Ezekiele 8 - BIBELE Mahungu Lamanene

Ezekiele a kombiwa manyala lama endliwaka eYerusalema

¹ Hi lembe ra vu-6, esikwini ra vuntlhanu ra n'hweti ya vu-6, a ndzi tshamile ekaya ka mina, swin'we ni varhangeri va vanhu va ka Yuda; kutani loko ndzi ri kona kwalaho, HOSI N'wini wa hinkwaswo a ndzi khoma hi matimba ya yena.

² Loko ndzi ri karhi ndzi xiyaxiya, ndzi vona lexi fanaka ni xivumbeko xa munhu: Ku sukela exisutini ku ya ehansi, miri wa munhu loyi a wu fana ni ndzilo, kambe ku sukela exisutini ku ya ehenhla, a wu hatima ku fana ni koporo leyi vangamisiweke.

³ Kutani a tshambuluta xilo lexi fanaka ni voko, a ndzi khoma hi misisi; kutani exivonweni lexi HOSI Xikwembu xi ndzi kombeke xona, ndzi tikuma ndzi tlakuriwile hi Moya wa xona, ndzi hahiseriwa empfhukeni, ndzi ya vekiwa eYerusalema, kusuhi ni nyangwa ya le n'walungwini, hi le ndzeni ka yona. Kutani endhawini leyi, a ku ri ni xifaniso xa xikwembu xa hava, xi nga xilo lexi hlundzukisaka HOSI Xikwembu.

⁴ Kutani kona kwalaho, ndzi kombiwa ku dzuneka ka Xikwembu xa Israele, ku fana ni ku dzuneka loku ndzi ku voneke erivaleni ra le Kebara.

⁵ Xikwembu xi ku ka mina: “Wena munhu, languta en'walungwini!” Kutani ndzi endla tano; hiloko ndzi vona xifaniso xa xikwembu xa hava, xi nga xilo lexi hlundzukisaka HOSI Xikwembu; xifaniso xa kona a xi ri en'walungwini wa nyangwa leyi vanhu va nghenaka ha yona loko va ya alitarini.

⁶ Kutani Xikwembu xi ndzi vutisa xi ku: “Xana wa swi vona, we Ezekiele, leswi Vaisraele va swi endlaka endhawini leyi xana? Mintirho ya manyala layo chavisa leyi va yi endlaka laha, ya ndzi hlongola eTempeleni ya mina. Kambe wa ha ta vona swa manyala man'wana lama tlulaka lawa.”

⁷ Kutani HOSI Xikwembu xi ndzi yisa enyangweni ya xivava xa Tempele; loko ndzi languta, ndzi vona mbhovo ekhumbini.

⁸ Kutani Xikwembu xi ku ka mina: “Wena munhu, boxa khumbi leri!” Ndzi endla sweswo, kutani ndzi kuma rivanti ekhumbini ra kona.

⁹ Xikwembu xi ndzi lerisa xi ku: “Nghena exivandleni lexi, u vona swilo swa manyala leswi va swi endlaka.”

¹⁰ Kutani ndzi nghena ndzi languta, ndzi kuma leswaku khumbi hinkwaro a ri tele hi swifaniso swa swikokovi ni swa swiharhi leswi nga tengangiki, ni swikwembu swa hava swa Vaisraele.

¹¹ Emahlweni ka swilo leswi, a ku yimile vakulukumba va 70 va Israele, va ri na Yaazaniya n'wana Xafani. Un'wana ni un'wana a a tamele ximbitana xa mirhi ya risuna, musi wa kona wu mbuluka wu ya henhla.

¹² Xikwembu xi ku ka mina: “Xana wa swi vona, we Ezekiele, leswi vakulukumba va Israele va swi endlaka exihundleni xana? Loko va ri etindlwini ta vona ta swifaniso, va vula mina HOSI a ndzi va voni, ni leswaku ndzi tshikile tiko ra vona.”

¹³ Xi engeta xi ku ka mina: “Wa ha ta vona swilo swin'wana leswi va swi endlaka, swa manyala yo tlula lawa!”

¹⁴ Kutani HOSI Xikwembu xi ndzi yisa kusuhi ni nyangwa ya Tempele leyi nga n'walungwini. Kutani ndzi vona vavasati lava rilaka xikwembu lexi va nge i Tamuzi.

¹⁵ Kutani HOSI Xikwembu xi ndzi vutisa xi ku: “Wena Ezekiele, xana u swi vonile swilo leswi xana? Wa ha ta vona swa manyala man'wana lama tlulaka lawa.”

¹⁶ HOSI Xikwembu xi ndzi yisa exivaveni xa le ndzeni xa Tempele. Kutani ndzi vona vavanuna va 25 lava yimeke exikarhi ka rikupakupa ni alitari, va fularhela yindlu leyi ya HOSI, va ri kusuhi ni nyangwa ya yona; a va langutile evuxeni va ri karhi va gandzela dyambu loko ri tlhava.

¹⁷ Kutani Xikwembu xi ku ka mina: “We Ezekiele, xana u swi vonile swilo leswi xana? Va ku Yuda a va kolwi hi manyala lawa va ma endlaka kwale, kambe va ha endla swin'wana swa tihanyi etikweni hinkwaro, va ndzi hlundzukisa ha swona ku tlula mpimo, naswona va ndzi pfuka hi ku hunga-hungisa switluka etinhompfini ta vona kukota vamatiko.

¹⁸ Hikokwalaho ndzi ta va ba; ndzi nga ka ndzi nga va rivaleli, a ndzi nga va tweli vusiwana. Va ta rila va ba huwa etindleveni ta mina, kambe a ndzi nga va hingisi.”