Ezra 8 - BIBELE Mahungu Lamanene

Vanhu lava va vuyeke na Ezra hi le vukhumbini

¹ Lowu i nongonoko wa tinhloko ta mindyangu ni mavito ya vanhu lava ndzi sukeke na vona eBabilona, enkarhini wa ku fuma ka hosi Ataserkisi:

² Eka va ka Finiyasi, ku hume Gerixoni; eka va ka Itamara, ku hume Daniele; eka va ka Davhida, ku hume Hatuxi

³ wa ka Xekaniya. Eka va ka Porixi, ku hume Zakariya, loyi a a tsariwile ni vavanuna va 150.

⁴ Eka va ka Pahata-Mowabu, ku hume Eli-Howenayi n'wana Zerahiya, a ri ni vavanuna va 200.

⁵ Eka va ka Zatu, ku hume Xekaniya n'wana Yahaziele, a ri ni vavanuna va 300.

⁶ Eka va ka Adina, ku hume Ebede n'wana Yonatani, a ri ni vavanuna va 50.

⁷ Eka va ka Elamu, ku hume Yexaya n'wana Ataliya, a ri ni vavanuna va 70.

⁸ Eka va ka Xefatiya, ku hume Zebadiya n'wana Mikaele, a ri ni vavanuna va 80.

⁹ Eka va ka Yowabu, ku hume Obadiya n'wana Yehiele, a ri ni vavanuna va 218.

¹⁰ Eka va ka Bani, ku hume Xelomiti n'wana Yosifiya, a ri ni vavanuna va 160.

¹¹ Eka va ka Bebayi, ka hume Zakariya n'wana Bebayi, a ri ni vavanuna va 28.

¹² Eka va ka Azagadi, ku hume Yohanani n'wana Hakatani, a ri ni vavanuna va 110.

¹³ Lava va heteleleke ku suka i va ka Adonikama; eka vona ku hume Elifelete, na Yuwele, na Xemaya, va ri ni vavanuna va 60.

¹⁴ Eka va ka Bigivhayi, ku hume Utayi, na Zakuru, va ri ni vavanuna va 70.

Ezra a kombela Valevhi

¹⁵ Vanhu lava, ndzi va hlengeletile enambyeni lowu khulukaka wu kongoma le Ahavha, kutani hi gova masiku manharhu kona. Kuteloko ndzi ri karhi ndzi xiyaxiya ntshungu ni vaprista, ndzi kuma leswaku ku hava Mulevhi na un'we exikarhi ka vona.

¹⁶ Hiloko ndzi vitana Eliezere, na Ariele, na Xemaya, na Elnatani, na Yaribi, na Elnatani, na Natani, na Zakariya, na Mexulama, lava a va ri varhangeri; ndzi vitana na Yoyaribi na Elnatani, va nga vavanuna lava tlhariheke.

¹⁷ Kutani ndzi va rhuma eka Ido, murhangeri wa ndhawu leyi vuriwaka Kasifiya, ndzi va byela leswi va faneleke ku fika va byela Ido ni vamakwavo lava va tirhaka eTempeleni, ku nga ku hi rhumela vanhu lava va nga ta tirha endlwini ya Xikwembu xa hina.

¹⁸ Xikwembu xa hina xi hi katekisile, kutani lava va rhumiweke va hi vuyele ni wanuna wo twisisa, yena Xerebiya wa ka Maheli n'wana Levhi wa Israele. A a ri ni vana va yena ni va ka vona, hinkwavo va ri 18.

¹⁹ Naswona va hi vuyele na Haxabiya, loyi a teke na Yexaya wa Merari ni va ka vona ni vana va vona, hinkwavo va ri 20.

²⁰ Ehandle ka lava, ku tile ni vatirhi va le Tempeleni va 220, va nga vatukulu va lava va vekiweke hi Davhida ni tindhuna ta yena ku pfuna Valevhi. Hinkwavo lava, mavito ya vona a ma tsariwile.

Ezra a veka siku ro titsona swakudya

²¹ Loko hi ri le nambyeni wa Ahavha, ndzi vekile siku ra ku titsona swakudya, leswaku hi titsongahata emahlweni ka Xikwembu xa hina, hi kombela eka xona ku basiseriwa ndlela, hina ni vana va hina ni swilo swa hina.

