta ka a nga hatlisi ku humesa n'wana wa yena kumbe homu ya yena ekheleni ra mati, loko swi wele kona hi siku ra Savata xana?”

⁶ Kutani va tsandzeka ku hlamula marito lawa.

Dyondzo eka murhambi ni varhambiwa enkhubyeni

⁷ Loko Yesu a vona hilaha lava rhambiweke enkhubyeni va tihlawulelaka hakona switshamu swa le mahlweni, a va dyondzisa hi xifaniso lexi nge:

⁸ “Loko munhu a ku rhamba enkhubyeni wa vukati, u nga yi u ya tshamisa exitshan'wini xa le mahlweni; hikuva swi nga kumeka leswaku un'wana loyi a ku tlulaka hi ku chaviseka ú rhambiwile na yena hi n'wini wa nkhuvo;

⁹ kutani loyi a nga mi rhamba hi vumbirhi bya n'wina, ú ta ta, a ku ka wena: ‘Sukela munhu loyi exitshamu lexi.’ Kutani u ta ya tshama u ri ni tingana exitshan'wini xa le ndzhaku.

¹⁰ Kambe loko u rhambiwile, yana u ya tshamisa exitshan'wini xa le ndzhaku, leswaku loko ku ta loyi a ku rhambeke, ú ta ku ka wena: ‘Nakulorhi, tshinela haleno henhla.’ Hi mukhuva wolowo, u ta dzunisiwa emahlweni ka hinkwavo lava tshameke eswakudyeni swin'we na wena.

¹¹ Hakunene un'wana ni un'wana loyi a tikurisaka, ú ta tsongahatiwa; kambe loyi a titsongahataka ú ta kurisiwa.”

¹² Kutani a ku ka loyi a n'wi rhambeke: “Loko u endla nkhuvo wa xifihlulo kumbe wa xilalelo, u nga rhambi vanghana va wena, kumbe vamakwenu, kumbe maxaka ya wena, kumbe swifumi leswi u vandzakaneke na swona ntsena, hikuva na vona va ta ku rhamba, kutani swi hundzuka xinkhenso eka wena.

¹³ Kambe loko u endla nkhuvo, rhamba vapfumari, ni swilema, ni vahluleki, ni lavo-fe-mahlo;

¹⁴ u ta kateka, hikuva a va na swa ku ku tlherisela va ku nkhensa ha swona, kutani hi siku ra ku pfuka ka lavo lulama u ta tlheriseriwa swona.”

Xifaniso xa nkhuvo lowukulu

¹⁵ Loko un'wana wa lava tshameke eswakudyeni, a twa timhaka teto, a ku ka Yesu: “Ku katekile loyi a nga ta dya swakudya eMfun'weni wa Xikwembu!”

¹⁶ Kambe Yesu a ku ka yena: “Munhu un'wana ú tshama a endla nkhuvo lowukulu wa swakudya, a rhamba vanhu lavo tala eka wona.

¹⁷ Kutani hi nkarhi wa ku dya a rhuma nandza wa yena ku ya tivisa lava rhambiweke a ku: ‘Tanani, swilo hinkwaswo swi lunghisiwile.’

¹⁸ Kambe hinkwavo va va nomo wun'we ku tilandzula. Lowo sungula a ku ka nandza: ‘Ndzi xavile nsimu, kutani ndzi fanele ku ya yi vona; ndzi kombela leswaku u ya va byela va ndzi khomela.’

¹⁹ Un'wana a ku: ‘Ndzi xavile khume ra tihavi, kutani ndzi ya eku ti ringeteni; ndzi kombela leswaku u ya va byela va ndzi khomela.’

²⁰ Un'wana a ku: ‘Ndza ha ku teka nsati, hikokwalaho a ndzi koti ku ta.’

²¹ Nandza a tlhela, a ya tivisa n'wini wa yena timhaka teto. Kavaloko n'wini wa yindlu a kariha, a ku ka nandza wa yena: ‘Hatlisa, u famba, u ya eswitarateni, ni le tindleleni ta muti, u tisa haleno vapfumari, ni swilema, ni lavo-fe-mahlo, ni vahluleki.’

²² Kutani nandza a ku: ‘Hosi, ku endliwile hilaha u leriseke hakona, kambe vutshamo bya ha ri kona.’

²³ Kutani n'wini a ku ka nandza: ‘Yana etindleleni, u rhendzeleka ni lomu ku biyiweke hi rihlampfu, u hluhlurheta vanhu ku nghena leswaku yindlu ya mina yi tala.

²⁴ Hikuva ndzi ri ka n'wina: A ku na munhu ni un'we wa lava rhambiweke la nga ta nantswa nkhuvo wa mina.’ ”

Ta mpingu wa ku landza Yesu

²⁵ Mintshungu leyikulu a yi famba na yena, kutani a hundzuluka a yi languta, a ku:

²⁶ “Loko un'wana a ta ka mina, kambe a nga ndzi rhandzi ku tlula tata wa yena, ni mana wa yena, ni nsati, ni vana, ni makwavo, hambi byi ri vutomi bya yena, a nga ka a nga vi mudyondzisiwa wa mina.

²⁷ Kutani loyi a nga rhwariki xihambano xa yena a ndzi landza, a nge koti ku va mudyondzisiwa wa mina.

²⁸ “Xana i mani exikarhi ka n'wina, la nga rhangiki hi ku tshama hansi loko a lava ku aka xihondzo, a hlaya leswi a nga ta humesa swona, ku vona loko mali ya yena yi ta ringana ku heta ntirho xana?

²⁹ Loko a nga endlanga sweswo, ú ta aka masungulo ntsena, kutani swi ya n'wi tsandza ku heta; hinkwavo lava nga ta swi vona va ta sungula ku n'wi hleka, va ku:

³⁰ ‘Munhu loyi ú sungurile ku aka, kambe ú tsandzekile ku heta.’

³¹ “Kumbe hi yihi hosi leyi humaka ku ya lwa ni hosi yin'wana, yi nga rhanganga hi ku tshama hansi, yi vona leswaku, xana hi vanhu va yona va 10 000 yi nga ya lwa ni hosi leyi taka yi ri ni vanhu va 20 000 xana?

³² Loko vanhu va yona va nga ringananga, yi ta rhuma tintsumi ku ya kombela eka nala a ha ri kule, leswaku ku nga vi na ku lwa.

³³ Kutani ke un'wana ni un'wana exikarhi ka n'wina la nga tshikiki leswi a nga na swona, a nga ka a nga koti ku va mudyondzisiwa wa mina.

Ta munyu lowu phyamaka

³⁴ “Munyu i xilo lexo nandziha, kambe loko wu phyama, wu ta lungiwa hi yini ke?

³⁵ A wa ha pfuni nchumu, hambi ku nonisa misava, kumbe ku hundzuka quva; wu cukumetiwa ehandle. La nga ni tindleve ku yingisa, a a yingise!”