Levhitika 11 - BIBELE Mahungu Lamanene

Ta leswi tengeke ni leswi nga tengangiki

¹ HOSI Xikwembu xi byela Muxe na Aroni

² ku ya vulavula ni Vaisraele, va va tivisa marito ya xona lama nge: “Exikarhi ka swiharhi hinkwaswo leswi hanyaka laha misaveni, leswi mi nga swi dyaka hi leswi:

³ Mi nga dya xiharhi xin'wana ni xin'wana lexi swinyondzwana swa xona swi avaneke hi le xikarhi, naswona swi ri leswi gayelaka.

⁴ Hambiswiritano, exikarhi ka swiharhi leswi gayelaka kumbe leswi swinyondzwana swa swona swi avaneke, leswi mi nga fanelangiki ku swi dya hi leswi: I kamela; ya gayela, kambe eka n'wina a yi ve leyi nga tengangiki, hikuva a yi na swinyondzwana leswi avaneke;

⁵ ni mbila; ya gayela, kambe eka n'wina a yi ve leyi nga tengangiki, hikuva a yi na swinyondzwana leswi avaneke;

⁶ ni mpfundla; wa gayela, kambe eka n'wina a wu ve lowu nga tengangiki, hikuva a wu na swinyondzwana leswi avaneke;

⁷ ni nguluve; yi ni swinyondzwana leswi avaneke hi le xikarhi, kambe eka n'wina a yi ve leyi nga tengangiki, hikuva a yi gayeli.

⁸ Mi nga tshuki mi dya nyama ya swiharhi leswi, ni loko swi file, mi nga tshuki mi swi khumba; eka n'wina a swi ve leswi nga tengangiki.

⁹ “Exikarhi ka swilo hinkwaswo leswi hanyaka ematini, ku nga va elwandle kumbe emilambyeni, mi nga dya ntsena leswi nga ni swicapila ni mahakatimba.

¹⁰ Kambe hinkwaswo leswi hanyaka elwandle kumbe enambyeni, swihadyana leswitsongo kumbe swiharhi leswikulu, loko swi nga ri na swicapila ni mahakatimba, ku dya swona swa yila.

¹¹ Minkarhi hinkwayo, ku dya nyama ya swona swi ta yila eka n'wina, hambi ku ri ku swi khumba loko swi file, swa yila.

¹² Ku dya xilo xihi na xihi lexi hanyaka ematini, lexi nga riki na swicapila ni mahakatimba, swa yila eka n'wina.

¹³ “Exikarhi ka tinyanyana, leti ti yilaka ku ti dya hi leti: I magama, ni makoti, ni tinkhozi;

¹⁴ ni swimhungu, ni van'warikapanyana hi ku ya hi tinxaka-xaka ta vona;

¹⁵ ni mawukuwuku hinkwawo hi ku ya hi tinxaka-xaka ta wona;

¹⁶ ni tiyimbhu, ni tibyatsu, ni man'an'ana, ni makhuhunu hi ku ya hi tinxaka-xaka ta wona;

¹⁷ ni swinkhovha, ni masekwa ya nhova, ni marhandzala;

¹⁸ ni maphikuphiku, ni minkorho, ni mincololwani;

¹⁹ ni magumba, ni tinghondho hi tinxaka-xaka ta tona; ni vagogosani, ni vamangadyana.

²⁰ “Switsotswana hinkwaswo leswi nga ni timpapa ni milenge ya mune, ku dya swona swa yila eka n'wina.

²¹ Eka swona, mi nga dya ntsena leswi nga ni tincondzo to tlula ha tona.

²² Leswi mi nga swi dyaka hi leswi: Tinxaka hinkwato ta tinjiya to kota magerere, ni marhida, ni tithagavele, ni timherhavunguvungu.

²³ Kambe switsotswana hinkwaswo leswi ngo va ni timpapa ni milenge ntsena, ku dya swona swa yila eka n'wina.

²⁴ “Swiharhi leswi hinkwaswo swi nga mi nyamisa; un'wana ni un'wana loyi a swi khumbaka loko swi file, siku rero ú ta va a nga tenganga ri ko ri pela,

²⁵ naswona un'wana ni un'wana loyi a swi rhwalaka loko swi file, ú ta fanela ku hlantswa swiambalo swa yena; hambiswiritano, ú ta va a nga tenganga ri ko ri pela.

²⁶ Xiharhi xin'wana ni xin'wana lexi swinyondzwana swa xona swi nga avanangiki hi le xikarhi, kumbe lexi nga gayeliki, eka n'wina a xi ve lexi nga tengangiki. Un'wana ni un'wana loyi a xi khumbaka, ú ta va a nga tenganga.

²⁷ Naswona, swiharhi hinkwaswo swa milenge ya mune leswi nga riki na swinyondzwana, eka n'wina a swi ve leswi nga tengangiki; un'wana ni un'wana loyi a swi khumbaka loko swi file, siku rero ú ta va a nga tenganga dyambu ri ko ri pela;

²⁸ loyi a swi rhwalaka loko swi file, ú fanele ku hlantswa swiambalo swa yena; hambiswiritano ú ta va a nga tenganga dyambu ri ko ri pela. Eka n'wina, swiharhi leswi a swi ve leswi nga tengangiki.

