Hosiya 5 - BIBELE Mahungu Lamanene

Ku biwa ka vanhu va tiko ra Israele ku le kusuhi

¹ Twanani mhaka leyi, n'wina vaprista! Yingisani, n'wina vaaki va tiko ra Israele! Rhiyani ndleve, n'wina vafumi va tiko! Nandzu wu dya n'wina, hikuva le Mispa mi tihundzurile mintlhamu, ni ritavala leri andlariweke entshaveni ya Taboro.

² Le Xitimi va cerile rindzi ri ya ri enta, kambe ndzi ta va ba hinkwavo!

³ Va ka Efrayimi ndza va tiva, ndzi nga ka ndzi nga kohliwi hi va tiko ra Israele; sweswi mi endleke vunghwavava n'wina va ka Efrayimi, tiko ra n'wina ra Israele ri nyamile.

⁴ Swiendlo swa vanhu lava swi va sivela ku tlhelela eka Xikwembu xa vona. Moya wa vunghwavava wu va nghenile hi matimba, kutani a va ha vuli nchumu hi HOSI.

⁵ Ku tikurisa ka vanhu va tiko ra Israele ka va mangalela, milandzu ya va ka Efrayimi yi ta va khugula va wa, va tiko ra Yuda na vona va ta wa swin'we ni va ka Efrayimi.

⁶ Va ta teka swifuwo leswikulu ni leswitsongo, va famba va lava HOSI Xikwembu, kambe va nga ka va nga xi kumi; HOSI Xikwembu xi tihambanisile na vona.

⁷ Vanhu lava a va tshembekanga eka HOSI Xikwembu, hikuva va kumile vana hi vuhunguki, kutani ku nga ri khale va ta herisiwa, vona ni masimu ya vona.

Nyimpi ya Yuda na Israele

⁸ Chayani nanga eGibeya, eRhama banani mhalamhala, yi mbvungunyiseni le Beta-Avene! Mi fikeriwile, n'wina va ka Benjamini!

⁹ Siku va ka Efrayimi va tshinyiwaka, tiko ra vona ri ta hundzuka marhumbi; leswi ndzi swi vulaka, swi ta humelela exikarhi ka tinyimba ta Israele.

¹⁰ Varhangeri va Yuda va tiendlile vahundzuluxi va mindzilekana; ndzi ta chululela vukari bya mina ehenhla ka vona ku fana ni mati.

¹¹ Va ka Efrayimi va tshikeleriwa, timhaka ti dya vona, hikuva va tinyiketele ku landzelela leswi nga pfuniki nchumu.

¹² Hikokwalaho ndzi ta hundzuka xilondza eka va ka Efrayimi, eka va tiko ra Yuda, ndzi ta fana ni vuvabyi byo borisa marhambu.

¹³ Va ka Efrayimi va vonile vuvabyi bya vona, na vona va ka Yuda va vona timbanga ta vona, kutani va ka Efrayimi va rhuma vanhu va ya eAsiriya, va ya kombela ku pfuniwa eka hosi leyikulu. Kambe hosi leyi a yi swi koti ku mi horisa, ni timbanga ta n'wina, a yi ti koti,

¹⁴ hikuva ndzi ta fana ni nghala loko ndzi yela va ka Efrayimi, eka va ka Yuda ndzi ta fana ni xinghalana. Mina hi xiviri xa mina ndzi ta va phatlulela, ndzi va rhwala ndzi famba na vona, ku pfumaleka wo va lamulela.

¹⁵ Ndzi ta suka ndzi famba ndzi tlhelela laha ndzi tshamaka kona, va ta kondza va tivona nandzu, kutani va famba va ndzi lava; va ta ndzi lava loko va ri ekhombyeni.