Ezra 9 - BIBELE Mahungu Lamanene

Ta lava nga teka vasati exikarhi ka vamatiko

¹ Endzhaku ka loko swilo leswi swi endliwile, varhangeri va ta eka mina va fika va ku: “Vaisraele, ni Valevhi, ni vaprista, va tinyiketile eka manyala lama endliwaka hi vamatiko, a va tihambanisanga ni Vakanana, ni Vahiti, ni Vaperesi, ni Vayebusi, ni Vaamoni, ni Vamowabu, ni Vaegipta, ni Vaamori.

² Va titekele vasati, va tekela ni vana va vona evasati exikarhi ka vamatiko; hikokwalaho, va nyamisile ndyangu lowo hlawuleka wa Xikwembu. Tindhuna ni varhangeri, hi vona va khumbiwaka ngopfu hi mhaka ya ku dyoha loku.”

³ Kuteloko ndzi twile leswi, ndzi handzulela swiambalo swa mina hinkwaswo, ndzi tihluva ni misisi ni malebvu, kutani ndzi tshama ehansi, ndzi ku gòò!

⁴ Kutani hinkwavo lava va xiximaka milawu ya Xikwembu xa Vaisraele, va ta va ta ndzi rhendzela laha a ndzi tshamile kona ndzi te gòò, hi mhaka ya lava nga tshembekangiki, lava vuyeke hi le vukhumbini. Va tshamile na mina ku kondza ku fika nkarhi wa magandzelo ya madyambu.

⁵ Kutani hi nkarhi wa magandzelo ya madyambu, ndzi suka laha a ndzi rila ndzi ri kona, ndzi ambele swiambalo leswi swi handzukeke, ndzi nkhinsama ndzi khongela HOSI Xikwembu ndzi tlakusile mavoko,

⁶ ndzi ku: “We Xikwembu xanga, ndzi ni tingana, ndzi chava ni ku tlakusa mahlo ndzi languta eka wena Xikwembu xa mina, hikuva ku homboloka ka hina ku tlula mpimo, ni nandzu wa hina wu dliva tilo.

⁷ Ku sukela enkarhini wa vatatana, ku ta fika namuntlha, ha ha ri ni nandzu lowukulu. Hina ni tihosi ta hina, ni vaprista, hi nyiketiwile emavokweni ya tihosi ta vamatiko hikwalaho ka swidyoho swa hina; hi hlaseriwile hi fumu, hi yisiwa evukhumbini, hi tekeriwa swilo swa hina, hi khomisiwa tingana, ku fana ni namuntlha.

⁸ Kambe masikunyana lawa, wena HOSI Xikwembu xa hina u hi kombile tintswalo hi ku hi siyela masalela, ni ku hi endlela vutshamo endhawini ya wena leyo hlawuleka, leswaku u ta hi hanyisa ni ku hi vevukisela ndzhwalo wa vuhlonga.

⁹ Hina, hi mahlonga; kambe wena Xikwembu xa hina a wu hi tshikanga evuhlongeni, u hi kombile tintswalo ta wena leto tshembeka emahlweni ka tihosi ta Vaperesi, kutani ti hi vevukiserile mindzhwalo leswaku hi ya aka yindlu ya Xikwembu xa hina, hi yi pfuxa hi vuntshwa; naswona ti hi sirhelerile eYuda ni le Yerusalema.

¹⁰ “Kutani we Xikwembu xa hina, ha ha ta vula yini loko ku humelele leswi xana? Hi tlurile swileriso swa wena,

¹¹ leswi u hi byeleke swona hi milomo ya vaprofeta, malandza ya wena, u ku: ‘Tiko leri mi yaka eka rona mi ya ri teka ri va ra n'wina, a ri basanga, ri nyamisiwile hi manyala ya vaaki va rona, lawa ya tateke tiko hinkwaro.

¹² Kutani mi nga tshuki mi pfumela leswaku vana va n'wina va tekiwa hi vana va vona, hambi va ri vana va vona mi nga pfumeli leswaku va tekiwa hi vana va n'wina. Vanhu lava, mi nga tshuki mi va pfuna kumbe ku va endlela leswi swi nga ta va fumisa, leswaku mi ta va ni matimba, mi dya leswo saseka swa tiko leri, mi siyela ni vana va n'wina ndzhaka leyi nga heriki.’

¹³ Hambiloko hi weriwile hi makhombo layo tala hikwalaho ka mahanyelo ya hina layo biha, ni milandzu leyi hi tivangeleke yona, ha swi vona leswaku nkhavi lowu u hi beke ha wona, i wutsongo, a wu ringananga swidyoho swa hina; tlhandlakambirhi, u hi siyerile van'wana, va sala va hanya.

¹⁴ Hikokwalaho, xana hi nga ha tlhela hi tlula swileriso swa wena, hi tekelana vasati ni vanhu lava va endlaka manyala lawa, xana? Loko ho endla tano, wena u ta hi hlundzukela, u hi herisa ku kondza ku nga ha sali munhu, naswona a ku nga vi na loyi a nga ta pona.

¹⁵ We HOSI Xikwembu xa Israele, wena u lulamile, hikuva van'wana va hina va ponile, u va siyile va hanya ku fika namuntlha. Hi langute, hi tile eka wena ni milandzu ya hina; a swi hi fanelanga ku ta emahlweni ka wena, hikuva hi ku dyoherile.”