Ezra 4 - BIBELE Mahungu Lamanene

Makungu ya ku aka Tempele ma kavanyetiwa

¹ Kuteloko valala va va ka Yuda ni va ka Benjamini va twa leswaku lava vuyeke hi le vukhumbini va le ku akeni ka Tempele ya HOSI Xikwembu xa Israele,

² va ya eka Zerubabele ni le ka tinhloko ta mindyangu, va fika va ku ka vona: “Hi pfumeleleni hi aka na n'wina Tempele, hikuva hina na n'wina hi khongela Xikwembu xin'we; ku sukela loko Esari-Hadoni hosi ya Asiriya a hi tisile haleno, a hi hamba hi xi humesela magandzelo.”

³ Kambe Zerubabele na Yexuwa ni tinhloko ta mindyangu ya Vaisraele, va va hlamula va ku: “Hina a hi swi lavi leswaku mi aka na hina yindlu ya Xikwembu xa hina. Yindlu ya HOSI Xikwembu, hi ta yi aka hi ri hexe, hilaha Korexe hosi ya Vaperesi a hi leriseke hakona.”

⁴ Hiloko vanhu lava va heta va ka Yuda matimba, va va chavisa ku aka,

⁵ va xava ni vatsundzuxi va hosi leswaku va onha makungu ya va ka Yuda. Va endlile sweswo nkarhi hinkwawo lowu Korexe a fumeke ha wona etikweni ra Vaperesi, ni le nkarhini wa ku fuma ka Dariyosi etikweni rero.

Ta ku kavanyetiwa ka makungu ya ku pfuxa muti wa Yerusalema

⁶ Kuteloko Ahasuwerusi a ha ku sungula ku fuma, valala va va ka Yuda ni va le Yerusalema, va tsala papila va va hehla.

⁷ Enkarhini wa Ataserkisi, Bixilama na Mitiredata na Tabele ni vanghana va vona va tsalela Ataserkisi hosi ya Vaperesi epapila hi ririmi ra Xiaramu, leswaku ri ta hlamuseleka.

⁸ Rehumi ndhunankulu, na Ximixayi matsalani, va tsalela hosi Ataserkisi epapila, va hehla vaaki va Yerusalema,

⁹ va ri tsala ni vanghana va vona hinkwavo va nga vaavanyisi, ni tindhuna, ni valanguteri, ni malandza ya hosi, swin'we ni va le Ereka, ni va le Babilona, ni va le Susa va nga va le Elamu,

¹⁰ ni vanhu lava rhurhisiweke hi nganakana leyikulu Asinapara leswaku va ya tshama emitini ya Samariya ni le xifundzheni xa le vupeladyambu bya nambu wa Yufrata.

¹¹ Papila ra kona a ri ku: “Eka wena hosi Ataserkisi, hina malandza ya wena lama tshamaka evupeladyambu bya nambu wa Yufrata, hi ri: Xewani!

¹² We hosi, hi ku tivisa leswaku Vayuda lava u va tlheriseleke haleno, va yile eYerusalema, kutani sweswi va le ku pfuxeni ka muti lowu wo tiarisa, wo karhata; va sungurile ku pfuxa rirhangu, kutani va ta heta ku aka ku nga ri khale.

¹³ We hosi, swi tive leswaku loko va nga kota ku heta rirhangu ra muti lowu, a va nga ha humesi xibalo kumbe ndzuvo, kutani tiko a ri nga ha vi ni xuma xo ringana.

¹⁴ Hina hi tshembile wena ntsena, kutani swi nge hi tsakisi ku ku vona u wa, we hosi ya hina; hikokwalaho, hi ku tsundzuxa

¹⁵ leswaku u kambisisa buku ya matimu ya vatata wa wena. Loko u kambisisile, u ta swi vona leswaku vaaki va muti lowu i vanhu vo tiarisa, lava lwaka ni tihosi ni tindhuna. Ku sukela khale, hi vona va pfuxaka mpfilumpfilu; hi swona leswi swi endleke leswaku muti lowu wu herisiwa.

¹⁶ We hosi, ha ku tsundzuxa leswaku loko wo tshika vanhu lava va pfuxa muti lowu ni rirhangu ra wona, wena a wu nga ha vi na nchumu exifundzheni xa le vupeladyambu bya nambu wa Yufrata.”

¹⁷ Kutani hosi yi hlamula yi ku: “Eka Rehumi ndhunankulu, na Ximixayi matsalani, ni vanghana va n'wina lava tshamaka eSamariya ni le xifundzheni hinkwaxo xa vupeladyambu bya nambu wa Yufrata, xewani!

¹⁸ Papila leri mi hi tsaleleke rona ri fikile, kutani va ndzi hlayerile rona hi ndlela leyi twakalaka.

¹⁹ Kutani ndzi veke nawu wa leswaku mhaka leyi yi kambisisiwa, swi kumeka leswaku hakunene vaaki va muti lowu ku sukela ni khale a va nga twanani ni tihosi. Hi vona va pfuxaka mpfilumpfilu ni madzolonga.

²⁰ Naswona a ku ri ni tihosi ta matimba eYerusalema, ti fuma xifundzha hinkwaxo xa le vupeladyambu bya nambu wa Yufrata, kutani xibalo ni ndzuvo a to teka swi va swa tona.

²¹ Kutani mina, ndzi ri, lerisani vanhu valavo leswaku va tshika ku aka muti wolowo; va nga endli nchumu, loko va nga si kuma rito leri humaka eka mina.

²² Vonani leswaku mi nga tshuki mi hlwela emhakeni leyi, hikuva mina hosi ndzi nga lahlekeriwa ngopfu.”

²³ Kuteloko papila ra hosi Ataserkisi ri hlayeriwile Rehumi na Ximixayi matsalani ni vanghana va vona, vona va hatla va suka, va ya eYerusalema, va xanisa Vayuda, va va tshimbisa ku aka.

²⁴ Kutani ntirho wa ku aka yindlu ya Xikwembu le Yerusalema wu yima; wu yimise sweswo ku fikela lembe ra vumbirhi ra ku fuma ka Dariyosi hosi ya Vaperesi.