Ezra 10 - BIBELE Mahungu Lamanene

Makungu yo herisa ku teka vasati exikarhi ka vamatiko

¹ Loko Ezra a ri karhi a khongela kusuhi ni yindlu ya Xikwembu, a kombela leswaku xi va rivalela xidyoho lexi, a rila a titlatlatela ehansi, kutani Vaisraele lavo tala va ya va fika va n'wi rhendzela, va ri vavanuna, ni vavasati, ni vana, va ri karhi va rila hi xiviti lexikulu.

² Kutani Xekaniya n'wana Yehiele wa ka Elamu a ku ka Ezra: “Kunene hi tshikile ku tshembeka ka hina eka Xikwembu xa hina, hi ku ya hi ya teka vasati exikarhi ka vamatiko lava nga tikweni leri; kambe hambiswiritano wonge tiko ra Israele ri nga ha tsetseleriwa.

³ Kutani sweswi swa antswa hi tiboha eka Xikwembu xa hina leswaku hi ta hlongola vavasati lava hinkwavo ni vana va vona. Hina hi ta landza switsundzuxo swa wena n'wini wa hina, ni swa lava va xiximaka swileriso swa Xikwembu xa hina. Mhaka leyi yi fanele ku tirhiwa hi ku landza nawu.

⁴ Suka u yima; lowu i ntirho wa wena, hina hi ta ku seketela; kanya mbilu u wu tirha.”

⁵ Kutani Ezra a suka a yima, a lerisa varhangeri va vaprista ni Vaisraele hinkwavo, leswaku va hlambanya va tiboha ku endla leswi vuriweke. Kutani va tiboha hi ku hlambanya.

⁶ Kutani Ezra a suka emahlweni ka Tempele, a ya endlwini leyi a ku tshama Yohanani n'wana Eliyaxibi, a fika a etlela kona, a nga dyanga nchumu kumbe ku nwa mati, hikuva ku tiarisa ka lava va vuyeke hi le vukhumbini a swi n'wi khunguvanyisile swinene.

⁷ Kutani ku humesiwa nawu etikweni hinkwaro ra Yuda ni le Yerusalema, leswaku hinkwavo lava va vuyeke hi le vukhumbini va fanele ku ya hlengeletana eYerusalema.

⁸ Ku tivisiwile ni leswaku munhu loyi a nga ta ka a nga yi eYerusalema ku kondza ku hundza masiku manharhu, tindhuna ni vakulukumba va ta lerisa leswaku a tekeriwa swilo swa yena hinkwaswo, a tlhela a hlongoriwa a suka exikarhi ka lava va vuyeke hi le vukhumbini.

⁹ Kutani vavanuna hinkwavo va ka Yuda ni va ka Benjamini va hlengeletana eYerusalema masiku manharhu ma nga si hundza. Nhlengeletano yi vile hi siku ra 20 hi nhweti ya vu-9. Vanhu hinkwavo a va hlengeletanile erivaleni leri ri nga mahlweni ka Tempele, va ri karhi va rhurhumela hikwalaho ka mhaka leyi, ni hikwalaho ka mpfula leyi a yi ri karhi yi na swinene.

¹⁰ Kutani muprista Ezra a suka a yima a ku ka vona: “Mi vangele tiko ra Israele nandzu hi ku tlula nawu, mi ya mi ya teka vasati eka vamatiko.

¹¹ Hikokwalaho, tisoleni eka Xikwembu xa vatata wa n'wina, mi endla leswi xi rhandzaka swona; hambanani ni vanhu va tiko leri, mi tshika ni vavasati lava mi va tekeke eka vona.”

¹² Kutani ntshungu hinkwawo wu hlamula, wu huwelela hi rito rin'we wu ku: “Hiswona! Hi fanele ku endla hilaha u vuleke hakona.

¹³ Kambe vanhu lava va tele ngopfu, naswona mpfula yi le ku neni swinene, hi nga ka hi nga yimi laha rivaleni. Hambi wu ri ntirho lowu, a hi wa siku rin'we kumbe mambirhi, hikuva xidyoho lexi hi xi endleke i xikulu ngopfu.

¹⁴ Swa antswa tindhuna ta hina ti va tona ti yimelaka ntshungu lowu hinkwawo, kutani vanhu lava va nga mitini ya hina lava tekeke vasati eka vamatiko va vekeriwa minkarhi leyi va nga ta ta ha yona. Va fanele ku ta ni vakulukumba va ka vona ni vaavanyisi va kona, ku kondza Xikwembu xa hina xi rheleta vukari bya xona lebyi pfurhaka ehenhla ka hina hikwalaho ka mhaka leyi.”

