Habakuku 3 - BIBELE Mahungu Lamanene

Xikhongelo xa Habakuku

¹ Lexi i xikhongelo xa muprofeta Habakuku. Mayimbelelele ya xona i ya swirilo.

² HOSI, mahungu ya ntirho wa wena ndzi ma twile, kutani wa ndzi chavisa, we HOSI. Pfuxa mintirho ya wena eminkarhini ya sweswi! Tikombe ni manguva lawa! Kambe, eku kariheni ka wena, u nga rivali ku tsetselela.

³ Xikwembu xi ta tlhela xi ta hi le Temani, Muhlawuleki ú ta rhelela hi le ntshaveni ya Parani. Vukulukumba bya yena byi funengeta matilo, ku dzuneka ka yena ku tata misava.

⁴ A vangama hi ku hatima ka rihati, exandleni xa yena ku tlhava miseve ya rona, hikuva hi laha matimba ya yena ma titumbetaka kona.

⁵ Ntungu wu n'wi rhangela emahlweni, dari ri n'wi landza hi le ndzhaku.

⁶ Loko a yima, misava ya tsekatseka; loko a languta vamatiko, va rhurhumela. Tintshava leti nga riki na ku hela, ti mbundzumuka, ni switsunga swa khale swi mbombomela, swi nga leswi a a famba-famba eka swona khale.

⁷ Ndzi vonile mixaxa ya va le Kuxani yi hahluriwa, ni minceka yo pfala mintsonga ya va le Midiyani yi pewuka-pewuka.

⁸ Xana u hlundzukela milambu, we HOSI, u karihela yona xana? Xana ku hlundzuka ka wena ku kongomile lwandle ke, siku u gadaka mapapa wonge i tihanci ta wena, siku u ma khandziyaka wonge i makalichi ya wena yo hlula ha wona enyimpini, xana?

⁹ U hlomula vurha bya wena enkotlotweni wa byona, u tilulamisela ku copa miseve ya rito ra wena, kutani misava yi pfelerisa milambu.

¹⁰ Loko tintshava ti ku vona, ta chukuvanya; ndhambi yi halaka kunene, yi khuluka; mati ya xidziva ma hobomulana, magandlati ya xona ma tlakuka, wonge i mavoko.

¹¹ Dyambu ni n'weti swi yima laha swi tshamaka kona; swi nyamalarisiwa hi ku hatima ka miseve ya rihati ra wena, ni ku vangama ka matlhari ya wena lama phatimaka.

¹² U tsemakanya misava hi marito lama dzindzaka, kutani, eku kariheni ka wena, u kandziyela vamatiko.

¹³ U humelerile ku ta ponisa tiko ra wena, ni ku ponisa Muhlawuriwa wa wena, kambe u hlanhla yindlu ya lowo biha ku sukela exihlungwaneni, u yimbula masungulo ya yona ku fikela eribyeni.

¹⁴ Miseve ya wena yi tlhavile ndhuna ya mavuthu; mavuthu lawa, a ma humelerile tanihi xidzedze ma ta hi hangalasa; a ma tsakile tanihi loyi a xanisaka xisiwana exihundleni.

¹⁵ U kandziyela lwandle hi tihanci ta wena, kutani maboboma ya matimba u ma tlhutlhisa khuvi.

¹⁶ Loko ndzi twa leswi hinkwaswo, ndzi tela hi rhumbu, milomo ya mina yi tshavatana hi huwa ya kona; marhambu ya mina ma heleriwa hi mongo, ni matsolo ya mina ma gudlagudla. Ndzi langutela ntsena siku ra khombo, leri nga ta wela vanhu lava va hi hlaselaka.

¹⁷ Hambiloko nkuwa wu nga baleki swiluva, kumbe murhi wa vhinya wu nga cheli mihandzu; hambiloko mutlhwari wu kanganyisa mubyari wa wona, ni masimu ma nga humesi swakudya; hambiloko tinyimpfu ti fa hinkwato ematshangeni, ni tihomu ti nga ha vonaki eswivaleni,

¹⁸ mina ndza ha ta bela HOSI minkulungwana ya ntsako, ndzi tsakela Xikwembu lexi xi ndzi ponisaka.

¹⁹ HOSI Xikwembu i N'wini wanga ni matimba yanga, ú tiyisa milenge ya mina wonge i ya mhunti, a ndzi famba-fambisa eswivandleni leswi tlakukeke. (Leri i risimu ra Muyimbelerisi, ro hlaveleriwa hi swichaya-chayani.)