Habakuku 2 - BIBELE Mahungu Lamanene

Muprofeta ú langutela nhlamulo

¹ Ndzi ta khandziya exihondzweni ndzi lavelela, ndzi ta yima ehenhla ka khokholo ra valanguteri. Ndzi ta langutela ku vona leswi HOSI yi nga ta ndzi byela swona, ni leswi ndzi nga ta hlamula swona, loko yi vulavula na mina.

Nhlamulo ya Xikwembu

² Kutani HOSI yi ndzi hlamula yi ku: “Tsala ta xivono emaribyeni, hi voko ro saseka, leswaku swi ta hlayeka hi ku olova.

³ Tsala ta xivono, hikuva nkarhi wa tona wa ha ta; hambiswiritano, ti ya eku hetisekeni ka tona, ti nga ka ti nga kohli munhu. Loko to tshuka ti hlwela, lehisa mbilu; hikuva ku humelela, ti ta humelela, ti nga ka ti nga heleli empfhukeni.

⁴ Yingisa! Mukanganyisi a nge pfuki a tsakile emoyeni wa yena. Kasi munhu wo lulama ú ta hanya hi ku pfumela ka yena.

⁵ La tidzunisaka, hakunene wa xisa; munhu wo tikukumuxa a nge tshamiseki. Makwanga ya yena ma ahlamile tanihi xivandla xa vafi. Ú fana ni rifu: A nga xurhi! Ú tihlengeletela vanhu va matiko hinkwawo, a khayima va tinxaka hinkwato, a vuya na vona ekaya.”

Khombo eka lava xaniseke van'wana

⁶ Kambe hinkwavo lava khomiweke, va nga ka va nga tshiki ku sandza nala wa vona ni ku n'wi hlekula hi marito. Va ta ku: “Ú ni khombo loyi a tihlengeletelaka swilo leswi nga riki swa yena. (Ú ta swi endla ku fikela rini xana?) Ú ni khombo loyi a fumisiwaka hi ku rihisa varikwavo.”

⁷ Xana a va nga humeleli siku rin'wana hi xitshuketa, vanhu lava va nga ta mi rihisa, xana? Xana a ku nga pfuki lava va nga ta mi tsekatsekisa, xana?

⁸ Leswi mi hlaseleke vaaki va matiko layo tala, hinkwavo lava saleke, hi vona lava nga ta mi hlasela, hikwalaho ka vanhu lava mi halateke ngati ya vona, kumbe hi mhaka ya leswi mi xaniseke matiko, ni miti, ku katsa ni vaaki hinkwavo va yona.

⁹ Ú ni khombo loyi a fumisaka ndyangu wa yena hi bindzu lero biha, leswaku a ta aka xisaka xa yena exivandleni lexi tlakukeke, ni ku ya tumbela kona, a ta ka a nga weli hi khombo.

¹⁰ Kasi, hi makungu ya wena, u vangele ndyangu wa wena etingana. Hi ku herisa vanhu va tinxaka leto tala, u lahlekeriwile hi vutomi bya wena.

¹¹ Hambi ma ri maribye ya le makhumbini, ma ta ku mangalela hi xirilo xa wona, timhandze ta lwangu ti ri karhi ti hlamulana na wona.

¹² Ú ni khombo loyi a tiakelaka ntsindza hi ku halata ngati ya vanhu, la vekaka masungulo ya muti hi ku endla leswo homboloka.

¹³ Yingisa! Vanhu va matiko va tikarhatela leswi nga ta tshwa ntsena, kutani vaaki va wona va tirhela mahala. Xana mhaka leyi a yi humi eka HOSI ya matimba hinkwawo xana?

¹⁴ Ina, kutani lava tivaka ku dzuneka ka HOSI va ta tata misava, ku fana ni mati lama funengetaka hinkwako elwandle.

¹⁵ Ú ni khombo loyi a karihelaka vaakelani va yena, wonge hi loko a va kela ndzheko wa vukari, va ko va pyopyiwa ha byona, leswaku a ta hlalela tingana ta vona.

¹⁶ Kasi hi wena la nga ta khomiwa hi tingana, ematshan'wini ya ku va la chavisekaka. Tinwele u ri wena, u dedeleka. Xinwelo xa vukari lexi nga vokweni ra xinene ra HOSI xi ta kondza xi fika eka wena, kutani ku chaviseka ka wena ku ta hundzuka tingana letikulu.

¹⁷ Ku xanisa ka wena eLebanoni ku ta ku hundzukela; ndlela leyi u onheke swiharhi ha yona, yi ta ku vangela ku chava lokukulu, hikwalaho ka vanhu lava u halateke ngati ya vona, kumbe hi mhaka ya leswi u xaniseke tiko, ni miti, ku katsa ni vaaki hinkwavo va yona.

¹⁸ Xana ku pfuna ka xifaniso xa xikwembu xa hava hi kwihi ke? Loko muvatli wa xona a hetile ku xi vatla, i xifaniso xa nsimbhi ntsena, lexi dyondzisaka mavunwa. Muvatli ú veka ku tshemba ka yena eka xivumbiwa xa yena, loko a ri karhi a vatla swikwembu leswi nga vulavuriki.

¹⁹ Ú ni khombo loyi a nge eka nsinya: “Pfuka!” ni le ka ribye leri nga vulavuriki: “Suka u yima!” Xana swilo leswi swi ta ku hlavutela yini ke? Languta, swi namekiwile nsuku ni silivhere, kambe a swi hefemuli ni kutsongo.

²⁰ Kambe HOSI yi le ndlwini ya yona leyo hlawuleka; misava hinkwayo a yi miyele hi xichavo emahlweni ka yona, yi ku whíí!