¹⁵ Miehleketo leyi, yi kanetiwile ntsena hi Yonatani n'wana Asahele, na Yahaziya n'wana Tikivha, va seketeriwa hi Mexulama na Xabetayi lowa Mulevhi.

¹⁶ Kutani lava va vuyeke hi le vukhumbini va endla hilaha ku twananiweke hakona. Hiloko muprista Ezra a hlawula vavanuna lava a va ri tinhloko ta mindyangu, va yimela mindyangu ya ka vona; un'wana na un'wana a tsariwa vito ra yena. Kutani hi siku ro sungula ra n'hweti ya vukhume, va hlangana va sungula ku kambisisa mhaka.

¹⁷ Hi siku ro sungula ra n'hweti yo sungula, a va vonanile ni vavanuna hinkwavo lava a va tekile vasati eka vamatiko.

Mavito ya lava tekeke vasati exikarhi ka vamatiko

¹⁸ Exikarhi ka vaprista, lava tekeke vasati eka vamatiko hi lava: Maaseya, na Eliezere, na Yaribi, na Gedaliya, va nga va ka Yexuwa ni vamakwavo wa yena, vona vana va Yosadaka.

¹⁹ Hinkwavo va tibohile ku hlongola vasati va vona, va tlhava na nyimpfu yi va mhamba yo susa xidyoho xa vona.

²⁰ Exikarhi ka va ka Imere, lava tshikeke vasati i Hanani, na Zebadiya.

²¹ Exikarhi ka va ka Harimi, i Maaseya, na Eliya, na Xemaya, na Yehiele, na Uziya.

²² Exikarhi ka va ka Paxahuru, i Eli-Howenayi, na Maaseya, na Iximaele, na Netanele, na Yozabadi, na Elasa.

²³ Exikarhi ka Valevhi, lava tshikeke vasati i Yozabadi, na Ximeyi, na Kelaya (hileswaku Kelita), na Petahiya, na Yuda, na Eliezere.

²⁴ Exikarhi ka vayimbeleri, i Eliyaxibi. Exikarhi ka varindzi va le nyangweni i Xalumi, na Teleme, na Uri.

²⁵ Hi tlhelo ra Vaisraele lavan'wana, exikarhi ka va ka Paroxi, i Ramiya, na Yiziya, na Malikiya, na Miyamini, na Eliyazara, na Haxabiya, na Benaya.

²⁶ Exikarhi ka va ka Elamu, i Mataniya, na Zakariya, na Yehiele, na Abidi, na Yeremoto, na Eliya.

²⁷ Exikarhi ka va ka Zatu, i Eli-Howenayi, na Eliyaxibi, na Mataniya, na Yeremoto, na Zabada, na Aziza.

²⁸ Exikarhi ka va ka Bebayi, i Yohanani, na Hananiya, na Zabayi, na Atalayi.

²⁹ Exikarhi ka va ka Bani, i Maluko, na Adaya, na Yaxubu, na Xeyala, na Yeremoto.

³⁰ Exikarhi ka va ka Pahata-Mowabu, i Adina, na Kelala, na Benaya, na Maaseya, na Mataniya, na Besalele, na Binuyi, na Manase.

³¹ Exikarhi ka va ka Harimi, i Eliezere, na Yixiya, na Malikiya, na Xemaya, na Ximeyoni,

³² na Benjamini, na Maluka, na Xemariya.

³³ Exikarhi ka va ka Haxumu, i Matenayi, na Matata, na Zabada, na Elifelete, na Yeremiya, na Manase, na Ximeyi.

³⁴ Exikarhi ka va ka Bani, i Maadayi, na Amirama, na Uwele,

³⁵ na Benaya, na Bedeya, na Keluhi,

³⁶ na Vhaniya, na Meremoto, na Eliyaxibi,

³⁷ na Mataniya, na Matenayi, na Yaasu.

³⁸ Exikarhi ka va ka Binuyi, i Ximeyi,

³⁹ na Xelemiya, na Natani, na Adaya,

⁴⁰ na Makina-Debayi, na Xaxayi, na Xarayi,

⁴¹ na Azarele, na Xelemiya, na Xemariya,

⁴² na Xalumi, na Amariya, na Yosefa.

⁴³ Exikarhi ka va ka Nebo, i Yehiele, na Matitiya, na Zabada, na Zebina, na Yadayi, na Yuwele, na Benaya.

⁴⁴ Hinkwavo lava, a va tekile vasati eka vamatiko, kutani va va hlongorile, swin'we ni vana va vona.