²² A ndzi nyuma ku kombela hosi ya tiko leswaku yi hi nyika masocha ni vagadi va tihanci leswaku va hi sirhelela eka valala endleleni, hikuva a ndzi yi byerile leswaku Xikwembu xa hina xi sirhelela hinkwavo lava va xi tsakelaka, kambe hinkwavo lava va xi fularhelaka xa va hlundzukela swinene.

²³ Hiloko hi titsona swakudya, hi kombela Xikwembu xa hina ku hi pfuna, kutani xona xi yingisa xikhongelo xa hina.

Tinyiko ta yindlu ya Xikwembu

²⁴ Kutani ndzi hlawula vaprista va 12 lava va nga varhangeri, swin'we na Xekaniya na Haxabiya ni vavanuna va ka vona va khume.

²⁵ Kutani ndzi hlaya silivhere ni nsuku ni swibya, ti nga tinyiko leti ti humesiweke hi hosi ya tiko ni tindhuna ta yona ni varhangeri, ni Vaisraele hinkwavo lava a va ri kona, va ti humesele yindlu ya Xikwembu xa hina, kutani ndzi swi veka emavokweni ya vaprista.

²⁶ Ndzi va nyikile silivhere yo tika ku tlula tithani ta 26; na swibya swa silivhere swa 100, swo tika swinene; na nsuku wa kwalomu ka tithani ta 4.

²⁷ Ndzi va nyikile na tindyelo ta nsuku ta 20, to tika 120 kg; na swibya swimbirhi swa koporo leyinene yo vangama, ya nxavo wo ringana ni wa nsuku.

²⁸ Kutani ndzi ku ka vona: “N'wina mi hlawulekile emahlweni ka HOSI Xikwembu, na swona swibya leswi, swi hlawulekile. Silivhere leyi, na nsuku lowu, vanhu va swi humesile hi ku titwa, va humesela HOSI Xikwembu xa vatata wa n'wina.

²⁹ Swilo leswi, swi hlayiseni ku kondza mi ya swi humesa emahlweni ka vaprista ni Valevhi ni tinhloko ta mindyangu ya Vaisraele kwale Yerusalema, endzeni ka yindlu ya HOSI Xikwembu.”

³⁰ Kutani vaprista ni Valevhi va teka silivhere ni nsuku ni swibya leswi swi hlayiweke, leswaku va ta swi yisa endlwini ya Xikwembu xa hina le Yerusalema.

Ezra a tlhelela eYerusalema

³¹ Kutani hi siku ra vu-12 ra n'hweti yo sungula hi suka enambyeni wa Ahavha, hi kongoma eYerusalema, Xikwembu xa hina xi ri karhi xi hi sirhelela ni ku hi lamulela emavokweni ya valala ni swigevenga.

³² Loko hi fikile eYerusalema hi tshama masiku manharhu,

³³ kutani hi siku ra vumune hi ya endlwini ya Xikwembu xa hina, hi fika hi hlaya silivhere, ni nsuku ni swibya, hi swi veka emavokweni ya muprista Meremoto n'wana Uriya, a ri na Eliyazara n'wana Finiyasi, ni Valevhi vambirhi, Yozabada n'wana Yexuwa, na Nowadiya n'wana Binuyi.

³⁴ Swilo hinkwaswo swi hlayiwile swi tlhela swi pimiwa, ku tsariwa ni ntiko wa swona.

³⁵ Enkarhini wolowo, lava va vuyeke hi le vukhumbini va humesa magandzelo lama hisiwaka, va humesela Xikwembu xa Vaisraele. Vaisraele hinkwavo va humesile tinkuzi ta 12, ni makhuna ya 96, ni swinyimpfana swa 77, ni swiphongho swa 12 swa mhamba yo susa swidyoho. Hinkwaswo leswi, a swi ri swa magandzelo lama hiseriwaka HOSI Xikwembu.

³⁶ Va fikisile ni xileriso xa hosi ya tiko eka vayimeri va yona ni tindhuna ta yona ta le xifundzheni lexi nga vupeladyambu bya Yufrata, kutani vona lava va pfuna Vaisraele, va seketela na ntirho wa yindlu ya Xikwembu.