Hosiya 14 - BIBELE Mahungu Lamanene

Hosiya a khongotela vanhu va tiko ra Israele

¹ N'wina vanhu va tiko ra Israele, tlhelelani eka HOSI, Xikwembu xa n'wina, hikuva milandzu ya n'wina yi mi khugurile mi wa.

² Fambani mi ri ni lexi mi nga ta xi vula, mi tlhelela eka HOSI Xikwembu; mi fika mi ku ka xona: “Hi rivalele milandzu ya hina hinkwayo; lexinene lexi hi nga ku humeselaka xona, i marito lama humaka emilon'wini ya hina; ma amukele!

³ Hakunene, tiko ra Asiriya ri nga ka ri nga hi ponisi, ni tihanci ta nyimpi ti nga ka ti nga hi sirheleli; ni xilo lexi hi xi endleke hi mavoko ya hina, hi nge he engeti hi ku ka xona: ‘U xikwembu xa hina!’ Eka wena, hambi a ri n'wana wo pfumala vatswari ú kuma ku hlayiseka.”

Xikwembu xi tshembisa tiko ra Israele evutomi lebyintshwa

⁴ Ku tiarisa ka vona, ndzi ta ku tshungula; ndzi ta va rhandza hi mbilu hinkwayo, hikuva sweswi a ndza ha va hlundzukelanga.

⁵ Eka vanhu va tiko ra Israele, ndzi ta fana ni mpfula, va ta hluka va fana ni swiluva, va mila timitsu va tiya ku fana ni ntshava ya Lebanoni.

⁶ Swiluva swa kona swi ta baleka, swi saseka ku fana ni murhi wa mutlhwari, swi nun'hwela ku fana ni mirhi ya Lebanoni.

⁷ Va ta vuya va ta dzumba ehansi ka ndzhuti wa mina, va ta pfuxetiwa ku fana ni ntanga; va ta hluka ku fana ni murhi wa vhinya, ku nun'hwela ka vona ku ta fana ni ku nun'hwela ka vhinyo ya le Lebanoni.

⁸ N'wina va ka Efrayimi, a ndza ha lavi ku twa nchumu hi mhaka ya swikwembu swa hava. Hi mina ndzi nga ta hlamula swikhongelo swa n'wina, ndzi mi hlayisa. Ndzi fana ni murhi wa kipresi lowu tshamaka wu ri wa rihlaza, mihandzu ya n'wina yi huma eka mina.

Marito yo hetelela

⁹ Lava tlhariheke, a va twisise swilo leswi; lava swi twisisaka, a va swi hlayise etimbilwini ta vona. Tindlela ta HOSI i tinene, lava lulameke va famba eka tona, kasi vadyohi va khuguka va wa.