Levhitika 2 - BIBELE Mahungu Lamanene

Ta magandzelo ya swa le masin'wini

¹ “Loko munhu a humesela HOSI Xikwembu magandzelo ya swa le masin'wini, ú fanele ku humesa mapa lamanene, a ma chela mafurha, a ma n'wan'wasela ni murhi wa risuna.

² Kutani a ya na swona eka vaprista, va nga vana va Aroni, a fika a nusa mapa lama nga ni mafurha a tata xandla, kutani muprista ú ta swi hisa alitarini ni murhi hinkwawo wa risuna, swi va swo suma ha swona; hi yona mhamba leyi hiseriwaka HOSI Xikwembu, leyi ku nun'hwela ka yona ku nga ta xi tsakisa.

³ Mapa lama saleke eka magandzelo lawa, ma ta va ya Aroni ni vana va yena; ma hlawulekile swinene, hikuva hi lawa ma saleke eka mhamba leyi hiseriwaka HOSI Xikwembu.

⁴ “Loko mi humesa magandzelo ya swa le masin'wini hi leswi swekiweke kunene, humesani swimbhundzwa leswo-ke-comela leswi endliweke hi mapa lamanene lama cheriweke mafurha, kumbe mi humesa xinkwa xo oma lexo-ke-comela lexi totiweke mafurha.

⁵ Loko mi humesa magandzelo hi xinkwa lexi oxiweke kunene, a xi ve xa mapa lamanene, lama cheriweke mafurha, ku nga ri comela.

⁶ Mi ta xi phemelela, mi xi chela mafurha. Lawa hi wona magandzelo ya swa le masin'wini.

⁷ Loko mi humesa magandzelo ya swa le masin'wini hi xinkwa lexi katingiweke kunene, a xi ve xa mapa lamanene lama cheriweke mafurha.

⁸ Magandzelo ya swa le masin'wini lama endliweke hi swilo leswi ma endleriwa HOSI Xikwembu, mi ta ma yisa eka muprista, kutani yena a ya na wona alitarini,

⁹ a fika a pambula swo suma ha swona, a swi hisa alitarini, yi va mhamba leyi hiseriwaka HOSI Xikwembu, leyi ku nun'hwela ka yona ku nga ta xi tsakisa.

¹⁰ Swakudya leswi saleke eka magandzelo lawa, swi ta va swa Aroni ni vana va yena; swi hlawulekile swinene, hikuva hi leswi saleke eka mhamba leyi hiseriwaka HOSI Xikwembu.

¹¹ “Magandzelo hinkwawo ya swa le masin'wini lawa mi ma humeselaka HOSI Xikwembu ma nga tshuki ma cheriwa comela, hikuva a ma cheriwi comela kumbe vulombe loko mi hisela HOSI Xikwembu emhamba;

¹² mi nga chela loko mi humesela HOSI Xikwembu emagandzelo ya ntshovelo wo sungula, kambe mi nga tshuki mi swi hisa alitarini leswaku swi va mhamba yo nun'hwela.

¹³ Magandzelo ya n'wina hinkwawo ya swa le masin'wini, ma cheleni munyu. Mi nga tshuki mi rivala ku wu chela, hikuva munyu wu fanisa ntwanano wa n'wina ni Xikwembu xa n'wina, hikokwalaho wu cheleni minkarhi hinkwayo.

¹⁴ “Loko mi humesela HOSI Xikwembu magandzelo ya swa le masin'wini hi swa ntshovelo wa n'wina wo sungula, mi fanele ku humesa tindzhoho leti katingiweke loko ta ha tsakama, kutani ti khuvutiwa.

¹⁵ Ehenhla ka tindzhoho leti, mi ta chela mafurha, mi n'wan'wasela ni murhi wa risuna. Lawa hi wona magandzelo ya swa le masin'wini.

¹⁶ Kutani muprista ú ta nusa tindzhoho leti ni mafurha ya kona, a ti hisa ni mirhi ya risuna hinkwato, a suma ha swona. Leyi hi yona mhamba leyi hiseriwaka HOSI Xikwembu.