²⁹ “Exikarhi ka swihadyana leswi tateke misava, leswi nga tengangiki eka n'wina hi leswi: Timfukuzani, ni makondlo, ni minkwahle hi tinxaka-xaka ta yona;

³⁰ ni swipululu, ni magwavava, ni minkolombyani, leyikulu ni leyitsongo, ni timpfani.

³¹ Exikarhi ka swihadyana hinkwaswo, leswi hi swona leswi nga tengangiki eka n'wina. Un'wana ni un'wana loyi a swi khumbaka loko swi file, siku rero ú ta va a nga tenganga dyambu ri ko ri pela.

³² Loko xin'wana xa swihadyana leswi xi fa, kutani xi wela ehenhla ka xilo lexi vatliweke kunene, kumbe lexi nga lo rhungiwa, kumbe xa dzovo kumbe saka, kumbe xin'wana xo fana na sweswo lexi tirhisiwaka emutini, xilo xexo xi fanele ku hoxiwa ematini; hambiswiritano xi ta va xi nga tenganga dyambu ri ko ri pela, kutani hi kona xi nga ta tlhela xi va lexi tengeke.

³³ Loko xin'wana xa swihadyana leswi feke xi wela endzeni ka xibya lexi vumbiweke kunene, leswi nga ndzeni ka xibya xexo swi ta va swi nga ha tenganga, kutani xibya xa kona xi fanele ku fayiwa;

³⁴ swakudya leswi tengeke, loko swo cheriwa mati lama humaka exibyeni xexo, swi ta va swi nga ha tenganga; hambi swi ri swakunwa leswi tengeke leswi cheriwaka exibyeni xexo, swi ta va swi nga ha tenganga.

³⁵ Swibya hinkwaswo swa le xitangeni leswi khumbanaka ni xihadyana lexi feke, swi ta va swi nga ha tenganga; swi fanele ku fayeteriwa, hikuva swi ta va swi nga tenganga eka n'wina.

³⁶ Hambileswi swilo hinkwaswo leswi khumbanaka ni xihadyana lexi feke swi hundzukaka leswi nga tengangiki, swihlovo ni makhele ya mati swona swi tshama swi tengile.

³⁷ Naswona mbewu yihi na yihi leyi lavaka ku byariwa, yi tengile, hambiloko yo tshuka yi weriwa hi xin'wana xa swihadyana leswi feke.

³⁸ Hambiswiritano, loko ku ri leswaku mbewu ya kona a yi lovekiwile ematini, kutani xin'wana xa swihadyana leswi feke xi wela ehenhla ka yona, mbewu yoleyo yi ta va yi nga ha tenganga.

³⁹ “Loko xiharhi lexi mi pfumeleriwaka ku xi dya xi tshuka xi tifela hi xoxe, munhu loyi a xi khumbaka, siku rero ú ta va a nga tenganga dyambu ri ko ri pela;

⁴⁰ na yena loyi a dyaka nyama ya xona, a a hlantswe swiambalo swa yena, hambiswiritano siku rero ú ta va a nga tenganga dyambu ri ko ri pela; hambi a ri loyi a rhwalaka xiharhi lexi feke, ú ta fanela ku hlantswa swiambalo swa yena, hambiswiritano siku rero ú ta va a nga tenganga dyambu ri ko ri pela.

⁴¹ “Swihadyana hinkwaswo leswi tateke misava, swa yila ku swi dya.

⁴² Xihadyana xin'wana ni xin'wana lexi fambaka hi khwiri, kumbe lexi fambaka hi milenge ya mune, kumbe lexi fambaka hi milenge yo tala, swi nga swihadyana hinkwaswo leswi tateke misava, ku dya swona swa yila.

⁴³ Mi nga tshuki mi tithyakisa hi ku dya xin'wana xa swihadyana leswi hinkwaswo, leswi tateke misava. Mi nga tshuki mi tinyamisa ha swona, hikuva mi nga ta hundzuka lava nga tengangiki;

⁴⁴ hikokwalaho, tivoneleni leswaku mi va lava hlawulekeke, hikuva mina ndzi hlawulekile. Mi nga tshuki mi tinyamisa hi ku dya xihadyana xihi na xihi lexi kokovaka emisaveni.

⁴⁵ Hi mina HOSI Xikwembu; ndzi mi humesile etikweni ra Egipta leswaku ndzi va Xikwembu xa n'wina; hikokwalaho mi fanele ku va lava hlawulekeke, hikuva mina ndzi hlawulekile.”

⁴⁶ Hi yona milawu hi tlhelo ra swiharhi, ni tinyanyana, ni swivumbiwa hinkwaswo leswi hanyaka ni ku famba-famba ematini, ni swihadyana hinkwaswo leswi tateke misava.

⁴⁷ Milawu leyi yi komba ku hambana exikarhi ka swilo leswi tengeke ni swilo leswi nga tengangiki, ni le xikarhi ka swivumbiwa leswi dyiwaka ni leswi nga dyiwiki.