Hosiya 8 - BIBELE Mahungu Lamanene

Xikwembu xi tshinya tiko ra Israele

¹ Bana mhalamhala! Valala va lava ku juma tiko ra Israele ku fana ni magama; hikuva vanhu va tshovile ntwanano wa mina, va tlula ni nawu wa mina.

² Va huwelela eka mina va ku: “U Xikwembu xa hina, hina va tiko ra Israele hi tirhela wena!”

³ Kambe va tshika ku endla leswinene, kutani valala va va sala endzhaku.

⁴ Va tivekerile tihosi, kambe a hi mina ndzi va byeleke, va tihlawulerile varhangeri, kambe mina a va ndzi vikelanga. Va tiendlerile swikwembu swa swifaniso hi silivhere ya vona ni nsuku wa vona, swi nga swilo leswi swi nga ta va dlayisa.

⁵ N'wina va le Samariya, rhole ra n'wina ra ndzi nyenyetsa. Vanhu lava va ndzi hlundzukisa ngopfu, xana va ta tshama ku fikela rini va nga tenganga, xana?

⁶ Rhole ra kona ri endliwile hi mavoko ya vanhu va Israele; rhole leri ra Samariya, a hi xikwembu, ri ta fayeteriwa!

⁷ Lava byalaka xihuhuri, va ta tshovela xidzedze. Mavele lama nga rhumbukiki, ma nge vi na ntshovelo; hambiloko ntshovelo a wo va kona, a wu ta dyiwa hi vanhu va matiko man'wana.

⁸ Vanhu va tiko ra Israele sweswi va mitiwile; exikarhi ka matiko man'wana, va fana ni xibya lexi nga pfuniki nchumu.

⁹ Va tlhandlukile va ya etikweni ra Asiriya, va fana ni timangwa ta nhova leti hanyaka ti ri toxe; va ka Efrayimi va tixavele xinakulobye hi tinyiko.

¹⁰ Kambe hambiloko va tixavele vanghana ematikweni, ndzi le kusuhi ni ku va hlengeleta. Kutani ku nga ri khale va ta tshika ku tivekela tihosi ni tindhuna.

¹¹ Va ka Efrayimi va akile tialitari leto tala, va lava ku susa swidyoho, kambe ti hundzukile tialitari leti ti va dyohisaka.

¹² Hambiloko ndzi va tsalela milawu ka dzana-dzana, va yi teka yi nga va khumbi.

¹³ Va rhandza ngopfu ku humesa magandzelo, va tlhava swifuwo, va dya nyama, kambe sweswo a swi ndzi tsakisi mina HOSI. Milandzu ya vona a ndzi yi rivali mina HOSI, ndzi ta va bela swidyoho swa vona. Va ta fanela ku tlhelela etikweni ra Egipta.

¹⁴ Vanhu va tiko ra Israele va rivala Muvumbi wa vona. Va tiakela miti leyikulu; vanhu va tiko ra Yuda vona va aka miti leyi sirheleriweke; kambe mina ndzi ta hoxa ndzilo emitini leyi, wu ta herisa ni makhokholo ya kona.